بوروديۋك: «رۋمىنياعا قارسى جاڭا تاكتيكامەن وينايمىز»

قازاننىڭ 5-ىنەن 6-سىنا قاراعان ءتۇنى قازاقستان ۇلتتىق قۇراماسى 2018 جىلعى الەم چەمپيوناتىنىڭ ىرىكتەۋ كەزەڭى اياسىندا سىرت الاڭدا رۋمىنيا كومانداسىمەن كەزدەسەدى. بۇگىن وسىعان وراي ۇلتتىق قۇرامامىزدىڭ باس جاتتىقتىرۋشىسى الەكساندر بوروديۋك پەن شابۋىلشى سەرگەي حيجنيچەنكونىڭ قاتىسۋىمەن ءباسپاسوز ءماسليحاتى ءوتتى.

سەرگەي حيجنيچەنكو:

— ءبىز ءۇشىن ماڭىزدى ماتچ. ۇلتتىق قۇراما ءۇشىن جانىمىزدى سالامىز. جانكۇيەرلەرىمىزدى قۋانتقىمىز كەلەدى. رۋمىنيادا جاڭا باپكەر، قۇرامالارىنا جاڭا ويىنشىلار قوسىلدى. بىراق بۇل ءبىز الاڭدايتىن نارسە ەمەس. جاقسى ناتيجە كەرەك ەكەنى تۇسىنىكتى. رۋمىنيا جاقسى كوماندا، ءوز الاڭىندا جاقسى وينايدى. ءبىز دە ايانىپ قالمايمىز، جاقسى ويناۋعا تىرىساتىن بولامىز.

الەكساندر بوروديۋك:
— ەكى كوماندانىڭ دا وزدەرىنشە دالەلدەيتىن نارسەلەرى بار. رۋمىنيادا جاڭا باپكەر. بۇل ونىڭ العاشقى ويىنى. سول سەبەپتى ول ءۇشىن قازاقستانمەن ويىن  ماڭىزدى. قىزىق ويىن بولادى دەپ ويلايمىن.

كسرو كەزىندە رۋمىنياعا قارسى وينادىم. سول ويىندار ەسىمدە جاقسى قالىپتى. ول كەزدە مىقتى قۇراما بولاتىن. قازىر دە بۇل ەلدە جاقسى ويىنشىلار كوپ. سوندىقتان ەكى جاق تا وزدەرىن بارىنشا كورسەتەتىن بولادى.

ءبىزدىڭ بىرنەشە ويىنشىمىز جاراقاتتارىنا بايلانىستى ويناي المايدى. بىراق فۋتبولدا اۋىسپايتىن ويىنشىلار بولمايدى. ءبىر جاعىنان باسقالارعا وزدەرىن كورسەتۋگە جاقسى مۇمكىندىك  بولادى. وسى مۇمكىندىكتى ءتيىمدى پايدالانسا جاقسى. وزدەرىن كورسەتىپ، نەگىزگى قۇرامنىڭ ويىنشىلارىنا اينالۋعا تىرىسۋلارى كەرەك. تەك وزدەرى ءۇشىن ەمەس ءوز ەلدەرى ءۇشىن ويناۋلارى كەرەك.

چەمپيوناتتاعى تۋردان كەيىن ۇلتتىق قۇرامادا دايىندىققا، ويىن فيلوسوفياسىن سىڭىرۋگە 5-6 كۇن كەرەك. سول جاعىنان كەمشىلىگىمىز بار. بىراق بارىنشا دايىندالدىق.

رۋمىنيا قۇراماسىندا جاڭا جاتتىقتىرۋشى، ونىڭ نە جوسپارلاپ وتىرعانىن بىلمەيمىز. ولاردا دا وزگەرىستەر بولاتىن سياقتى. قاۋىپتى ويىنشىلارى كوپ، ءار پوزيتسيادا مىقتى ويىنشىلارى بار.

ەرتەڭ وزگەشە تاكتيكامەن وينايمىز. تاكتيكالىق سحەمامىز ءازىر، توسىنسىي جاساۋعا دايىنبىز.

ارشات وراز

فوتو: ءىلياس وماروۆ،

بۋداپەشت (رۋمىنيا)