استاناعا جاپون كۇرەسىنىڭ جامپوزى ەرسىن بالتاعۇل كەلە جاتىر

15 اقپاندا ساعات 15.00-دە استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا كاسىبي سۋمو شەبەرى ەرسىن بالتاعۇلمەن كەزدەسۋ بولادى، Qazaq Kuresi اسسوتسياتسياسىنىڭ ءباسپاسوز قىزمەتى.

ەرسىن بالتاعۇل – قازاقتان شىققان تۇڭعىش كاسىبي سۋموشى ءارى قازىرگى تاڭدا جاپونيادا جوعارى ناتيجەلەرگە جەتكەن قازاقستاننىڭ جالعىز وكىلى. ول سپورتتىق جولىن قازاق كۇرەسى مەن دزيۋدودان باستاپ، ۇلتتىق مەكتەپتەن شىڭدالىپ، حالىقارالىق دەڭگەيدە تابىسقا جەتكەن.

الماتى قالاسىنىڭ تۋماسى جاپونياداعى نيحون ۋنيۆەرسيتەتىن تامامداعاننان كەيىن كاسىبي سۋمودا كينبوزان حارۋكي لاقاپ اتىمەن تانىمال بولعان. بويى 195 سانتيمەتر، سالماعى 178 كەلى سپورتشى بۇگىنگى تاڭدا سۋمو كۇرەسىنىڭ ەڭ جوعارعى ديۆيزيونى – ماكۋتيدە ونەر كورسەتۋدە.

جەكپە-جەك سارايىندا جوسپارلانعان كەزدەسۋگە قازاق كۇرەسىنىڭ ءابسوليۋتتى سالماق دارەجەسىندە سىنعا ءتۇسىپ جۇرگەن تۇيە بالۋاندار، سونداي-اق Qazaqstan Barysy رەسپۋبليكالىق ءتۋرنيرىنىڭ جەڭىمپاز-جۇلدەگەرلەرى – ۇلان رىسقۇل، رۋسلان ابدىرازاقوۆ، مۇحيت تۇرسىنوۆ، مارات بايقامۇروۆ، ەراسىل قاجىباەۆ، ماقسات يساعابىلوۆ پەن دزيۋدودان قازاقستان قۇراماسىنىڭ بالۋاندارى قاتىسادى.

ءىس-شارادا قاتىسۋشىلار ەرسىن بالتاعۇلدىڭ سۋموداعى كاسىبي جولى، جاپونياداعى دايىندىق جۇيەسى، سۋمو مادەنيەتى، سونداي-اق ونىڭ ۇلتتىق سپورتتان حالىقارالىق ارەناعا شىعۋ تاجىريبەسى جونىندە تىڭ اقپارات الۋ مۇمكىندىگىنە يە بولادى.

كاسىبي سۋمو شەبەرى جاپونيادا وتكەن «حاتسۋ باسيو – 2025» كۋبوگىندا ءۇشىنشى ورىنعا يە بولىپ، ەل تاريحىنداعى ماڭىزدى جەتىستىككە جەتكەن بولاتىن. 15 كۇنگە سوزىلعان تۋرنيردە كينبوزان حارۋكي قارسىلاستارىن 13 رەت جەڭىپ، 2 رەت جەڭىلگەن.

اككرەديتاتسيا: قانات اتامانوۆ، 87752922795 (ۆاتساپپ)