Japonııanyń Aıchı prefektýrasy men Nagoıa qalasynda tirek-qımyl apparaty, kórý qabileti zaqymdanǵan jáne zııatkerlik damý erekshelikteri bar sportshylar arasynda ótken V Azııa para oıyndary márege jetti.
Bıylǵy V Azııa para oıyndarynda ulttyq qurama 50 medal – 12 altyn, 16 kúmis, 22 qola júlde enshilep, jalpykomandalyq esepte toǵyzynshy orynǵa turaqtady. Bir aptaǵa sozylǵan jarys barysynda jerlesterimiz para dzıýdo, para velosport, para júzý, ózge de sport túrlerinen júldeli oryndarǵa ıe boldy.
Para Azıadanyń sońǵy kúnderi Aqtolqyn Seıilbekova, Zarına Raıfova, Naıl Ermuhanbet, Ibrahım Nurmahanuly, Beksultan Qulmyrza, Jurqamyrza Shúkirbekov pen Anastasııa Kalaýs altyn medal jeńip alyp, el qorjynynyń tolyǵýyna úles qosty.
Para dzıýdodan Janbota Amanjol kúmis medal jeńip aldy. Ǵalymjan Smaǵululy, Ermek Nurqabaev, Baǵlanbek Ońalbek, Erlan О́tepov, Álfııa Tilekqabyl, Daıana Fedosova, Aıala Mereke qola júldeger atandy. Bul sport túrinen sportshylar 5 altyn, 1 kúmis, 7 qola medal ıelenip, jalpy sany 13 júldege ıe boldy.
Para júzýden 1 altyn, 5 kúmis, 4 qola medal jeńip alyp, jalpy sany 10 júldeni ıelendi. Sporttyń osy túrinen Dıas Kenjebek S10 klasynda 100 metrge arqamen júzýden chempıon atansa, 100 metrge erkin júzý, 200 metrge keshendi júzý qashyqtyqtarynda kúmis, 100 metrge batterflıaı ádisimen júzýden qola medal jeńip aldy.
Álı Turǵanbekov SB4 klasynda 100 metrge brass ádisimen júzýden kúmis júldege ıe boldy. Sonymen birge ol qurama sapynda 4×50 metrge aralas keshendi estafetaǵa qatysyp, taǵy bir kúmis medal ıelendi. Bul jarysta ulttyq qurama namysyn Álı Turǵanbekovpen birge Natalıa Zvıagıneva, Zúlfııa Ǵabıdýllına, Aısultan Qulqaev pen Sııazbek Dalıev qorǵady.
Elimizdiń quramasy 4×50 metrge erkin stıldegi aralas estafetada da kúmis júldeger atandy. Bul synda Natalıa Zvıagıneva, Aısultan Qulqaev, Sııazbek Dalıev pen Zúlfııa Ǵabıdýllına jarys jolyna shyqty. Sondaı-aq Roman Potapov, Vıktor Volkov pen Alına Sınelnıkova qola medal jeńip alyp, ulttyq quramanyń júldeler sanyn tolyqtyrdy.
Para velosporttan el quramasy 4 altyn, 4 kúmis, 1 qola medal enshiledi. Naıl Ermuhambet erler arasyndaǵy B klasynda tasjoldaǵy toptyq jarys pen jeke ýaqytqa jarysýdan eki altyn medal jeńip aldy. Anastasııa Kalaýs ta áıelder arasyndaǵy osy eki baǵdarlamada chempıon atandy. Sonymen qatar ol trektegi 4000 metrge jeke qýalaý jarysynda kúmis júldege ıe boldy. Kırıll Ilıýkevıch tasjoldaǵy toptyq jarys pen jeke ýaqytqa jarysýdan eki kúmis, trektegi 4000 metrge jeke qýalaý jarysynda qola medal jeńip alsa, Juldyz Qaınarova tasjoldaǵy toptyq jarysta kúmis júldeger atandy.
Para paýerlıftıngten sportshylarymyz 1 altyn, 2 kúmis, 3 qola medal aldy. Eki márte paralımpıada oıyndarynyń chempıony, dańqty Davıd Degtıarev 54 kg salmaq dárejesinde 192 kg kóterip, Azııa para oıyndarynyń rekordyn jańartty. Tursynaı Qabyl 41 kg, Alına Solodýhına 45 kg-ǵa deıingi salmaq dárejesinde kúmis medal ıelendi. Stanıslav Shakıev pen Aıjan Berimqulova qola júldeger atandy. Sonymen qatar Erbolat Káribaı, Davıd Degtıarev, Stanıslav Shakıevten quralǵan Qazaqstan erler quramasy komandalyq jarysta qola medalǵa qol jetkizdi.
Para jeńil atletıkadan jerlesterimiz 2 kúmis, 2 qola medal jeńip aldy. Islam Sálimov T13 klasynda uzyndyqqa sekirýden, Dastan Muqashbekov F36 klasynda ıadro laqtyrýdan kúmis júldeger atansa, Ivan Zaleznıak F36 klasynda, Mahambet Serikqalıev F53 klasynda ıadro laqtyrýdan qola medalǵa ıe boldy.
Aısulý Súleımenova áıelder arasynda 100 metrge júgirýden T62 klasynda 16,18 sekýnd nátıje kórsetip, Azııa rekordyn jańartty. Para ústel tennısinen el qorjyny 4 qola medalmen tolyqty.
Para sadaq atýdan 1 kúmis, 1 qola júlde buıyrdy. Erler arasyndaǵy W1 klasynda juptyq synda Nurshat Tóleýqasym men Temirlan Seıitkamal kúmis júldeger atandy. Bul – elimizdiń Azııa para oıyndary tarıhyndaǵy para sadaq atýdan alǵashqy júldesi. Sonymen qatar Nurshat Tóleýqasym W1 klasyndaǵy jekeleı jarysta qola medal jeńip aldy.
Para oq atýdan Erkin Ǵabbasov R1 baǵdarlamasynda, SH1 klasynda 10 metr qashyqtyqtan pnevmatıkalyq vıntovkamen atý saıysynda chempıon atandy.
Para taekvondo, bochcha, arbadaǵy tennısten synǵa túsken sportshylarymyz júldeli oryndarǵa ıe bola almady.
Týrızm jáne sport mınıstrliginiń málimdeýinshe, bıylǵy Azııa para oıyndary ulttyq qurama úshin nátıjeli boldy. 2023 jyly Qytaıdyń Hanchjoý qalasynda ótken IV oıyndarmen salystyrǵanda sportshylarymyz jalpykomandalyq esepte eki orynǵa kóterildi. Qytaıda 8 altyn, 12 kúmis, 21 qola medal jeńip alyp, jalpykomandalyq esepte 11-oryn ıelengen bolatyn. Sondaı-aq bıyl el quramasy Azııa para oıyndarynyń tarıhynda alǵash ret para ústel tennısi men para sadaq atýdan medal jeńip aldy. Sportshylarymyz birneshe rekord jasady.
Erkin Ǵabbasov pen Davıd Degtıarev Azııa para oıyndarynyń rekordtaryn jańartsa, Dıas Kenjebek pen Aısulý Súleımenova óz klastarynda Azııa rekordyn jasady. Bul jetistikter – eń aldymen, memleket tarapynan para sportty damytýǵa kórsetilip otyrǵan qoldaýdyń, sportshylarymyzdyń tabandylyǵy men qajyrly eńbeginiń, jattyqtyrýshylardyń júıeli jumysy men tyńǵylyqty daıyndyqtyń nátıjesi.
Para Azıadanyń jabylý saltanatynda elimizdiń kók týyn kórkem gımnastıkadan jasóspirimder arasyndaǵy álem chempıony, 16 jastaǵy Aqmaral Erekesheva alyp shyqty.
Bıylǵy Para Azıadada Qytaı quramasy jalpykomandalyq esepte birinshi orynǵa ıe boldy. Olar 207 altyn, 117 kúmis, 111 qola – barlyǵy 435 medal jeńip aldy. Ekinshi oryndy 63 altyn, 60 kúmis, 62 medalmen Japonııanyń sportshylary ıelendi. Úshinshi orynǵa 45 altyn, 49 kúmis, 52 qola júlde alǵan О́zbekstan ókilderi kóterildi.
Kelesi VI Azııa para oıyndary 2030 jyly 4–19 qarasha aralyǵynda ekinshi márte Qatar astanasy Dohada ótedi.
SportPress.kz Qazaqstan sport jańalyqtary