رىباكينا العاش رەت ريم ماستەرس ءتۋرنيرىنىڭ ءتورتىنشى اينالىمىنا شىقتى

قازاقستاننىڭ ءبىرىنشى، الەمنىڭ 6-راكەتكاسى ەلەنا رىباكينا العاش رەت ريم WTA 1000 ءتۋرنيرىنىڭ ءتورتىنشى اينالىمىنا شىقتى.

قازاقستان تەننيسشىسى ءۇشىنشى اينالىمدا دۇنيەجۇزىلىك رەيتينگتە 57-ورىندا تۇرعان رەسەيلىك اننا كالينسكايامەن كەزدەسىپ، ونى ۋاقىتىنان بۇرىن جەڭگەن ەدى. ولاي دەيتىنىمىز، كالينسكايا جاراقاتىنا بايلانىستى جارىستى جالعاستىرۋدان باس تارتقان بولاتىن. وسى ماتچتا رىباكينا 3 ەيس،1 برەيك جاساپ ۇلگەردى. ال ماتچتىڭ ءوزى 35 مينۋت قانا بولدى.

ەندى رىباكينا شيرەك فينالعا شىعۋ ءۇشىن الەمنىڭ 70-راكەتكاسى، چەحيالىق ماركەتا ۆوندروۋشوۆامەن كەزدەسەدى. چەحيالىق تەننيسشى ءۇشىنشى اينالىمدا كۇتپەگەن جەردەن الەمنىڭ 8-راكەتكاسى، گرەكيالىق ماريا ساككاريدى 7:5، 6:3 ەسەبىمەن ۇتتى.

قازاقستان تەننيسشىسى كالينسكايامەن ويىننىڭ الدىندا الەمنىڭ 65-راكەتكاسى، يتاليالىق ياسمين پاولينيمەن كەزدەسىپ، ونى 7:6 (7:4)، 6:1 ەسەبىمەن جەڭدى.

داستان كەنجالين،

استانا