SportPress.kz قازاقستان سپورت جاڭالىقتارى
استانادا سپورت كۇنى قارساڭىندا ءوتىپ جاتقان «قازاقستانداعى سپورت – رەفورمالاردان ناتيجەگە دەيىن. دەنە شىنىقتىرۋ جانە سپورت تۋرالى جاڭا زاڭدى ىسكە اسىرۋ قورىتىندىلارى» اتتى سپورت كونفەرەنتسياسىنداعى پلەنارلىق سەسسيالاردا سالاداعى اۋقىمدى رەفورمالاردىڭ العاشقى ناتيجەلەرى تالقىلاندى، دەپ حابارلايدى Egemen.kz.
تۋريزم جانە سپورت مينيسترلىگىنىڭ حابارلاۋىنشا، مەملەكەت باسشىسىنىڭ تاپسىرمالارىن ورىنداۋ ماقساتىندا ۆەدومستۆو ازىرلەگەن جاڭا زاڭ سالانى جۇيەلى جاڭعىرتۋدىڭ نەگىزگى تەتىگىنە اينالدى. رەفورما اياسىندا مەملەكەت قارجىلاندىرۋدىڭ نەعۇرلىم اشىق مودەلىنە كوشىپ، قاراجاتتىڭ ءتيىمسىز جۇمسالۋىن ازايتتى. سونداي-اق سپورت رەزەرۆى مەن باسىم باعىتتاردى قولداۋدى كۇشەيتتى.
قازىردىڭ وزىندە رەفورمالاردىڭ ناقتى ناتيجەلەرى بار.
8 ملرد تەڭگەدەن استام بيۋدجەت قاراجاتى ۇنەمدەلدى. بۇعان كاسىبي كلۋبتاردى قارجىلاندىرۋعا ليميت ەنگىزۋ جانە لەگيونەرلەردى بيۋدجەت ەسەبىنەن قارجىلاندىرۋدان باس تارتۋ ىقپال ەتتى.
بالالار سپورتىنا بولىنەتىن قارجى ەكى ەسەگە جۋىق ارتتى. سپورت مەكتەپتەرىندەگى ءبىر تاربيەلەنۋشىگە ارنالعان جىلدىق قارجىلاندىرۋ 233 مىڭ تەڭگەدەن 415 مىڭ تەڭگەگە دەيىن كوبەيدى.
جاتتىقتىرۋشىلاردىڭ جالاقىسى 30%-عا ءوستى. سپورت مەكتەپتەرىنىڭ جاتتىقتىرۋشى-وقىتۋشىلارىنىڭ ەڭبەكاقىسىن كەزەڭ-كەزەڭىمەن ارتتىرۋ باستالدى. قازىرگى تاڭدا 3 511 جاتتىقتىرۋشى-وقىتۋشى ءتيىستى تەستىلەۋگە قاتىسقان.
«بۇگىندە ءبىز سپورتشىلار مەن سپورت سالاسىنىڭ وكىلدەرى رەتىندە رەفورمالاردىڭ جاي عانا قۇجات ەمەس ەكەنىن ءىس جۇزىندە كورىپ وتىرمىز. مينيسترلىكتىڭ اتقارعان جۇمىسى – ءبىزدىڭ سالاعا ۇزاق ۋاقىت بويى جەتىسپەي كەلگەن وزگەرىستەر. بۇل وزگەرىستەر قازىردىڭ وزىندە ناتيجە بەرىپ جاتىر. ونىڭ ناقتى كورىنىسى – سپورتشىلارىمىزدىڭ جەڭىستەرى»، دەدى «سپورتشىلار كەڭەسى» اتقارۋ كوميتەتىنىڭ توراعاسى، كۇرەستەن وليمپيادا چەمپيونى يۋري مەلنيچەنكو.
سەسسيادا سپورت ۇيىمدارىن باسقارۋ جۇيەسىندەگى وزگەرىستەر دە اتاپ ءوتىلدى. 2025 جىلعى قىركۇيەكتەن باستاپ باسشىلاردى روتاتسيالاۋدىڭ بىرىڭعاي ءتارتىبى ەنگىزىلدى. ال سپورت ۇيىمدارىنىڭ ءبىرىنشى باسشىلارىن تاعايىنداۋ اشىق كونكۋرستىق نەگىزدە ىسكە اسىرىلادى.
بۇگىنگى تاڭدا 112 تاعايىنداۋدىڭ 86-سى نەمەسە 76%-ى كونكۋرس ناتيجەسىندە جۇزەگە استى. قازاقستان سپورت سالاسىنداعى رەفورمالاردىڭ ناقتى ناتيجەسىن كورە باستادى. بيۋدجەت قاراجاتىن پايدالانۋ تيىمدىلىگى ارتىپ، سپورتشىلار مەن جاتتىقتىرۋشىلاردى قولداۋ كۇشەيتىلۋدە. سونىمەن قاتار سپورت رەزەرۆىن دايارلاۋ جۇيەسى جەتىلدىرىلىپ، سالانى باسقارۋ تيىمدىلىگى ارتىپ، سپورتقا جەكە ينۆەستيتسيا تارتۋعا قولايلى جاعداي قالىپتاسىپ كەلەدى.
جالپى، كونفەرەنتسيا سپورت كۇنى قارساڭىندا ءوتىپ جاتقاننان كەيىن ەلىمىزدىڭ بارلىق وڭىرىندە ءبىر اپتا بويى ءتۇرلى سپورتتىق ءىس-شارالار ۇيىمداستىرىلادى.
