سەگىز قىرلى، ءبىر سىرلى جان

«ۇستازدىق ەتكەن جالىقپاس، ۇيرەتۋدەن بالاعا»، — دەگەن ەكەن حاكىم اباي. قاي ءبىر سالانى الىپ قاراساق تا ۇستازدىڭ ورنى ەرەك. ۇستازسىز بيىك ءبىر ماقساتقا جەتۋ مۇمكىن ەمەس. ۇستاز شاكىرتىنىڭ ارمانىنا ارمان، قيالىنا قانات ءبىتىرىپ ماقساتىنا جەتۋ جولىندا جانىن ايامايتىن اياۋلى جان.

ۇستازدىق مىنەز — ق ۇلىق نورماسى مىناداي بولۋعا ءتيىس ول تىم قاتال دا بولماۋعا ءتيىس،تىم ىرىققا دا جىعىلا بەرمەۋ كەرەكۇ ويتكەنى، تىم قاتالدىق شاكىرتتى وزىنە قارسى قويادى. ال تىم ىرىققا كونە بەرۋ ۇستازدىڭ قادىرىن كەتىرەدى. ونىڭ بەرگەن ساباعى مەن ونىڭ عىلىمىنا شاكىرتى سەلقوس قارايتىن بولادى. ۇستاز تاراپىنان بارىنشا ىنتالىلىق پەن تاباندىلىق قاجەت. ويتكەنى، بۇلار جۇرت ايتقانداي، تامشىمىسىمەن تاس تەسەتىن بەينە ءبىر سۋ ءتارىزدى، — دەگەن ەكەن ءال-فارابي بابامىز.

سونىمەن قاتار ۇستاز تۋرالى ءسوز ەتكەندى كۇنى بويى سپورت زالدا شاكىرتتەرىمەن بىرگە شۇمەكتەپ تەر توگىپ جۇرگەن باپكەرلەرگە دە قاتىستىرا ايتۋعا تولىق نەگىز بار.

«ءبىر ادام قازعان قۇدىقتان، مىڭ ادام سۋ ىشەدى» –دەگەن قاناتتى ءبىر ءسوزدى ارقاۋ ەتە وتىرىپ، قانشاما تالانتتاردى تاسادان سۋرىپ الىپ، حالىققا تانىتقان بىلگىر دە ءبىلىمدى، كوزى قىراعى باپكەرلەر تۋرالى قانشا ايتسا دا جاراسادى. ويتكەنى، تالانتتار اسپاننان تۇسە قالمايدى، ولاردا قاسىندا كۇن ۇزاق جاتتىعىۋىن جاساتىپ، بىلگەن تارجىبيەسىن بويىنا قۇيىپ تىنىمسىز، تاباندى ەڭبەك ەتىپ جۇرگەن باپكەرلەردىڭ جۇمىسىنىڭ جەمىسى.

بۇگىنگى اڭگىمە جەلىسىن وسىنداي بار عۇمىرىن سپورتقا ياعني، كۇرەسكە ارناعان ارداقتى ۇستاز، ۇلاعاتتى باپكەر، قادىرلى جان، ايماقتاعى سپورتتىڭ دامۋىنا زور ۇلەسىن قوسقان قر سپورت ارداگەرى، قازاق كۇرەسى مەن گرەك-ريم كۇرەسىنىڭ سپورت شەبەرى امانبەك فازىل ۇلى ساماتوۆ تۋرالى ايتقىمىز كەلەدى.

قر سپورت ارداگەرى امانبەك فازىل ۇلى ساماتوۆ 1949 جىلى قازىرگى اباي وبلىسىنىڭ اياگوز اۋدانىنداعى سەرگەوپول اۋىلىندا دۇنيەگە كەلگەن. بالا كەزىنەن باستاپ سپورتقا قۇمارلىعى جوعارى تالاپتى بالا الدىڭعى تولقىن اعالارىنىڭ كۇرەسكە دەگەن قىزىعۋشىلىعىن بايقاپ، سولار سەكىلدى كۇرەستى تاڭدايدى. الدىمەن ۇلكەن اعاسى امانجولدىڭ كۇرەسكە دەگەن ەپتىلىگىن، ءادىس- ايلاسىنىڭ جوعارى ەكەنىن بايقاپ كۇرەسكە ۇيرەتۋىن وتىنەدى.

«تالاپتى ەرگە نۇر جاۋار»، دەمەكشى، قۇمارلىقپەن كەلگەن ۇزاق جاتتىعۋدىڭ ارقاسىندا الدىمەن اۋدان، وبلىس، رەسپۋبليكا جارىستارىنا قاتىسىپ، چەمپيون اتانىپ ۇلكەن ناتيجە كورسەتە باستايدى.

ءاۋ-دەمەيتىن قازاق جوق قوي. بالا كەزىنەن سپورتتى عانا ەمەس، مۋزىكانى دا جانى سۇيگەن امانبەك اعامىز مەكتەپتە وقىپ ءجۇرىپ ءان سالىپ، حالىقتىڭ راحمەتىنە بولەنە باستايدى. انشىلىك قىرىنىڭ دا پايدا بولۋى جايدەن-جاي ەمەس ەكەنى بەلگىلى. ول ءۇشىن بالانىڭ تەگىندەن ءبىر ءانشى-جىرشى بولۋى مىندەتتى دەسەك بولار. ال، امانبەك اعانىڭ اكەسى فازىل قازاقتىڭ بايىرعى ەڭىلىك-كەبەك، قىز جىبەك سىندى حيسسالارىن وزىنشە ءبىر ماقاممەن  ايتىپ بەرىپ كوپتىڭ العىسىن الىپ وتىرادى ەكەن. مىنە، سودان بولار انگە، ونەرگە قۇمار بولۋى. بەسىنشى سىنىپتا وقىپ جۇرگەندە اۋىلعا ءان ساباعىنا قۇسبەك اقۋوۆ دەگەن دومبىرانىڭ قۇلاعىندا وينايتىن ءان ءپانىنىڭ مۇعالىمى كەلىپ، دومبىرادان وركەستر قۇرىپ حالىق الدىنا ونەرلەرىن كورسەتە باستايدى.

«جالىنداپ جانعاننىڭ جارىق بەرەرى انىق»،  –دەمەكشى، قۇمارىلىقپەن كەلگەن بۇل ونەردى دە ءساتتى يگەرىپ العان اعامىز دومبىراسىن قولعا الىپ وركەستەرمەن الماتىعا دەيىن كەلىپ ونەرلەرىن كورسەتكەن ەكەن. كەيىن كەلە گيتارا، بايان سەكىلدى اسپاپتاردى ۇيرەنىپ الىپ، اۋىلداعى ءان قۇمار جاستارمەن ەل ءىشىن انگە بولەگەن. سەگىزىنشى سىنىپ وقىپ جۇرگەندە الماتىدان ءازيزدوللا ەسقاليەۆ دەگەن ءبىر ونەر يەسى الماتىدان اۋىلدارىنا كەلىپ جاس دومبىراشى امانبەكتىڭ شەرتكەن كۇيىنە  ءتانتى بولىپ قالاعا چايكوۆسكي اتىنداعى مۋزىكالىق ۋچيليششەگە شاقىرادى. بىراق، وعان بارۋعا مۇمكىندىك بولعانىمەن ءتۇرلى سەبەپتەرمەن بارماي قالعان ەكەن. ەسەسىنە ءوزىنىڭ سۇيىكتى سپورتى كۇرەسكە تۇپكىلىكتى قولعا الىپ، جاسى 61 كەلگەنشە كۇرەس، فۋتبول، ۆولەيبول سپورت تۇرلەرىمەن بەلسەنە اينالىسىپ شاكىرت تاربيەلەگەن.

امانبەك فازىل ۇلى ورتا مەكتەپتى اياقتاعاننان كەيىن اسكەر قاتارىنا  شاقىرىلىپ، زامانداستارىمەن بىرگە بورىشىن وتەۋگە اتتانادى. سوناۋ 1972 جىلى كامچاتكاعا اسكەر بولىمشەگە ءتۇسىپ سول جەردە كەڭەس وداعىنا ايگىلى رەجيسسەر، اكتەر نيكيتا ميحالكوۆپەن بىرگە وتان الدىنداعى بورىشىن اتقارعان ەكەن.

ميحالكوۆپەن تانىسى دا قىزىق بولىپتى. سپورت پەن ونەردى قوسا الىپ جۇرگەن تالانتتى جىگىت اسكەردە دە جانىنا جاقىن سپورتتى تاستامايدى. اسكەري بولىمشەدەگى سپورت كلۋبقا الىنعان قازاقتىڭ قارا باتىرى سول جەردە كۇرەستەن جاقسى جەتىستىكتەردى كورسەتە باستايدى. بىردە سپورت زالدا اعامىزعا جاقىن كەلىپ ونەرى ءتانتى بولعان اتى ايگىلى ميحالكوۆ تانىسۋعا ىقتيار بىلدىرگەن ەكەن. امانبەك اعامىزدىڭ ايتۋىنشا، ميحالكوۆتىڭ بويى 1م 90 سم بولعاندىقتان ونى باسكەتبول وينايدى دەپ سپورت كلۋبقا الىپ كەلىپتى. ەكەۋى دە ەكى اسكەري بولىمشەدە بولسا دا ولاردى بىرىكتىرىپ تانىستىرعان سپورت بولسا كەرەك. ەكەۋى كەيىن دە حات الىسىپ تۇرسا كەرەك. تالانتتى ادام قاي جەردە بولسا تەسىپ شىعارى بەلگىلى عوي. اسكەردە جۇرگەندە بۇكىل تىنىق مۇحيتى بويىنشا اسكەريلەر اراسىندا وتكەن ۆلاديۆوستوكتىڭ بىرىنشىلىگىنە قاتىسىپ، ەكىنشى جۇلدەلى ورىندى جەڭىپ الادى. دارىندى جاس قازاق بالۋاننىڭ ونەرىنە ءتانتى بولعان اسكەري سپورتتىڭ باسشىلارى امانبەك اعامىزدى كسرو قارۋلى كۇشتەرى قۇراماسىنىڭ قاتارىنا الادى. ريگادا وتكەن كسرو قارۋلى كۇشتەرى اراسىندا وتكەن الامان جەكپە-جەكتە جۇلدەلى ءۇشىنشى ورىندى يەلەنگەن ەكەن. وسىلايشا، اسكەر قاتارىندا جۇرگەندە دە تاماشا جەتىستىكتەرگە جەتكەن امانبەك اعامىزدىڭ ءومىر جولىنداعى قالدىرعان ىزدەرى تولىمدى تابىستارمەن كومكەرىلگەن.

1967-1971 جىلدارى الماتى قالاسىندا دەنە شىنىقتىرۋ ينستيتۋتىنىڭ كۇرەس ءبولىمىن وقۋعا ءتۇسىپ جاقسىمەن وقىپ بىتىرەدى. ينسيتۋتتا وقىپ جۇرگەندە قازاقستاننىڭ بىرىنشىلىگىنە قاتىسىپ جاقسى ونەر كورسەتەدى. نۇركەن ءابدىروۆتىڭ اتىندا بۇكىلوداقتىق تۋرنيردە كلاسسيكالىق كۇرەستەن بەسىنشى ورىنعا جەتسە، جاستار اراسىندا ەلىمىزدىڭ چەمپوناتىندا قولا جۇلدەگە يە بولادى.

جوعارى وقۋىن تامامداعان سوڭ، العان ءبىلىمىن اۋىل وتىندە جۇرگەن تالانتتاردى تاربيەلەۋگە ارناۋلى ءجون كورىپ، تۋىپ-وسكەن جەرى سول كەزدەگى سەمەي وبلىسىنىڭ اياگوز اۋدانىنداعى سەرگەوپول ورتا مەكتەبىندە 1979 جىلعا دەيىن دەنە شىنىقتىرۋ جانە العاشقى اسكەري دايىندىق پاندەرىنەن ۇستازدىق ەتىپ، ەڭبەك جولىن باستايدى. مەكتەپتە سپورت ساباعىنان ءدارىس بەرە ءجۇرىپ، گرەك-ريم جانە قازاقشا كۇرەسىنەن وتەتىن وبلىستىق، رەسپۋبليكالىق جارىستارعا قاتىسىپ، جاقسى ورىنداردان كورىنەدى. كەيىنىرەك قازاق كۇرەسىنە اۋىسىپ كەتىپ، سپورت شەبەرىن ورىندايدى. سەمەي وبلىسىنىڭ بىرنەشە دۇركىن چەمپيونى بولسا، قاجىمۇقان اتىنداعى رەسپۋبليكالىق جارىستا توپ جارىپ، باس جۇلدەنى جەڭىپ الادى. سونىمەن قاتار، امانبەك فازىل ۇلىنىڭ قازاقستاننىڭ بىرىنشىلىگىندە ۇزدىك ۇشتىككە كىرگەنىن ايتپاي كەتۋ مۇمكىن بولماس.

«جىگىتكە جەتى ونەردە از»، — دەمەكشى، گيتارا، دومبىرا ءتۇرلى سەكىلدى مۋزىكالىق اسپاپتاردى  توگىلتە ويناعاندا، تىڭداۋشىسىنىڭ قۇرمارىن تارقاتاتىنى تاعى ءبىر ەرەكشە قاسيەتى بويىندا بار ەدى. سول جىلدارى امانبەك فازىل ۇلى سەرگەوپولدە قۇرىلعان انسامبلدە دومبىراشى بولىپ، تالاي وبلىستىق بايقاۋلاردا توپ جارادى. دەگەنمەن جانىنا جاقىن كۇرەس ءتۇرىن ەشقاشان ۇمىت قالدىرۋدى دۇرىس ساناماعان. امانبەك فازىل ۇلى 1987 جىلى ەسىك قالاسىنا قونىس اۋدارىپ، سپورت مەكتەبىندە كۇرەستەن جاتتىقتىرۋشى بولىپ كىرەدى. سوسىن سپورت جانە تۋريزم ءبولىمىنىڭ باسشىسى، ەسىك قالاسى اكىمىنىڭ مىندەتىن اتقارۋشى، كوكتوبە اۋىلدىق وكرۋگىنىڭ اكىمى بولىپ كوپ جىلدىق ومىردەگى مول تاجىربيەسىن ەل يگىلىگىنە ارنايدى. ارداقتى بالۋاننىڭ قولىنان جاتتىعىپ، بالا بۇركىتتەي شىڭدالىپ ۇشىپ شىققان  كوپتەگەن بەل  شاكىرتتەرى ۇلكەن جەتىستىكرەگە جەتىپ، ۇستازىنىڭ مەرەيىن اسقاقتاتقان. امانبەك اعامىزدىڭ تاعى ءبىر قىرى ول ءادىل تورەشى بولىپ كوپتەگەن ءدۇبىرلى جارىستاردى قازىلىق ەتۋى بولىپ سانالادى.

اۋداندىق سپورت بولىمىندە قىزمەت ىستەپ جۇرگەن شاعىندا امانبەك فازىل ۇلى ۇلتتىق سپورت تۇرلەرىن دامىتۋعا وراسان ەڭبەك سىڭىرگەن. سول جىلدارى ۇلتتىق سپورتىمىز قارقىندى دامىپ، اۋداننىڭ شاشاسىنا شاڭ جۇقپاس جۇزدەن جۇيرىك، مىڭنان تۇلپارلارى وبلىستىق، رەسپۋبليكالىق جارىستاردان جۇلدەلى ورىنداردى ءىلىنىپ ەلدىڭ ماقتانىشىنا اينالادى. ايتالىق، 1990 جىلدىڭ باسىندا ات سپورتى دۇرىس جولعا قويىلىپ، ۇلتتىق ات سپورتى ەرەكشە ءبىر قارقىنمەن دامىعان ەكەن. سول كەزدەگى اۋدان باسشىسى س.ابديەۆتىڭ قولداۋىمەن اۋداندىق اتبەگىلەر سايماساي ەلدى مەكەنىنەن اعايىندى بادرۋدين، لەما يساەۆتار، قىربالتاباي وڭىرىنەن بەكەت قۇماربەكوۆ، قاراساي كەڭشارىنان گريشا زاريدزە مەن باسقا دا ات سپورتىن دامىتۋعا كوپ ۇلەستەرىن قوسىپتى. سونىڭ ارقاسىندا بادرۋدين يساەۆتىڭ اتى «مانگۋست» شىمكەنت قالاسىندا وتكەن رەسپۋبليكا بىرىنشىلىگىندە الامان بايگەسىندە ءبىرىنشى بولىپ، اۋداندا  اۆتوكولىككە يە بولادى. لەما يساەۆتىڭ «تيبەت» ەسىمدى تۇلپارى تالدىقورعان وڭىرىندە وتكەن ا.الدابەرگەنوۆتىڭ 90 جىلدىعىندا توپ جارىپ، «تويوتا» اۆتوكولىگىن ۇتىپ العان ەكەن. سول جىلدارى ۇلتتىق سپورتتىڭ، سونىڭ ىشىندە ات سپورتىنىڭ اۋدان بويىنشا كەڭىنەن قۇلاش جايۋىنا امانبەك فازىل ۇلىنىڭ قوسقان ۇلەسى زور ەكەنىن حالىق كۇنى بۇگىنگە دەيىن ايتىپ كەلەدى. سالاماتتى ءومىر سالتىنا بار عۇمىرىن ارناعان ەل اعاسى بۇگىندە 73 جاستا، ۇلىن ۇياعا، قىزىن قياعا قوندىرىپ، نەمەرەلەرىن جەتەكتەپ قىزىعىنا تويماي جۇرگەن ارداقتى اقساقال.

بيىل كوكتەمدە جارىم كاليما بايشاشەۆامەن شاڭىراق كوتەرگەنىمە 50 جىل تولدى. ول كىسى ۇزاق جىلدار ءتۇرلى مەملەكەتتىك مەكەمەلەردە بۋحگالتەر بولىپ قىزمەت ەتتى. وتباسىمىزداعى بەرەكەنىڭ ۇيىتقىسى بولا ءبىلدى. قۇدايعا شۇكىر، ەكى ۇل، ءبىر قىز تاربيەلەپ وسىردىك. ۇلدارىم تەلجان مەن اسقار الماتىداعى سپورت جانە تۋريزم اكادەمياسىن بىتىرگەن. كەزىندە ولار وليمپياداعا جاساقتالعان قۇرام قاتارىندا جاتتىقتى. بۇگىندە سپورت شەبەرى، ال ەكىنشىسى سپورت شەبەرىنە ۇمىتكەر. نەمەرەلەرىم دە ءبىزدىڭ جولىمىزدى جالعاستىرىپ كەلەدى. ءۇش نەمەرەم جەتىسۋ وبلىسىنداعى ارنايى سپورت ينتەرناتىندا ءتالىم الىپ جاتىر. ءتۇرلى رەسپۋبليكالىق جانە وبلىستىق جارىستاردا جۇلدە الىپ ءجۇر. قازىر ولار گرەك-ريم كۇرەسىنەن سپورت شەبەرىنە ۇمىتكەر اتانىپ ۇلگەردى. وسىلايشا ءبىزدىڭ اۋلەت وزدەرىنىڭ كۇرەستەگى سارا جولىن جالعاپ كەلەدى، – دەيدى سپورت ارداگەرى.

وتباسى ءۇشىن ەڭ نەگىزگى قۇندىلىقتار حالقىمىزدىڭ سالت-ءداستۇرى، تاريحى، مادەنيەتى، ياعني ۇلكەنگە قۇرمەت، كىشىگە ىزەت، ءبىر-بىرىمەن سىيلاستىقتا، اۋىزبىرشىلىكتە بولۋ ەكەنى انىق. وتاعاسىنىڭ ءومىرى تۋرالى ءسوز ەتكەندى، قاسىندا 50 جىل بىرگە تۇرىپ ءبىر جۇرگەن جان جارى، وتاناسى قاليما اپايدان ارتىق ەشكىم بىلمەس ءسىرا.

بالا تاربيەسىندە ءبىرىنشى ورىندا ءتارتىپ بولۋ كەرەك دەپ ەسەپتەيمىز. وسىعان قاتىستى ءار وتباسىنىڭ بەلگىلى ءبىر قاعيدالارى بار عوي. بىزدىڭشە، تاربيە وشاق قاسىنان باستالادى. ويتكەنى، «ۇيادا نە كورسەڭ، ۇشقاندا سونى ىلەسىڭ» دەمەكشى، بالا وتباسىندا نەنى كورسە، سونى بويىنا ءسىڭىرىپ وسەدى. بالا قانداي ءىستى باستاسا دا، اياعىنا دەيىن جەتكىزۋى كەرەك. ارقاشان قاراپايىم ءارى كىشىپەيىل بولۋعا، قيىندىقتان قورىقپاۋعا، وتىرىك ايتپاۋعا باۋليمىز. بولاشاقتا ادال ازامات بولىپ شىعۋىنا وسى قاسيەتتەرى ىقپال ەتەدى. امانبەكتىڭ ادامگەرشىلىگى، قاراپايىمدىلىعى، پاراسات-پايىمى، مەيىرىمگە تولى مىنەزى، جاناشىرلىعى تاعىسىن تاعى ايىرىقشا قاسيەتتەرىن ايتىپ تاۋىسى المايمىن، ەڭ باستىسى وتباسىنىڭ بەرىك تۇتقاسى ءارى تىرەگى دەپ سانايمىن، — دەيدى وتاناسى كاليما بايشاشەۆا.

ايماقتاعى سپورتتىڭ دامۋىنا بارىنشا ۇلەسىن قوسقان ارداقتى اعامىزعا قانشا ماقتاۋ ءسوز ايتساق تا جەتەدى. دەسەك تە، «جاقسى مۇراپتىڭ سوڭىنان سۋ ەرەدى، جامان مۇراپتىڭ سوڭىنان ءسوز ەرەدى»- دەمەكشى، ارداگەر بالۋاننىڭ اتىندا جىل سايىن ءداستۇرلى جارىس وتكىزىلىپ، قانشاما بوتا بالۋانداردىڭ تالانتى اشىلا ءتۇسىپ كەلەدى.

جاسوپىرىمدەر اراسىندا ۇيىمداستىرلىپ كەلگەن بۇل تۋرنير 2014 جىلى تۇساۋى كەسىلگەن ەكەن. العاشىندا وبلىستىق تۋرنير رەتىندە تۇساۋىن كەسكەن الامان جەكپە-جەك كەيىن قاناتىن كەڭگە جايىپ، رەسپۋبليكالىق دەڭگەيگە كوتەرىلدى. ال بيىل اتالمىش بايراقتى باسەكە حالىقارلىق جارىس رەتىندە جالاۋىن جەلبىرەتپەك. وندا باق سىناپ، جۇلدەگە ىلىككەنبالا بالۋاندار سپورت شەبەرىنە ۇمىتكەر اتانا الادى. گرەك-ريم كۇرەسىنەن وتكەن بيىلعا سىنعا رەسپۋبليكانىڭ كوپتەگەن ايماقتارى مەن قاتار، تاجىكستان ەلىنەن دە جاس بالۋاندار كەلىپ قاتىستى. ايتۋلى جارىس ەڭبەكشى قازاق اۋدانىنا قاراستى ەسىك قالاسىندا ورنالاسقان №1 بالالار مەن جاسوپىرىمدەر سپورت مەكتەبىنىڭ شاڭىرىعىندا بولىپ ءوتتى. اباي قانات ۇلى سىرعاباەۆ باسقاراتىن بۇل سپورت مەكتەبى ايتۋلى جارىس قانا ەمەس كوپتەگەن ءدۇبىرلى دودالاردى رەسپبليكالىق جوعارى دەڭگەيدە وتكىزۋگە ەسىگىن ايقارا اشىپ، قۇشاق جايا قارسى الاتىن قۇتتى ورىن دەسەك بولادى. بۇل جولى دا اباي قانات ۇلىنىڭ كورەگەندىلىگىنىڭ ارقاسىندا ءوڭىر سپورتىن دامىتۋعا زور ۇلەسىن قوسقان ارداگەرلەر تۇگەلدەي شاقىرىلعان ەكەن. ارينە، وسىنداي الامان جارىستاردا تەر توككەن ارداگەر اقساقالدار ءبىر-ءبىرىن كورىپ ساعىنا قاۋىشىپ، وتكەندە ەسكە الىپ شۇيىركەلەسىپ قالاتىن بەلگىلى جايت. سوندىقتان دا بۇگىنگى جارىسقا شاقىرعاندارىنا قايتا-قايتا العىستارىن جاۋدىرىپ ءبىر جاقسى كوڭىل كۇيمەن جاساپ قالدى.

الدىمەن جارىستىڭ سالتاناتتى اشۋلۋى بولىپ ءوتتى. ءداستۇرلى باسەكەنىڭ اشىلۋىنا ەسىك قالاسىنىڭ اكىمى، ءوڭىر سپورتىنا ەڭبەگى سىڭگەن ارداگەر سپورتشىلار كەلىپ قاتىستى. قۇرمەتتى قوناقتار امانبەك فازىل ۇلىنىنىڭ اتىنداعى ءداستۇرلى جارىسقا كەلىپ قاتىسىپ جاتقان ءجاسوسپىرىم بالۋاندارعا ساتتىلىك تىلەپ، تۋرنير يەسىنە قۇرمەت، قوشەمەت كورسەتتى. سوسىن بەلدەسۋلەر باستالىپ كەتتى.

جارىس قورتىندىسى بويىنشا 2008-2010 جىلدارى تۋعان جاسوپىرىمدەر اراسىنان سامعا ەرمەك، جاسۇلان بالتاباي، رۋسلان يلياسوۆ، ءاليحان نۇرداۋلەت، نۇرباقىت ابدۋحان، ءمادي توقتارباي، ەراسىل احان، مەدەۋ قۋات ۇلى سىندى بوتا بالۋاندار توپ جارىپ  تۋرنيردىڭ جەڭىمپازدارى اتاندى. بۇل جارىستان كوپتەگەن دارىندى جاستار شىڭدالىپ ءوسىپ شىعىپ جاتىر.

«تۇلپاردىڭ سىنى بايگەدە»، — دەمەكشى، ءوز اۋىل-ايماقتارىندا تولاسسىز جاتتىعىپ، شىنىعىپ جۇرگەن تالانتتار وسىنداي الاماندا باس قوسىپ، شەبەرلىكتەرىن بايقايدى. سوندىقتان دا بۇل ءتۋرنيردىڭ بولاشاق جاستارىمىز ءۇشىن بەرەرى زور. ال، امانبەك فازىل ۇلى اعامىزعا زور دەنساۋلىق، ۇزاق ءومىر تىلەيمىز. ارداگەر سپورتشى ءالى دە جاستارعا اقىل-كەڭەسىن ايتىپ، كوپجىلدىق قازىنالى تاجىربيەسىمەن ءبولىسىپ وتىرار دەگەن ويدامىن. ويتكەنى، جاستاردى تۇلعالار ارقىلى تاربيەلەۋدىڭ ماڭىزى ەرەكشە.

 

اقىن ورداباي ۇلى،

فوتو:  ەرزات اسىل