سەناتور سپورتتىڭ جاستار دەنساۋلىعىنا زيان تيگىزىپ جاتقانىن ايتتى

سەنات دەپۋتاتى عالياسكار سارىباەۆ جاس سپورتشىلاردىڭ دەنساۋلىعىنا الاڭداۋشىلىق ءبىلدىردى.

ول دەپۋتاتتىق ساۋالىن پرەمەر-مينيستر ءاليحان سمايىلوۆقا جولدادى. ونىڭ ايتۋىنشا، بۇگىندە سپورت فەدەراتسيالارى ءوز بەتىنشە اشىلادى ءارى رەسپۋبليكالىق بىرلەستىكتەردەن وقشاۋ بولادى. سونىڭ سالدارىنان ولاردىڭ باپكەرلەرى بالالاردى جاتتىعۋعا تارتىپ، دەنساۋلىعىنا زيان تيگىزۋى مۇمكىن.

«بۇگىندە ەلىمىزدەگى جاتتىقتىرۋشىلار بالالاردى ولاردىڭ دەنەسى فيزيكالىق جانە پسيحولوگيالىق تۇرعىدان اۋىر جۇكتەمەلەرگە ءالى دايىن ەمەس كەزىنەن باستاپ، سپورتپەن شۇعىلدانۋعا تارتۋى ۇردىسكە اينالىپ كەتتى. مۇنداي جاعداي اسىرەسە جەكپە-جەك ونەرىندە كەڭ تارالعان. ول جاس ۇرپاقتىڭ دەنساۋلىعىنا تەرىس اسەر ەتەدى»، — دەدى عالياسكار سارىباەۆ سەناتتىڭ جالپى وتىرىسىندا.

دەپۋتات بۇرىن زاڭدا بالالار مەن جاسوسپىرىمدەردىڭ جىلىنا قانشا جارىسقا قاتىسۋىنا بولاتىنىن رەتتەيتىن نورمالار بولعانىن اتاپ ءوتتى.

«قازىرگى ۋاقىتتا قازاقستاندا مۇنداي نورمالار قابىلدانباعان. وسىنداي جاعدايلار – فەدەراتسيالاردىڭ ءوز بەتىمەن اشىلىپ، جۇمىس ىستەۋدىڭ اسەرى. ەلىمىزدە ءبىر عانا كاراتەدەن ءبىز بىلەتىن 22، تاەكۆوندودان 6، ارالاس جەكپە-جەكتەن (مما) 4 رەسپۋبليكالىق فەدەراتسيا بار»، — دەدى عالياسقار سارىباەۆ.

سەناتور وسىعان بايلانىستى بالالار اعزاسىنىڭ ەرەكشەلىگىن ەسكەرىپ، تاربيە-جاتتىعۋ ادىستەمەسىن دايىنداۋدى ۇسىندى.

سونداي-اق ول كاسىبي سپورت كلۋبتارىن، بارلىق سپورت ءتۇرىنىڭ سپورتشىلارىن، سپورت تۇرلەرى فەدەراتسيالارىنداعى جاتتىقتىرۋشىلار مەن تورەشىلەردى تىركەۋ كەرەگىن ءارى ولاردىڭ قىزمەتىن ليتسەنزيالاۋ ماڭىزدى ەكەنىن اتاپ ءوتتى.

داۋرەن ەربولات،

استانا