بەرەكەلى باستاما

«جاقسى ءىستىڭ باسىنا جاقسى كەلەر قاسىنا» دەمەكشى، الماتى قالاسىندا تاەكۆاندو سپورتىنان جاڭادان شاڭىراعى كوتەرىلگەن حالىقارالىق قوعامدىق وداقتىڭ رەسمي اشىلۋ سالتاناتىنا وراي ۇيىمداستىرىلعان القالى وتىرىسقا وسى سپورت تۇرىنەن ەل ەلگە تانىمال ارداگەر جاتتىقتىرۋشىلار مەن جەلتوقسان باتىرلارى كەلىپ قاتىستى.

وسىلايشا، جاقسى ءبىر يگى ءىستىڭ تۇساۋى كەسىلىپ جاتقاندا جەلتوقسان باتىرلارى دا شەت قالماي كەلىپ قولداۋ كورسەتكەندەرى كوڭىلگە قونادى. ويتكەنى، تاۋەلسىزدىگىمىزدى جەڭىپ الىپ بەرگەن باتىرلاردىڭ اراسىندا دا سپورتتىڭ ءار تۇرىنەن توپ جارىپ، ۇلكەن جەتىستىكتەرگە جەتكەندەرىنىڭ قاتارى قالىڭ.

ايتالىق، وسى وتىرىسقا ارنايى كەلگەن ەركىن كۇرەستەن كەزىندە ەل چەمپيوندارى، اردگەرلەر اراسىندا وتكەن حالىقارالىق جارىستىڭ كۇمىس جۇلدەگەرى دارحان جاكەشەۆ، ەركىن كۇرەستەن قازاقستان چەمپيونى باتىر الىمقۇلوۆ سەكىلدى جەلتوقسان باتىرلارى دا كەلىپ قاتىسىپ، بەرەكەلى باستاماعا قولداۋ، قۇرمەت كورسەتتى.

كەزدەسۋ باستالا سالىپ تاەكۆاندو سپورتىنان JASYN اتتى قوعامدىق وداقتىڭ قۇرۋداعى ماقسات، مۇددەسى تالقىلانىپ، پىكىر تالاستار بولدى.

القالى جيىندا يساتاي كابەكوۆ، جۇمابەك بايدىلدىقاجى مەن جامالي ديحان ۇلى سەكىلدى وسى سپورت ءتۇرىنىڭ مايىن ءىشىپ، جىلىگىن شاققان ەلگە تانىمال ماماندىردىڭ كەلىپ قاتىسىپ، وزدەرىنىڭ وي- پىكىرلەرىمەن ءبولىسۋى دە وتە ماڭىزدى بولدى. ءيا، تاەكۆوندا وليمپيا ويىندارىنىڭ باعدارلاماسىنا سوناۋ 2000 جىلى سيدنەي وليمپياداسىندا كىرگەلى بەرى بۇل سپورتتىڭ الەمگە تاراۋ قارقىنى كۇشەيگەنىن كورەمىز. جاپوندار دزيۋدو، سۋمو سياقتى سپورتتارىن الەمگە تاراتسا، كارىستەر دە ولاردان قالماي تاەكۆاندوسىن دامىتىپ قانا قويماي، وليمپيا ويىندارىنا باعدارلماسىنا كىرگىزىپ قويدى. بۇل ەكى سپورتقا قىزىعۋشىلىق شارتاراپتا ەسەلەپ ارتىپ، جاسوسپىرىمدەر قۇلشىنا اينالىسۋدا. وسىنداي ەكى ەلدىڭ ۇلتتىق سپورتتارىنا دەگەن سۇيىسپەنشىلىگىن، قۇرمەتىن كورە وتىرىپ، «شىركىن، ءبىزدىڭ ءتول كۇرەسىمىز قازاق كۇرەسى دە وليمپيادانى ايتپاي تۇرىپ ازيا ويىندارىنىڭ باعدارلاماسىنا كىرسە عوي»، دەگەن ارمانىمىز جانىمىزدى جەگەدەي جەپ، ىشىمىزدەن تۇرتەتىنى حاق.

ءيا، اللا ءناسىپ ەتىپ، مەملەكەت تاراپىنان بەتبۇرىس، قوزعاۋ بولسا ۇلتتىق كۇرەسىمىزدىڭ دە الار اسۋى بولار دەگەن نيەتتەمىز. ءبىرىن ايتىپ بىرىنە كەتسەك كەشىرىم سۇرايمىن. سونىمەن دوڭگولەك ۇستەلدە جاڭادان تۇساۋى كەسىلگەن حالىقارالىق تاەكۆاندو وداعىنىڭ اتقارار جۇمىستارى تالقىلانىپ، وداقتىڭ باسقارما مۇشەلەرى سايلاندى.

JASYN حالىقارالىق قوعامدىق وداعىعىڭ پرەزيەندەتى بولىپ بولات توقتاباي ۇلى قۇرىمباەۆ سايلانسا، ۆيتسە-پرەزدەنتى قىزمەتىنە دامير نۇسۇلتان ۇلى، اتقارۋشى ديرەكتورى لاۋازىمىنا سەرىك جيەنباەۆ ءبىراۋىزدان كوپتەن قولداۋ الىپ بەكىتىلدى. جاڭادان ىرگەسى كوتەرىلگەن حالىقارالىق تاەكۆاندو قوعامدىق وداعىنىڭ نەگىزگى ماقساتى — وسكەلەڭ ۇرپاقتى وسى سپورت تۇرىمەن اينالىسۋعا جاعداي تۋعىزىپ، وليمپيادا، الەم، ازيا جارىستارىندا ەلىمىزدىڭ نامىسىن ابىرويمەن قورعايتىن دارىندى تاەكۆاندو شەبەرلەرىن دايىنداپ شىعارۋ.

قازىرگى تاڭدا تاەكۆوندو سپورت تۇرىنەن الەم ارەنالارىندا تابىستى ونەر كورسەتىپ جۇرگەن ۇل-قىزدارىمىزدىڭ قاتارى كوبەيىپ كەلەدى. اسىرەسە، قازاق جاستارىنىڭ ايتۋلى سپورتقا دەگەن قۇمارلىعى ەرەكشە. اتا-بابامىز باتىر حالىق بولعان سوڭ جەكپە-جەك ونەرى قازاققا وزگە سپورت تۇرىنەن ءبىر تابان جاقىن ەكەنىن جاسىرا الماسپىز. سوندىقتاندا وسى ءبىر الامان سپورت تۇرىنە بەل شەشە بەلسەنە تاعى ءبىر سۋ جاڭا تاەكۆاندو وداعى قوسىلۋعا كىرىسكەلى تۇر ەكەن. ەندەشە، الدىنان جارىلقاسىن دەيمىز. «باتامەنەن ەل كوگەرەر، جاڭبىرمەنەن جەر كوگەرەر»، دەمەكشى قازاق قاشاندا ۇلكەن ءبىر ءىستى باستار الدىندا نە بولماسا ساپارعا اتتانار الدىندا اقساقال، ابىزداردىڭ اق باتاسىن الۋ ەجەلدەن كەلە جاتقان كونە ءداستۇرىمىز ەكەنى بەلگىلى.

القالى جيىن سوڭىندا اتاقتى جىر الىبى جامبىل بابىمىزدىڭ شوبەرەسى، جەلتوقسان ارداگەرى مۇراتحان جامبىلوۆ اتا-بابا داستۇرىمەن قول جايىپ اق باتاسىن بەردى. ەندى تەك وسى بەرەكەلى باستامانىڭ جەمىسىن كورۋ جولىندا تاباندى ەڭبەك ەتۋ جاڭادان قۇرىلعان قوعامدىق وداقتىڭ الدىندا تۇرعان نەگىزى ماقسات.

اقىن ورداباي ۇلى،

الماتى