تۋريزم جانە سپورت ءمينيسترى ەربول مىرزابوسىنوۆ جەڭىل اتلەتيكادان بيىلعى جازعى ازيا ويىندارىنا قاتىسقان ياسمينا توقسانباەۆاعا قاتىستى جاعدايعا پىكىر ءبىلدىرىپ، سپورتشىعا كورسەتىلگەن قولداۋ تۋرالى ايتتى.
«ياسمينا توقسانباەۆانىڭ ماسەلەسى بويىنشا جەڭىل اتلەتيكا فەدەراتسياسى سپورتتىق اربيتراجدىق سوتقا (CAS) ءوتىنىش جولداعانى راس. دەگەنمەن بۇل جەردە ەڭ باستىسى – الداعى ۋاقىتتا مۇنداي جاعدايعا جول بەرمەۋ. بۇل ماسەلەدە ءبىر ادامدى كىنالاۋ قيىن، سوندىقتان ءبارىنىڭ دە كىناسى بار. بىراق ەڭ باستىسى – سپورتشىلاردى قولداۋ قاجەت. الدىمىزدا وليمپيا ويىندارى كەلە جاتىر. ياسمينانىڭ ازيا ويىندارىنداعى ناتيجەسى وليمپيادادا جۇلدە الۋعا مۇمكىندىك بەرەتىن كورسەتكىش. سوندىقتان فەدەراتسيا تاراپىنان بيۋدجەتتەن تىس قاراجات ەسەبىنەن وعان پاتەر كىلتى تابىس ەتىلدى. سونداي-اق ونىڭ بۇعان دەيىن كورسەتكەن جاقسى ناتيجەلەرى ەسكەرىلىپ، مەملەكەتتىك ناگراداعا ۇسىنىلدى. ءبىزدىڭ باستى ماقساتىمىز – سپورتشىلاردى جان-جاقتى قولداۋ»، دەدى مينيستر.
بۇعان دەيىن ياسمينا توقسانباەۆا وڭتۇستىك كورەيانىڭ گۋمي قالاسىندا جەڭىل اتلەتيكادان وتكەن ازيا چەمپيوناتىندا قازاقستان قۇراماسىنىڭ قورجىنىنا العاشقى جۇلدەنى اكەلىپ، قولا مەدالدى جەڭىپ العان بولاتىن. ال جاقىندا جاپونيانىڭ ايچي پرەفەكتۋراسى مەن ونىڭ ورتالىعى ناگويا قالاسىندا جالاۋى جەلبىرەگەن جازعى ازيا ويىندارىندا ول مارەگە ءبىرىنشى كەلىپ، چەمپيون اتانعانىمەن، ونىڭ ناتيجەسى قارسىلاستارىنىڭ نارازىلىعىنان كەيىن ەسەپكە الىنبادى. ياسمينا توقسانباەۆانىڭ قارسىلاستارى ونىڭ اياق كيىمىنە شۇيلىگىپ، پروتەست جازعان بولاتىن. ال جارىستى ۇيىمداستىرۋشىلار سپورتشىنىڭ كروسسوۆكيىنە رۇقسات بەرسە دە پروتەست بەرگەن ەلدەردىڭ جاعىنا شىعىپ، قازاقستان سپورتشىسىن جۇلدەدەن ايىرىپ تاستادى.
داستان كەنجالين،
استانا

SportPress.kz قازاقستان سپورت جاڭالىقتارى