قاجىمۇقان باتىر بابا جولىن جالعاعان جارىستىڭ جالاۋى جەلبىرەدى

جۋىردا عانا شىرايلى شىمكەنت قالاسىندا «ALASH —  PRIDE FC» پروموۋشەنى ورتالىعى قولداۋىمەن «Alash pride – Shymkent» جاۋىنگەرلىك كلۋبىنىڭ پرەزيدەنتى ءالىمجان بەكالى ۇلى بەكتاەۆ باستاعان ۇجىمىنىڭ ۇيىمداستىرۋىمەن مەرەيلى «ALASH PRIDE FC – 80» اتتى حالىقارالىق ارالاس جەكپە — جەك كەشى ءوتتى.

بۇل دودادا ەل نامىسىن قورعاپ شىققان باتىرلارىمىز ەل ءۇمىتىن اقتاپ، جەڭىس تۇعىرىنان كورىنە ءبىلدى.

جالپى «الاش پرايد» پروموۋتەرلىك كومپانياسىنىڭ نەگىزىن قالاۋشى پرەزيدەنتى، قازاقستان رەسپۋبليكاسىنىڭ قۇرمەتتى سپورت قىزمەتكەرى دانيار الدابەرگەن ۇلى قاسقاراۋوۆتىڭ ەرەجەسىز جەكپە — جەككە سىڭىرگەن ەڭبەگى ەرەكشە. دانيار الدابەرگەن ۇلى تەك ەرەجەسىز جەكپە — جەككە عانا ەمەس، سونىمەن قاتار قازاق سپورتىنىڭ تورتكۇل دۇنيەگە تانىلۋىنا سەبەپشى بولدى. قاراپايىم عانا اۋىلدان شىققان قازاق بالاسى تەك قانا قازاق دالاسىن ەمەس، كۇللى الەمدى مويىنداتىپ، ەل نامىسىن قورعاعان تالاي باتىرلاردى دايىنداپ شىقتى. ولاردىڭ ساپىندا ەل ماقتانىشتارىمىز ارمان وسپانوۆ، قۋات حاميتوۆ، ارمان ءاشىموۆ، ارتەم رەزنيكوۆ، ەۆگەني ەگەمبەرديەۆ، قايرات احمەتوۆ، ەرجان ەستانوۆ، دامير يسماعۇلوۆ سىندى باتىرلارىمىز شارشى توپقا شىعىپ، شاشاسىنا شاڭ جۇقتىرماي جۇرگەن كىل جۇيرىكتەرگە اينالدى. سول ءداستۇردى جالعاستىرىپ، جاڭا ەسىمدەردى انىقتاپ، ولاردى التى الاشقا ايگىلەۋ ءۇشىن جىل سايىن «Alash pride fc» پروموۋتەرلىك ورتالىعى ەلىمىزدىڭ ءار وڭىرىندە ءتۇرلى حالىقارالىق سايىستار وتكىزىپ تۇرادى. سونىڭ ءبىرى شىمكەنت شاھارى «قاجىمۇقان مۇڭايتپاس ۇلى» اتىنداعى سپورت كەشەنىندە وتكەن باسەكەگە تولى دودا بولدى. بۇل سىندا دا جىگىتتەر وزدەرىنىڭ ەرلىكتەرىن تانىتىپ، جاقسى قىرىنان كورىنە ءبىلدى.

ءبىز دە وسى تاماشا كەشتىڭ قوناعى بولىپ، باتىرلارىمىزعا قولداۋ ءبىلدىرىپ، جانكۇيەرلىك تانىتىپ قايتتىق. قاجىمۇقان اتامىزدىڭ اتىمەن اتالعان سپورت كەشەنىندە باتىرلارىمىز بابا جولىن جالعاپ، اتامىزدىڭ اتىن تاعى دا ءبىر جاڭعىرتقانداي كۇي كەشتىك. رۋحىمىزدى وياتىپ، پاتريوتتىق سەزىمىمىزدى كوتەرە بىلگەن جىگىتتەرىمىزگە العىس ايتىپ، تەك جەڭىستى كۇندەرى جولىعايىق دەگىم كەلەدى. قازاق سپورتى جاساسىن، قازاق ەلىنىڭ جىگىتتەرى — جىگىتتەردىڭ تورەسى بولىپ تورىمىزدەن ورىن الىپ توبەمىزدى كوككە كوتەرەتىن كوڭىل كۇي سىيلاپ جۇرە بەرسىن!

قازاق ەلى جاساسىن بىرلىگى مەن ىنتىماعى جاراسقان!

جاندوس ايانبەك،

ەلدار جاقىپبەك،

شىمكەنت قالاسى