بالۋاندار باكۋدە الەم چەمپيوناتى كەزىندە داۋىس بەردى

قازاق كۇرەسىنەن ازەربايجاننىڭ باكۋ قالاسىندا ءوتىپ جاتقان الەم چەمپيوناتى كەزىندە قازاقستان قۇراماسىنىڭ بالۋاندارى قۇرىلتاي دەپۋتاتتارىنىڭ سايلاۋىنا قاتىسىپ، داۋىس بەردى، دەپ حابارلايدى  Qazaq Kuresi قاۋىمداستىعىنىڭ ءباسپاسوز قىزمەتى.

ۇلتتىق قۇراما وكىلدەرى قازاقستان رەسپۋبليكاسىنىڭ ازەربايجانداعى ەلشىلىگىنە بارىپ، ەلشىلىك جانىنان اشىلعان №426 سايلاۋ ۋچاسكەسىندە ءوز تاڭداۋىن جاسادى.

سايلاۋ ۋچاسكەسىندە قازاق كۇرەسىنەن الەم كۋبوگىنىڭ يەگەرى، الەم چەمپيونى رۋزيمون تۋگۋشەۆ، ازيا جانە ەكى دۇركىن الەم چەمپيونى ەرنۇر سۇلەيمان، ءۇش دۇركىن الەم چەمپيونى جۇماجان قوجامبەكوۆ، الەم چەمپيوناتىنىڭ كۇمىس جانە قولا جۇلدەگەرلەرى ارداق نۇرساق پەن جانات قازەز داۋىس بەردى.

بۇعان دەيىن حابارلانعانداي، باكۋدە 12 ەلدىڭ وكىلى قازاق كۇرەسىن دامىتۋدى قولعا الىپ، ىنتىماقتاستىق تۋرالى مەموراندۋمعا قول قويدى.

الەم چەمپيوناتىنىڭ باس دەمەۋشىسى – «سامۇرىق-قازىنا» ۇلتتىق ءال-اۋقات قورى» اق، ال دەمەۋشىسى – Sport Qory سپورتتى قولداۋ قورى بولعانىن اتاپ وتكەن ءجون.