باتىردىڭ رۋحىنا ارنالعان بەلدەسۋ

بيىل قازاق كۇرەسىنەن جاسوسپىرىمدەر اراسىندا باتىر بابامىز رايىمبەك حانگەلدى ۇلى اتىنداعى ءداستۇرلى رەسپبليكالىق جارىس 25-رەت ۇيىمداستىرىلدى. بۇل جارىس قازاق كۇرەسىنىڭ ەلىمىزدە دامۋىنا زور ۇلەسىن قوسىپ كەلگەن تارتىستى دودانىڭ ءبىرى بولىپ سانالادى.

ءتول كۇرەسىمىزدەن بۇگىندە الەم، ازيا چەمپيوناتتارىندا ەل نامىسىن قورعاپ جۇرگەن كوپتەگەن بالۋان وسى جارىستا كۇرەسىپ، ەسىمدەرى ەلگە تانىلعان دەسە ارتىق بولماس.

قازاقتىڭ ساحارا كەڭ دالاسى قانشاما تاريحتى قوينىنا قۇشىپ جاتىر دەسەڭىزشى. وسىناۋ بايتاق جەرىمىزدى سىرتقا جاۋدان قورعاپ قالۋ ءۇشىن قانشاما جاۋجۇرەك باتىرلارىمىز قان مايداندا جاندارىن قۇربان ەتتى. سوناۋ تاريحىمىزدىن اقتاڭداق بەتتەرىن اقتارعاندا ەلىمىزدى نايزانىڭ ۇشىمەن، بىلەكتىڭ كۇشىمەن قورعاپ امان ساقتاپ قالعان ەرجۇرەك باتىرلاردىڭ ىشىندە رايىمبەك بابامىزدى ەرەكشە ايتاتىنىمىز بەلگىلى. ال سول رايىمبەك باتىردىڭ رۋحىنا ارنالىپ ەلىمىزدە قازاق كۇرەسىنەن جاسوسپىرىمدەر اراسىندا ءداستۇرلى جارىس قازاق كۇرەسىنىڭ الىپتارىن ەلگە تانىلتىپ كەلگەن الامان جارىس بولىپ سانالادى.

مىسالى، رايىمبەك باتىردىڭ اتىندا وتكىزىلەتىن سپورت ءىس-شارالارىن ايتقاندا، مىندەتتى تۇردە قازاق كۇرەسىنەن جىل سايىن وتكىزىپ كەلگەن ءداستۇرلى رەسپۋبليكالىق جارىستى تىلگە تيەك ەتەمىز. وسى بەرەكەلى تۋرنيرگە ءالى دە بولسا جانجاقتى قولداۋ كورسەتىلمەي وتىرعانى ازداپ وكىنەتىن ءجاي.

جانىمىزعا جات گولف، كەرلينگ، تەننيس سياقتى سپورت تۇرلەرىنە شەن-شەكپەنى جوعارى اعالارىمىز بارىن اياماي سالىپ كومەك بەرىپ جاتادى. ال ءوزىمىزدىڭ ءتول كۇرەسىمىزگە كەلگەندە تومەن قاراپ قالاتىندارى نەلىكتەن ەكەنىن بىلە الماي دال بولاسىڭ. ءيا، بۇل ايتقان نازىمىز ۇلتتىق كۇرەسكە، قامقورلىق جوعارىدان بولىپ جاتسا نۇر ۇستىنە نۇر بولماق ەدى دەگەن ءسوز.

مىنە، باتىر بابا رايىمبەكتىڭ اتىندا كەزەكتى ءدۇبىرلى جارىس بابانىڭ رۋحىن قۇرمەتتەگەن كەيبىر جاناشىر ازاماتتاردىڭ ارقاسىندا جالاۋىن قايتا كوتەردى. ءبىر جارىستى رەسپۋبليكالىق دەڭگەيگە كوتەرىپ، قانشاما جىل بويى ۇزبەي ۇيىمداستىرۋ وڭايعا سوقپايتىنى ءمالىم. دەگەنمەندە قازاقستان رەسپۋبليكاسىنا ەڭبەگى سىڭگەن جاتتىقتىرۋشى، ىلە اۋدانى جاسوسپىرىمدەر مەن سپورت مەكتەبىنىڭ ديرەكتورى، رايىمبەك بابانىڭ ۇرپاعى قاپار راۋانوۆ سىندى ۇلتتىق كۇرەسىمىزدىڭ جاناشىرىنىڭ ارقاسىندا اتالمىش الامان دودا وتەگەن باتىر اۋىلىنداعى ىلە اۋدانىنىڭ بالالار مەن جاسوسپىرىمدەر سپورت مەكتەبىندە بيىل 25-رەت جالاۋىن كوتەرىپ وتىر.

ال، وسىنداي جاسوپىرىمدەر اراسىنداعى تارتىستى ءوتىپ كەلگەن جەكپە-جەكتەن قانشاما بالۋاندار قاناتتارىن قامداپ، بۇعاناسى بەكىپ شىقتى. بۇگىندە قانشاما قىرانبالاق جاستۇلەكتىڭ بۇگىندە اتى ەلىمىزگە تانىلدى! سونىڭ ءبىرى — قازاق كۇرەسىنەن ەكى دۇركىن الەم چەمپيونى، ازيا چەمپيونى باۋىرجان ءتالىپ پەن الەم چەمپيوناتىنىڭ كۇمىس جۇلدەگەرى ەركىن سايداقوۆتى ايتسا دا جەتىپ جاتىر.

مىنە، وسىنداي جۇلدىزدى بالۋانداردىڭ شوعىرىن دايىنداعان ايتۋلى ءتۋرنيردى شەبەرلەر شىعاراتىن ۇستاحانا دەۋگە بولادى. جارىستىڭ سالتاناتتى اشىلۋىنا كوپ جىلدار بويى وسى جارىستىڭ باتاگويى ءارى قولداۋ كورسەتىپ كەلگەن توققوجا ەستەنوۆپەن بىرگە وسى تۋرنيردەن ءوسىپ شىعىپ، ەلگە تانىلعان مۇزبالاق بالۋاندار، قازاق كۇرەسىنەن ەكى دۇركىن الەم چەمپيونى باۋىرجان ءتالىپ، قازاق كۇرەسىنەن الەم چەمپوناتىنىڭ كۇمىس جۇلدەگەرى ەركىن سايداقوۆ قاتىسىپ، سپورتشىلارعا جەڭىس تىلەدى.

مارتەبلى قوناقتاردىڭ اراسىندا الماتى وبلىسى ءماسليحاتىنىڭ توراعاسى قۋات بايقودجاەۆ پەن ىلە اۋداندىق ءماسليحاتىنىڭ توراعاسى مۇحيت كارىباەۆ ءوز سوزدەرىندە رايىمبەك باتىردىڭ جارىسى كوپتەگەن اتتارى ايگىلى بالۋانداردى جىلدار بويى ەلگە شىعارىپ كەلگەن قازاق كۇرەسىنىڭ قاينار باستاۋى ەكەندىگىن تىلگە تيەك ەتىپ، بالۋاندارعا ساتتىلىك تىلەپ، ۇيىمداستىرۋشىلارعا زور العىسىن ءبىلدىردى.

بۇل جارىسقا بيىلعى جىلى ەلىمىزدىڭ 12 وبلىسىنان 300-دەن استام ءجاسوسپىرىم بالۋان كەلىپ، باقتارىن سىناعان ەدى. سونىمەن ەكى كۇن بويى جاسوپىرىمدەر اراسىنداعى جان الىسىپ جان بەرىسكەن رەسپۋبليكالىق الامان جەكپە-جەكتە ۇزدىك شىققان بالۋانداردىڭ ەسىمدەرىن دە جاريا ەتە كەتسەك.

ەربولات باقىت ۇلى (پاۆلودار وبلىسى، 50 كگ)، ساعادات ەرباي (قىزىلوردا وبلىسى، 55 كگ)، نۇرداۋلەت ايداربەك ۇلى (تۇركىستان وبلىسى، 60 كگ)، نۇراسىل امانتۇر (الماتى وبلىسى، 65 كگ)، ەرتارعىن اسقات ۇلى (قاراعاندى وبلىسى، 70 كگ)، ديدار قۇلماحان (تۇركىستان وبلىسى، 76 كگ)، بەكزات قوعايبەك (جەتىسۋ وبلىسى، 82 كگ)، سۇلتان ءتۇردالى (الماتى  قالاسى، 90 كگ) مەن 90 كەلىدەن اسا سالماقتا كۇرەسكەن الماتى وبلىسىنىڭ بالۋانى ءنۇرالى  الىبەكوۆ جارىس جەڭىمپازى اتاندى.

راسىمەندە باتىر بابامىزدىڭ اتىنداعى بۇل بەلدەسۋ  كوپتەگەن جىلدان بەرى جاس تالانتتارعا اقجولتاي جارىس بولىپ كەلەدى. سوندىقتاندا قازاق كۇرەسىنىڭ دارىندى جاستارى بۇل تۋرنيرگە ايىرىقشا دايىندالادى.

جالپى، قازىر ەلىمىزدىڭ ءار ايماعىندا جاستارىمىزدىڭ قازاق كۇرەسىنە دەگەن قۇلشىنىسى كۇن ساناپ ءوسىپ كەلەدى. وسى قارقىننان تانباساق ۇلتتىق كۇرەسىمىز ازيا ويىندارىنىڭ باعدارلاماسىنان ورىن الاتىنىنىندا ءشۇبا جوق.

 

اقىن ورداباي ۇلى،

الماتى وبلىسى،

ىلە اۋدانى،

وتەگەن باتىر اۋىلى