رىباكينا جاڭا جۇلدەگە ۇمىتكەر اتاندى

«ۋيمبلدون -2022» ءتۋرنيرىنىڭ جەڭىمپازى، Australian Open 2023 چەمپيوناتىنىڭ ءفيناليسى ەلەنا رىباكينا Laureus سىيلىعىنا ۇمىتكەر اتاندى.

تەننيسشى — «جىل سەرپىنى» جۇلدەسىنە ۇمىتكەر التى سپورتشىنىڭ ءبىرى. رىباكينادان باسقا بۇل نوميناتسياعا يسپاندىق كارلوس الكاراز (تەننيس)، فۋتبولدان ماروككو قۇراماسى، امەريكالىق ناتان چەن (مانەرلەپ سىرعاناۋ)، نيگەريالىق توبي امۋسان (جەڭىل اتلەتيكا) جانە تاعى ءبىر امەريكالىق سپورتشى سكوتتي شەففلەر (گولف) ۇسىنىلىپ وتىر.

Laureus World Sports Awards سىيلىعى ءبىر جىلدا ۇزدىك جەتىستىكتەرگە جەتكەن سپورتشىلارعا بەرىلەدى.

سىيلىق 1999 جىلدان بەرى بەرىلىپ كەلەدى.  جەڭىمپازدار ەكى كەزەڭ بويىنشا انىقتالادى. الدىمەن 80-گە جۋىق ەلدىڭ بەدەلدى سپورت رەداكتورلارىنان، جۋرناليستەرىنەن جانە كوممەنتاتورلارىنان تۇراتىن كانديداتتاردى ىرىكتەۋ توبى داۋىس بەرىپ، ءار نوميناتسيا بويىنشا قىسقا ءتىزىم جاسالادى. داۋىس بەرۋ پروتسەسىن تاۋەلسىز اۋديتورلار باقىلايدى. سودان كەيىن Laureus World Sports اكادەمياسىنىڭ مۇشەلەرى جاسىرىن داۋىس بەرۋ ارقىلى جەڭىمپازداردى تاڭدايدى. ءاربىر جەڭىمپاز Cartier زەرگەرلىك ءۇيى ۇسىنعان Laureus ءمۇسىنىن الادى. سالماعى 2،5 كەلى بولاتىن بۇل ءمۇسىننىڭ قۇرامىندا 670 گرامم كۇمىس جانە 650 گرامم التىن بار.

بۇل مۇسىنمەن كوبىنە تەننيسشىلەر ماراپاتتالىپتى. رودجەر فەدەرەر Laureus World Sports Awards سىيلىعىن بەس رەت السا، نوۆاك دجوكوۆيچ — ءتورت رەت، رافاەل نادال — ەكى رەت، سەرەنا ۋيليامس — ءتورت جانە ناومي وساكا — ءبىر رەت العان.

داستان كەنجالين،

استانا