قازاق كلۋبتارىن قۇرىلىس كومپانيالارى ساتىپ الىپ جاتىر

«Qazaq Stroy» كومپانياسىنىڭ باسشىسى ءارى سونىڭ قۇرىلتايشىسى نۇرلان ارتىقباەۆ «اقتوبە» فۋتبول كلۋبىنىنىڭ يەسى اتاندى.

قازاقپارات اگەنتتىگىنىڭ حابارلاۋىنشا، كلۋبتىڭ بالانستىق قۇنى — 200 ملن تەڭگە.

«اقتوبە» فۋتبول كلۋبىنىڭ قۇجاتى بىرەر ايدا تولىق راسىمدەلەدى.

— جەكەشەلەندىرۋ — تىكەلەي پرەزيدەنتتىڭ تاپسىرماسى. بيۋدجەتتەن قارجى بولىنبەيدى. ەلىمىزدىڭ قالتالى ازاماتتارى الىپ، كلۋبتى جەتىلدىرەدى. كلۋبقا قىزىعۋشىلىق تانىلىپ، ءوز ۇلەسىن قوسامىن دەگەن كاسىپكەر انىقتالدى. ول — «Qazaq Stroy» كومپانياسىنىڭ باسشىسى، قۇرىلتايشىسى نۇرلان ارتىقباەۆ. اقتوبەلىك، بالا كەزىنەن بەرى «اقتوبە» فۋتبول كلۋبىنا جانكۇيەر بولىپ، اتا-اناسىمەن ستاديونعا بارعان. ول سول كەزدە بولاشاقتا مۇمكىندىك بولسا، ۇلەس قوسامىن دەپ ارمانداعان. ءوزى حابارلاسىپ، پرەزيدەنتتىڭ تاپسىرماسىن ىسكە اسىرۋعا دايىن ەكەنىن ءبىلدىردى.

ءبىر-ەكى ايدىڭ كولەمىندە قۇجاتتى تولىق اياقتايمىز دەپ جوسپارلاپ وتىرمىز. ەندى قالاي بولاتىنىن، كلۋبقا قانشا بولىنەتىنىن كاسىپكەردىڭ كومانداسى ايتادى. ارينە، ءبىز تىس قالمايمىز، قاجەتتى ينفراقۇرىلىم، سونىڭ ىشىندە بالالار، جاسوسپىرىمدەر فۋتبولى باستى نازاردا بولادى. بالالار وسكەندە ۇلكەن سپورتقا قادامىن وسى كاسىپكەرمەن بىرگە ىسكە اسىرادى، — دەدى اقتوبە وبلىسىنىڭ اكىمى اسحات شاحاروۆ.

سونىمەن بىرگە وبلىس باسشىسى باعالاۋ جۇمىستارىنىڭ ىستەلىنگەنىن،  قازىر كلۋبتىڭ بالانستىق قۇنى — 200 ملن تەڭگە ەكەنىن، 35 مىڭ ورىنعا ارنالعان ستاديوننىڭ قۇرىلىسى تۋرالى دا ايتتى.

-قۇرىلىسشىلاردىڭ ايتۋىنشا، ستاديون ەكى جىلدا سالىنادى، — دەدى اسحات شاحاروۆ. 

بۇعان دەيىن حابارلانعانداي، قىزىلوردا «قايسار»، استانادا «جەڭىس»، پەتروپاۆلدا «قىزىلجار» فۋتبول كلۋبى جەكەشەلەنگەن بولاتىن.

«قايسار» كلۋبى «TAU Group LTD» كومپانياسىنىڭ باسشىسى يسلامعالي قوزباقوۆتىڭ جەكە باسقارۋىنا بەرىلسە، «جەڭىسكە» Kaspi.kz كومپانياسىنىڭ باسشىسى ميحايل لومتادزە ينۆەستيتسيا سالادى. ول استانادا «جەڭىس» فۋتبول كلۋبىنا الەمدىك دەڭگەيدەگى بالالار اكادەمياسىن سالاتىنىن، وندا جاس تالانتتار حالىقارالىق تالاپتار بويىنشا تەگىن جاتتىعا الاتىنىن، اكادەميا «جەڭىس» فۋتبول بازاسىندا سالىناتىنىن ايتتى.

كاسىپكەر سەرگەي كان «قىزىلجار» فۋتبول كلۋبىنىڭ ينۆەستورى بولدى. قاراعاندىنىڭ «شاحتەر» كومانداسى تۋرالى ايتساق، وسى ايدىڭ سوڭىندا ول اۋكتسيونعا تۇسەدى. قاراعاندى وبلىسىنىڭ اكىمى ەرماعانبەت بولەكباەۆتىڭ ايتۋىنشا، كەنشىلەر قالاسىنىڭ كلۋبى 50 ملن تەڭگەدەن اسا سوماعا ساتىلادى. ونى Freedom Holding باسشىسى ءارى قاراعاندى وبلىسى فۋتبول فەدەراتسياسىنىڭ پرەزيدەنتى تيمۋر تۋرلوۆ ساتىپ الۋى مۇمكىن.

ودان باسقا جەكەشەلەندىرۋگە ۇسىنىلعان سپورت ۇيىمدارىنىڭ قاتارىندا «استانا»، «اتىراۋ»، «ورداباسى»، «تۇران» مەن «كاسپي» كلۋبتارى بار.

بۇل كوماندالار باسەكەلەستىكتى قورعاۋ جانە دامىتۋ اگەنتتىگى دايىنداعان 461 نىساننان تۇراتىن كەشەندى تىزىمگە ەنگىزىلگەن. اگەنتتىك توراعاسى مارات وماروۆتىڭ ايتۋىنشا، بۇل نىساندار الدىمەن جوعارى رەفورمالار كەڭەسىنە ۇسىنىلادى. كەيىن ولاردى جەكەشەلەندىرۋدىڭ كەشەندى جوسپارىنا ەنگىزۋ قاراستىرىلعان. بۇل جۇمىستار 2028 جىلدىڭ سوڭىنا دەيىن باقىلاۋدا بولادى.

داستان كەنجالين،

استانا