SportPress.kz Qazaqstan sport jańalyqtary
«Qaırat» fýtbol klýby 8 jylǵa sottalǵan kásipker Qaırat Boranbaevtyń menshiginde qala beredi. Bul týraly ortalyq kommýnıkaııalar qyzmetinde ótken brıfıngte belgili boldy, dep habarlady halyq-uni.kz.
Almaty qalasy ákimi Erbolat Dosaev fýtbol klýbynyń jumys istep turǵanyn aıtty.
«Qaırat» fýtbol klýby ázirge kommýnaldyq menshikke berilmeıdi. Basqa sheshim, onyń ishinde sot sheshimi, menshik ıesi tarapynan basqa da bastama kóterilmedi. Qazir ózderi qarjylandyryp jatyr, ákimdik tarapynan «Qaırat» balalar-jasóspirimder mektebin jyl saıyn qarjylandyryp otyrmyz. Klýb jumys istep, damyp jatyr. Qazaqstan chempıonatyna da óz sharttary boıynsha qatysady, — dedi Erbolat Dosaev.
Qala ákimi qarjylandyrý tarapynan qıyndyqtar men máseleler ákimdik zańnamada kórsetilgen tártippen qaralatynyn aıtty. Alaıda qazir bul másele kún tártibinde qaralyp jatqan joq.
Aıta keteıik, sot úkimimen Qaırat Boranbaev qylmystyq kodekstiń 28-baby 5-bóligi jáne 189-baby 4-bóligi, 218-babynyń 3-bóligi boıynsha kináli dep tanyp, 8 jylǵa bas bostandyǵynan aıyryldy.
Sondaı-aq Qaırat Boranbaev «Qurmet», «Eren eńbegi úshin», «Parasat», III dárejeli «Barys» ordeninen aıyryldy.
