Batyrdyń rýhyna arnalǵan beldesý

Bıyl qazaq kúresinen jasóspirimder arasynda batyr babamyz Raıymbek Hangeldiuly atyndaǵy dástúrli respblıkalyq jarys 25-ret uıymdastyryldy. Bul jarys qazaq kúresiniń elimizde damýyna zor úlesin qosyp kelgen tartysty dodanyń biri bolyp sanalady.

Tól kúresimizden búginde álem, Azııa chempıonattarynda el namysyn qorǵap júrgen kóptegen balýan osy jarysta kúresip, esimderi elge tanylǵan dese artyq bolmas.

Qazaqtyń sahara keń dalasy qanshama tarıhty qoınyna qushyp jatyr deseńizshi. Osynaý baıtaq jerimizdi syrtqa jaýdan qorǵap qalý úshin qanshama jaýjúrek batyrlarymyz qan maıdanda jandaryn qurban etti. Sonaý tarıhymyzdyn aqtańdaq betterin aqtarǵanda elimizdi naızanyń ushymen, bilektiń kúshimen qorǵap aman saqtap qalǵan erjúrek batyrlardyń ishinde Raıymbek babamyzdy erekshe aıtatynymyz belgili. Al sol Raıymbek batyrdyń rýhyna arnalyp elimizde qazaq kúresinen jasóspirimder arasynda dástúrli jarys qazaq kúresiniń alyptaryn elge tanyltyp kelgen alaman jarys bolyp sanalady.

Mysaly, Raıymbek batyrdyń atynda ótkiziletin sport is-sharalaryn aıtqanda, mindetti túrde qazaq kúresinen jyl saıyn ótkizip kelgen dástúrli respýblıkalyq jarysty tilge tıek etemiz. Osy berekeli týrnırge áli de bolsa janjaqty qoldaý kórsetilmeı otyrǵany azdap ókinetin jáı.

Janymyzǵa jat golf, kerlıng, tennıs sııaqty sport túrlerine shen-shekpeni joǵary aǵalarymyz baryn aıamaı salyp kómek berip jatady. Al ózimizdiń tól kúresimizge kelgende tómen qarap qalatyndary nelikten ekenin bile almaı dal bolasyń. Iá, bul aıtqan nazymyz ulttyq kúreske, qamqorlyq joǵarydan bolyp jatsa nur ústine nur bolmaq edi degen sóz.

Mine, batyr baba Raıymbektiń atynda kezekti dúbirli jarys babanyń rýhyn qurmettegen keıbir janashyr azamattardyń arqasynda jalaýyn qaıta kóterdi. Bir jarysty respýblıkalyq deńgeıge kóterip, qanshama jyl boıy úzbeı uıymdastyrý ońaıǵa soqpaıtyny málim. Degenmende Qazaqstan Respýblıkasyna eńbegi sińgen jattyqtyrýshy, Ile aýdany Jasóspirimder men sport mektebiniń dırektory, Raıymbek babanyń urpaǵy Qapar Raýanov syndy ulttyq kúresimizdiń janashyrynyń arqasynda atalmysh alaman doda О́tegen batyr aýylyndaǵy Ile aýdanynyń Balalar men jasóspirimder sport mektebinde bıyl 25-ret jalaýyn kóterip otyr.

Al, osyndaı jasópirimder arasyndaǵy tartysty ótip kelgen jekpe-jekten qanshama balýandar qanattaryn qamdap, buǵanasy bekip shyqty. Búginde qanshama qyranbalaq jastúlektiń búginde aty elimizge tanyldy! Sonyń biri — qazaq kúresinen eki dúrkin álem chempıony, Azııa chempıony Baýyrjan Tálip pen álem chempıonatynyń kúmis júldegeri Erkin Saıdaqovty aıtsa da jetip jatyr.

Mine, osyndaı juldyzdy balýandardyń shoǵyryn daıyndaǵan aıtýly týrnırdi sheberler shyǵaratyn ustahana deýge bolady. Jarystyń saltanatty ashylýyna kóp jyldar boıy osy jarystyń batagóıi ári qoldaý kórsetip kelgen Toqqoja Estenovpen birge osy týrnırden ósip shyǵyp, elge tanylǵan muzbalaq balýandar, qazaq kúresinen eki dúrkin álem chempıony Baýyrjan Tálip, qazaq kúresinen álem chemponatynyń kúmis júldegeri Erkin Saıdaqov qatysyp, sportshylarǵa jeńis tiledi.

Mártebli qonaqtardyń arasynda Almaty oblysy máslıhatynyń tóraǵasy Qýat Baıqodjaev pen Ile aýdandyq máslıhatynyń tóraǵasy Muhıt Káribaev óz sózderinde Raıymbek batyrdyń jarysy kóptegen attary áıgili balýandardy jyldar boıy elge shyǵaryp kelgen qazaq kúresiniń qaınar bastaýy ekendigin tilge tıek etip, balýandarǵa sáttilik tilep, uıymdastyrýshylarǵa zor alǵysyn bildirdi.

Bul jarysqa bıylǵy jyly elimizdiń 12 oblysynan 300-den astam jasóspirim balýan kelip, baqtaryn synaǵan edi. Sonymen eki kún boıy jasópirimder arasyndaǵy jan alysyp jan berisken respýblıkalyq alaman jekpe-jekte úzdik shyqqan balýandardyń esimderin de jarııa ete ketsek.

Erbolat Baqytuly (Pavlodar oblysy, 50 kg), Saǵadat Erbaı (Qyzylorda oblysy, 55 kg), Nurdáýlet Aıdarbekuly (Túrkistan oblysy, 60 kg), Nurasyl Amantur (Almaty oblysy, 65 kg), Ertarǵyn Asqatuly (Qaraǵandy oblysy, 70 kg), Dıdar Qulmahan (Túrkistan oblysy, 76 kg), Bekzat Qoǵaıbek (Jetisý oblysy, 82 kg), Sultan Turdáli (Almaty  qalasy, 90 kg) men 90 keliden asa salmaqta kúresken Almaty oblysynyń balýany Nuráli  Álibekov jarys jeńimpazy atandy.

Rasymende batyr babamyzdyń atyndaǵy bul beldesý  kóptegen jyldan beri jas talanttarǵa aqjoltaı jarys bolyp keledi. Sondyqtanda qazaq kúresiniń daryndy jastary bul týrnırge aıyryqsha daıyndalady.

Jalpy, qazir elimizdiń ár aımaǵynda jastarymyzdyń qazaq kúresine degen qulshynysy kún sanap ósip keledi. Osy qarqynnan tanbasaq ulttyq kúresimiz Azııa oıyndarynyń baǵdarlamasynan oryn alatynynynda shúbá joq.

 

Aqyn ORDABAIULY,

Almaty oblysy,

Ile aýdany,

О́tegen batyr aýyly