جەڭىل اتلەتيكا قاۋىمداستىعى رەسەيلىك سپورتشىلارعا قاتىستى مالىمدەمە جاسادى

دۇنيەجۇزىلىك جەڭىل اتلەتيكا قاۋىمداستىعى (World Athletics) رەسەيلىك سپورتشىلارعا قاتىستى مالىمدەمە جاسادى. قاۋىمداستىق رەسەيلىكتەردىڭ حالىقارالىق جارىستارعا قاتىسۋ ءۇشىن بەيتاراپ مارتەبەسىن ۇزارتاتىنىن ايتتى.

دۇنيەجۇزىلىك جەڭىل اتلەتيكا كەڭەسى قاراشا ايىنىڭ سوڭىندا ۇيىمداعى بۇكىلرەسەيلىك جەڭىل اتلەتيكا فەدەراتسياسىنىڭ (ARAF، – رەد.) مۇشەلىگىن توقتاتۋ مەرزىمىن ۇزارتتى. الايدا رەسەيلىك تاراپتىڭ قۇقىقتارىن قالپىنا كەلتىرۋ جونىندەگى جۇمىس توبى ARAF مارتەبەسىن 2023 جىلدىڭ ناۋرىز ايىندا قالپىنا كەلتىرۋدى ۇسىنعان.

رەسەي جەڭىل اتلەتيكا فەدەراتسياسىنىڭ 2023 جىلعا بەيتاراپ مارتەبەسىن بەرۋ تۋرالى وتىنىشىنە جەڭىل اتلەتيكا قاۋىمداستىعى «بەيتاراپ مارتەبە الۋ پروتسەسى دۇنيەجۇزىلىك جەڭىل اتلەتيكا كەڭەسى باسقا شەشىم قابىلداعانعا دەيىن جالعاسادى» دەپ جاۋاپ بەردى. 2022 جىلعا بەيتاراپ مارتەبەسى بار سپورتشىلار جارىستى جالعاستىرا الادى، – دەلىنگەن حابارلامادا.

كەڭەيتىلگەن تىزىمدەگى 50 سپورتشىنىڭ ءاربىر حالىقارالىق ستارتقا جازباشا تۇردە ARAF رۇقساتىن الۋى كەرەك ەكەنى اتاپ وتىلگەن.

2015 جىلعى قاراشادا بۇكىلرەسەيلىك جەڭىل اتلەتيكا فەدەراتسياسى دوپينگ داۋىنا بايلانىستى دۇنيەجۇزىلىك جەڭىل اتلەتيكا (ول كەزدە IAAF، – رەد.) مۇشەلىگىنەن ۋاقىتشا شەتتەتىلگەن بولاتىن.

داستان كەنجالين،

استانا