قازاق كۇرەسىنىڭ جەلبىرەگەن جالاۋى

سەرىك توكەەۆ اعامىزدى بىزدەن ارتىق بىلەتىن ادامدار كوپ قوي. ونى وزىمەن ءومىر بويى ۇزەڭگىلەس بولىپ، سىرلاسىپ جۇرگەن ارىپتەستەرى جاقسى بىلەدى. ال ءبىزدىڭ سەرىك اعامەن تانىستىعىمىزعا 13 جىلداي عانا ۋاقىت بولىپتى. سودان بەرى ەكەۋمىز اعالى-ءىنىلى بولىپ سىيلاسىپ كەلەمىز.

سەكەڭمەن تانىستىعىم 2004 جىلى باستالعان. بۇل – افينا وليمپياداسى وتەتىن جىل بولاتىن. سول جىلى «ەگەمەن قازاقستان» گازەتىندە ىستەپ جۇرگەنىمدە سپورتشىلاردىڭ ءتورت جىلدا ءبىر اينالىپ كەلەتىن دۇرمەكتى دوداعا دايىندىعى تۋرالى ماتەريال ازىرلەۋ كەرەك بولعان سوڭ، شتاتتاعى ۇلتتىق كوماندالار جانە سپورت رەزەرۆى ديرەكتسياسىنا بارعان ەدىم. ول كەزدە ديرەكتسيا پۋشكين كوشەسىنىڭ بويىندا ورنالاسقان ەدى. مەكەمەگە كەلسەم، ءوزى ەكى قاباتتى عيماراتتا اياداي بولمەلەر كوپ ەكەن. سونىڭ بىرىندە سەرىك ادامبولسىن ۇلى دا وتىراتىن. مەنى سەكەڭ جىلى قارسى الىپ، ەكەۋمىز ءبىراز ۋاقىت سپورت تۋرالى اڭگىمەلەستىك. كەيىن ونىڭ سۇحباتى گازەتكە شىقتى.

مىنە، سودان بەرى اعامىزبەن ءجيى كەزدەسىپ، ونىڭ ماقالالارى مەن ينتەرۆيۋلەرىن ەلىمىزدىڭ باس باسىلىمىنىڭ بەتتەرىندە شىعارىپ تۇردىق. ول كىسى قاجىمۇقان مۇڭايتپاس ۇلى اتىنداعى سپورتتا دارىندى بالالارعا ارنالعان مەكتەپ-ينتەرناتىن باسقارىپ تۇرعاندا دا ارامىز الىستاعان جوق. كەرىسىنشە، ودان سايىن ارامىز جاقىنداپ، سىيلاسىپ كەتتىك. ويتكەنى، سەرىك توكەەۆ سياقتى ۇلكەن جۇرەكتى، ءوز ءىسىنىڭ بىلىكتى ماماندارى قاي كەزدە بولسا دا قاي جەردە جۇرسە دە قۇرمەتكە لايىق. جالپى، سەكەڭ تۋرالى كوپ ايتۋعا بولادى. سونىڭ ءبىرى – ونىڭ ازاماتتىعى مەن ادامدىق قاسيەتى. مۇنى مەن عانا ەمەس، باسقا دا كوپتەگەن ادامدار ايتا الادى. ءوزى ومىردە ءبىر كىسىلىك، مىڭ كىسىلىك دەگەن ادامدار بولادى. سەرىك اعا سونىڭ ەكىنشىسىنە جاتادى. بۇل كىسىنىڭ ءوز ءىسىن ۇرشىقشا ءيىرىپ اكەتەتىن ىسكەرلىگى، پاراساتتىلىعى، تەكتىلىگى، ادامدى الالامايتىن، بىرەۋگە رەنجىسە، وكپەلەسە، كەڭ جۇرەگىمەن ءبارىن كەشىرە بىلەتىن قاسيەتتەرى كوپكە ۇلگى بولسا دەيمىن. ال سەكەڭنىڭ ءوزى قۇرىپ، وننان استام جىلداي باسقارعان دۇنيەجۇزىلىك قازاق كۇرەسى فەدەراتسياسىنىڭ ءتول كۇرەسىمىزدى دامىتۋداعى جۇمىسىن اۋىز تولتىرىپ ايتا الامىز.

قازىر قازاق كۇرەسىن جەر-ءجۇزىنىڭ ءبارى بىلەدى. كەزىندە ۇلتتىق سپورتىمىزدىڭ ءبىراز ۋاقىت تاسادا قالىپ، ساحنا تورىنە شىعا الماي قالعانىن بىلەسىزدەر. بۇل كۇرەسىمىز سەكەڭ فەدەراتسيا قۇرىپ، جۇمىسىن باستاعاننان كەيىن ەكىنشى تىنىسىن اشىپ، بۇگىندە تورتكۇل دۇنيەنىڭ ءتورت بۇرىشىنا تۋىن تىگىپ جاتىر. وسى كەزگە دەيىن قانشاما الەم، ەۋروپا، ازيا، افريكا، امەريكا چەمپيوناتتارى وتسە، سونىڭ ءبارى سەرىك اعامىز بەن ونىڭ جانىندا جۇرگەن ازاماتتاردىڭ ارقاسى.

سەكە، مەن كوپ سويلەمەيىن، باسقا ادامداردىڭ دا تىلەكتەرىنە ورىن قالدىرايىن. مەنىڭ سىزگە دەگەن قۇرمەتىمدى ءوزىڭىز جاقسى بىلەسىز. ءبىر عانا ايتارىم، باسىڭىز امان بولسىن! وتباسىڭىزبەن باقىتتى ءومىر ءسۇرىڭىز! ويتكەنى، ءسىز سياقتى تاۋ تۇلعالى، تەكتى ازاماتتار تۇرعاندا قازاق سپورتى، قازاق ەلى ەشكىمگە ەشقاشان ەسە جىبەرمەيدى. الپىس جاستى تال ءتۇس دەيدى ەكەن. ەندەشە، وسى اسقارالى الپىس جاسىڭىزعا تاعى دا وسىنشاما جاس قوسىپ، ماڭ-ماڭ باسىپ، قۋانىشتارىڭىزعا مارقايىپ جۇرە بەرىڭىز!

ەڭ ىزگى تىلەكپەن، ىنىلىك ىلتيپاتپەن قازاقستان سپورت ءباسپاسوزى قاۋىمداستىعى استانا قالالىق فيليالىنىڭ توراعاسى، www.sportpress.kz اقپاراتتىق-ساراپتامالىق سپورت سايتىنىڭ باس رەداكتورى داستان كەنجالين