اسىعىمىز الەمدىك رەكوردتار كىتابىنا كىردى

بۇگىن اقتوبە قالاسىنداعى №61 ورتا مەكتەپتە تاريحي جاعداي بولدى. اقتوبە قالاسىنىڭ تۇرعىنى، سيىردىڭ 3 مىڭنان استام اسىعىن جيناپ قازاقستاندىق رەكوردتار كىتابىنا (كينەس) ەنگەن ەربولات قۋانىشوۆتىڭ اسىق سانىن 5 مىڭعا جەتكىزىپ GBR (GLOBAL BEST of RECORDS) الەمدىك رەكوردتار كىتابىنا ەنۋىنە ارنالعان ءىس-شارا ءوتتى، دەپ حابارلادى اقتوبە وبلىستىق اسىق اتۋ فەدەراتسياسىنىڭ ءباسپاسوز قىزمەتى.

تەك اقتوبەنىڭ ەمەس بارشا قازاق ەلىنىڭ ابىرويىن اسىرعان ءىس-شاراعا دۇنيەجۇزىلىك رەكوردتار كىتابىنىڭ باس تىركەۋ وفيتسەرى قۋاندىق قۇدايبەرگەنوۆ ارنايى كەلىپ، اسىقتاردى جينالعان كوپشىلىك الدىندا ساناپ، ناتيجەسىندە ەربولات قۋانىشوۆقا 5126 اسىق جيناپ الەمدىك رەكوردتار كىتابىنا ەنگەندىگىن راستايتىن سەرتيفيكات پەن ستاتۋەتكا تابىس ەتتى جانە GBR (GLOBAL BEST of RECORDS)-ءتىڭ ارنايى كۇمىس مەدالىمەن ماراپاتتادى.  وسىلايشا اقتوبەدە تاعى ءبىر الەمدىك رەكورد جاسالىپ، رەسمي تۇردە مويىندالدى.

جاقىندا عانا ارايلى اقتوبەدە وبلىستىق حالىق شىعارماشىلىعى ورتالىعىنىڭ «ەر ەدىگە» جىر مەكتەبىنىڭ جەتەكشىسى ادىلبەك سارين باستاعان 36 ادام «قىرىمنىڭ قىرىق باتىرى» مەن پايعامبارلاردىڭ حيسساسىن، ياعني 51 مىڭ جىر جولدارىن توقتاماي 24 ساعات جىرلاپ ازيا جانە افريكا ەلدەرىنىڭ گيننەس رەكوردتار كىتابىنا ەنگەن بولاتىن.

بۇل ءىس-شاراعا كوپتەگەن قۇرمەتتى قوناقتار قاتىسىپ، تاريحي ساتكە بىرگە كۋا بولدى. اقتوبە قالالىق ارداگەرلەر كەڭەسىنىڭ توراعاسى احات مىرزالين، وسى يگىلىكتى ءىستىڭ جۇزەگە اسۋىنا ەلەۋلى ەڭبەك سىڭىرگەن اقتوبە قالالىق اسىق اتۋ فەدەراتسياسىنىڭ پرەزيدەنتى رايگۇل الدانىشقىزى جانە باسقا دا قۇرمەتتى قوناقتار ۇلتتىق قۇندىلىقتاردى ۇلىقتاپ جۇرگەن ەربولات قۋانىشوۆتىڭ الەمدىك رەكوردتار كىتابىنا ەنۋىمەن شىن جۇرەكتەن قۇتتىقتادى.

«ەر ەدىگە» جىر مەكتەبىنىڭ شاكىرتتەرىنەن قۇرالعان «كونە سارىن» تريوسى مەن «گەروي-ۆ پەسنياح» حالىقارالىق پاتريوتتىق اندەر بايقاۋىنىڭ گران-پري يەگەرى ورىنگۇل يسماعۇلوۆا سالتاناتتى شارانى وزدەرىنىڭ پاتريوتتىق اندەرىمەن ارلەپ، اسىقسۇيەر قاۋىمنىڭ ريزاشىلىعىنا بولەندى. اقتوبە بلىستىق اسىق اتۋ فەدەراتسياسىنىڭ مۇشەلەرى ورتاعا اسىق كىلەمىن جايىپ، كەلۋشىلەر اسىق ويناعان ءساتى الەمدىك رەكوردتار كىتابى وكىلىنىڭ نازارىنا ىلىكتى.

وسىدان 3 جىل بۇرىن اقتوبەدەن باستاۋ العان «الاش ساقاسى» ءتۋرنيرى جاقىندا ەكىباستۇز قالاسىندا وتكەن بولاتىن. سول ءدۇبىرلى دودادا ءتورتىنشى ورىنعا يە بولىپ، ءتۋرنيردىڭ ۇزدىك ويىنشىسى اتانعان نۇربەك باينييازوۆقا وبلىستىق اسىق اتۋ فەدەراتسياسىنىڭ پرەزيدەنتى ەلتاي وتەعۇلوۆ اسىقتى الەمگە تانىتىپ جاتقان وسى شارادا كەلەسى جولى باس جۇلدە السىن دەپ ىرىمداپ، جۇلدەسىن كوپشىلىكتىڭ الدىندا تابىس ەتتى.

سيىردىڭ 5000 اسىعىن جيناپ الەمدىك رەكوردتار كىتابىنا ەنۋىنە كورىمدىك رەتىندە مەتسەنات، سپورت جاناشىرى، ايتەكە بي اۋداندىق قازاق كۇرەس فەدەراتسياسىنىڭ پرەزيدەنتى بايماشەۆ حاميت قونىس ۇلى جانە ءبىر توپ قۇلتاس اتا ۇرپاقتارى ەربولات قۋانىشوۆقا تۇلپار مىنگىزىپ قۇرمەت كورسەتتى.

وسىلايشا ارايلى اقتوبەدە اسىعىمىز تاعى ءبىر مارتە تورگە شىعىپ، الەمدىك دەڭگەيگە كوتەرىلدى. جاڭا رەكورد تىركەلدى! بۇل بارشا قازاق ەلىمەن بىرگە ءبىزدىڭ، اقتوبە وبلىستىق اسىق اتۋ فەدەراتسيانىڭ دا قۋانىشى دەپ بىلەمىز. ەڭبەگىڭ جانا بەرسىن ەربولات! ەندى الدىڭا 10 مىڭ اسىق جيناپ، ءمۇسىن جاسايمىن دەگەن بيىك ماقسات قويىپ وتىرسىڭ، سول ماقساتىنا جەت!