Berekeli bastama

«Jaqsy istiń basyna jaqsy keler qasyna» demekshi, Almaty qalasynda taekvando sportynan jańadan shańyraǵy kóterilgen Halyqaralyq qoǵamdyq odaqtyń resmı ashylý saltanatyna oraı uıymdastyrylǵan alqaly otyrysqa osy sport túrinen el elge tanymal ardager jattyqtyrýshylar men Jeltoqsan batyrlary kelip qatysty.

Osylaısha, jaqsy bir ıgi istiń tusaýy kesilip jatqanda Jeltoqsan batyrlary da shet qalmaı kelip qoldaý kórsetkenderi kóńilge qonady. О́ıtkeni, táýelsizdigimizdi jeńip alyp bergen batyrlardyń arasynda da sporttyń ár túrinen top jaryp, úlken jetistikterge jetkenderiniń qatary qalyń.

Aıtalyq, osy otyrysqa arnaıy kelgen erkin kúresten kezinde el chempıondary, ardgerler arasynda ótken halyqaralyq jarystyń kúmis júldegeri Darhan Jakeshev, erkin kúresten Qazaqstan chempıony Batyr Álimqulov sekildi Jeltoqsan batyrlary da kelip qatysyp, berekeli bastamaǵa qoldaý, qurmet kórsetti.

Kezdesý bastala salyp taekvando sportynan JASYN atty qoǵamdyq odaqtyń qurýdaǵy maqsat, múddesi talqylanyp, pikir talastar boldy.

Alqaly jıynda Isataı Kabekov, Jumabek Baıdildiqajy men Jamalı Dıhanuly sekildi osy sport túriniń maıyn iship, jiligin shaqqan elge tanymal mamandyrdyń kelip qatysyp, ózderiniń oı- pikirlerimen bólisýi de óte mańyzdy boldy. Iá, taekvonda Olımpııa oıyndarynyń baǵdarlamasyna sonaý 2000 jyly Sıdneı Olımpıadasynda kirgeli beri bul sporttyń álemge taraý qarqyny kúsheıgenin kóremiz. Japondar dzıýdo, sýmo sııaqty sporttaryn álemge taratsa, kárister de olardan qalmaı taekvandosyn damytyp qana qoımaı, Olımpııa oıyndaryna baǵdarlmasyna kirgizip qoıdy. Bul eki sportqa qyzyǵýshylyq shartarapta eselep artyp, jasóspirimder qulshyna aınalysýda. Osyndaı eki eldiń ulttyq sporttaryna degen súıispenshiligin, qurmetin kóre otyryp, «Shirkin, bizdiń tól kúresimiz qazaq kúresi de Olımpıadany aıtpaı turyp Azııa oıyndarynyń baǵdarlamasyna kirse ǵoı», degen armanymyz janymyzdy jegedeı jep, ishimizden túrtetini haq.

Iá, Alla násip etip, memleket tarapynan betburys, qozǵaý bolsa ulttyq kúresimizdiń de alar asýy bolar degen nıettemiz. Birin aıtyp birine ketsek keshirim suraımyn. Sonymen dóńgólek ústelde jańadan tusaýy kesilgen Halyqaralyq taekvando odaǵynyń atqarar jumystary talqylanyp, odaqtyń basqarma músheleri saılandy.

JASYN halyqaralyq qoǵamdyq odaǵyǵyń prezıendeti bolyp Bolat Toqtabaıuly Qurymbaev saılansa, vıe-prezdenti qyzmetine Damır Nusultanuly, atqarýshy dırektory laýazymyna Serik Jıenbaev biraýyzdan kópten qoldaý alyp bekitildi. Jańadan irgesi kóterilgen Halyqaralyq taekvando qoǵamdyq odaǵynyń negizgi maqsaty — óskeleń urpaqty osy sport túrimen aınalysýǵa jaǵdaı týǵyzyp, Olımpıada, álem, Azııa jarystarynda elimizdiń namysyn abyroımen qorǵaıtyn daryndy taekvando sheberlerin daıyndap shyǵarý.

Qazirgi tańda taekvondo sport túrinen álem arenalarynda tabysty óner kórsetip júrgen ul-qyzdarymyzdyń qatary kóbeıip keledi. Ásirese, qazaq jastarynyń aıtýly sportqa degen qumarlyǵy erekshe. Ata-babamyz batyr halyq bolǵan soń jekpe-jek óneri qazaqqa ózge sport túrinen bir taban jaqyn ekenin jasyra almaspyz. Sondyqtanda osy bir alaman sport túrine bel sheshe belsene taǵy bir sý jańa taekvando odaǵy qosylýǵa kiriskeli tur eken. Endeshe, aldynan jarylqasyn deımiz. «Batamenen el kógerer, jańbyrmenen jer kógerer», demekshi qazaq qashanda úlken bir isti bastar aldynda ne bolmasa saparǵa attanar aldynda aqsaqal, abyzdardyń aq batasyn alý ejelden kele jatqan kóne dástúrimiz ekeni belgili.

Alqaly jıyn sońynda ataqty jyr alyby Jambyl babymyzdyń shóberesi, Jeltoqsan ardageri Murathan Jambylov ata-baba dástúrimen qol jaıyp aq batasyn berdi. Endi tek osy berekeli bastamanyń jemisin kórý jolynda tabandy eńbek etý jańadan qurylǵan qoǵamdyq odaqtyń aldynda turǵan negizi maqsat.

Aqyn ORDABAIULY,

ALMATY