«Sápıevti de jattyqtyrǵan». Jasy 80-ge taıaǵan bapker balalarǵa boks úıretip júr

Qaraǵandy oblysynda qarttar úıinde tursa da balalardy jattyqtyryp júrgen bapker bar. Jas kezinde talaı shyńdy baǵyndyrǵan ol endi shákirtterin jetistikke jetelemek, dep habarlady «Habar 24» telearnasy.

Jasy 80-ge taıasa da sportty serik etken Esirkep Jaqsybaev ózi turyp jatqan Shahan kentinde mektep oqýshylaryna bokstan sheberlik saǵatyn ótkizip júr. Ol kúndelikti 2 saǵat ýaqytyn sportqa arnaıdy. Bul – bala kezinen qalyptasqan ádeti. «QR eńbek sińirgen jattyqtyrýshysy» degen sporttyq dárejesi bar.

Ony Shahan kentinde bári biledi. Tipti Serik Sápıevti de jattyqtyrǵan. Bir ereksheligi, ol bizge boksshy óz talpynysy bar namysty, myqty adam bolý kerek dep úıretti, — deıdi jergilikti oqýshy Baqyt Asan.

Esirkep Jaqsybaev burynǵy Qaraǵandy dene shynyqtyrý tehnıkýmynyń túlegi. Odan soń sport sheberi atanǵan ol Qazaq KSR birinshiliginiń júldegeri, respýblıkalyq jarystardyń jeńimpazy bolǵan. Qysqasy, jas shaǵynda Eýropa elderiniń rıngterinde jasyndaı jarqyldaǵan.

Shákirtterim kóp boldy. Ekeýi álemdik týrnırlerden jeńiske jetti. Solarmen maqtanamyn. Men ózim qarttyq degendi bilmeımin, bar ómirimdi sport salasyna arnadym. Qazir de osy sporttyń arqasynda aýrý-syrqaýdy bilmeımin. Adam kóp júrý, kóp júgirýi kerek, — deıdi Esirkep Jaqsybaevtyń ózi.

Bylǵary qolǵap sheberiniń aqyndyǵy da bir tóbe. Sport zalynan shyqqan soń qalyń dápterin qolǵa alady eken. Týǵan jerge degen mahabbatyn, mamandyǵyna degen adaldyǵyn qarııa óleń etip orys tilinde jazady. Budan bólek, taǵdyrlastaryn da sportpen, bımen aınalysýǵa úgitteıdi.

Bıdi óte qatty jaqsy kóredi. Sosyn óleń shyǵarǵandy unatady. Kúnde tańerteń osy mekmeden bastap, Shahtınsk qalasyna deıin júgirip baryp keledi. Esirkep Qamaıulynyń týǵan inisi bar. Ol osynda kisi jıi kelip turady, — deıdi «Shahtınsk qalasynyń arnaýly áleýmettik kyzmet kórsetý ortalyǵy» KMM dırektory Erlan Jáýkimov.

Jattyqtyrýshy 2011 jyldan beri qarttar úıinde eken. Bir uly qaza tapqan, al qyzy shetelde turady. Qazir qarttar úıinde ózimen taǵdyrlas 90 adam bar.

Erkeǵalı BEISENOV,

ASTANA