UEFA چەمپيوندار ليگاسى: داستان ساتپاەۆ تاعى دا وزىنە نازار اۋدارتتى

بۇگىن «قايرات» چەمپيوندار ليگاسى نەگىزگى كەزەڭىنىڭ بەسىنشى تۋرىندا دانيانىڭ «كوپەنگاگەن» كلۋبىمەن ويناپ، ودان 2:3 ەسەبىمەن جەڭىلدى.

ول 81-مينۋتتا «كوپەنگاگەن» كومانداسى قاقپاسىنان ساڭىلاۋ تاپتى. ءسويتىپ، ساتپاەۆ 17 جاسىندا  UEFA چەمپيوندار ليگاسىندا گول سوققان ەڭ جاس ويىنشىلار ۇشتىگىنە كىردى. سونىمەن بىرگە داستان ساتپاەۆ UEFA چەمپيوندار ليگاسى نەگىزگى كەزەڭىندەگى العاشقى گولىن سوقتى.

بۇگىن ول 17 جاس 105 كۇن تولىپ وتىر. ال ءتىزىمنىڭ كوش باسىندا يسپانيالىق انسۋ فاتي تۇر. ول «بارسەلونا» ساپىندا 2019 جىلى يتاليانىڭ «ينتەر» قاقپاسىنا گول العان كەزدە 17 جاس 40 كۇنگە تولعان ەدى. ەكىنشى ورىندا «بارسەلونانىڭ» تاعى ءبىر ويىنشىسى لامين يامال (17 جاس، 68 كۇن) كەلەدى. لامين 2024 جىلى «موناكو» كلۋبىنىڭ قاقپاسىن نىساناعا الدى.

قولدا بار مالىمەتكە قاراعاندا، قازىرگە دەيىن ۇزدىك ۇشتىكتە بەلگيالىق «انتۆەرپەن» شابۋىلشىسى دجوردج يلەنيحەنا تۇرعان ەدى. ول «بارسەلونانىڭ» قاقپاسىنا گول سالعان ۋاقىتتا تۋعانىنا 17 جاس 119 كۇن بولعان.

بۇعان دەيىن «قايرات» پورتۋگاليانىڭ «سپورتينگىنەن» 1:4، يسپانيانىڭ «رەال مادريدىنەن» 0:5، يتاليانىڭ «ينتەرىنەن» 1:2 ەسەبىمەن جەڭىلسە، كيپردىڭ «پافوسىمەن» 0:0 ەسەبىمەن تەڭ ءتۇستى.

ەندى «قايرات» 9 جەلتوقساندا استانادا گرەكيانىڭ «وليمپياكوس»، 2026 جىلدىڭ 20 قاڭتارىندا بەلگيانىڭ «بريۋگگە» كلۋبىمەن، 28 قاڭتاردا انگليانىڭ «ارسەنال» كومانداسىمەن وينايدى.

داستان كەنجالين،

استانا