بەيجىڭ وليمپياداسىنىڭ جۇلدەگەرى اكىمدىك ۋادە ەتكەن پاتەردى الا الماي ءجۇر (ۆيدەو)

بەلگىلى بوكسشى، بەيجىڭ وليمپياداسىنىڭ قولا جۇلدەگەرى ەركەبۇلان شىناليەۆ 31 ارنانىڭ «ينفورمبيۋرو» باعدارلاماسىنىڭ رەداكتسياسىنا بەينەۇندەۋ جولداپ، 15 جىلدان بەرى شىمكەنتتەن قالا اكىمدىگى ۋادە ەتكەن پاتەردى الا الماي جۇرگەنىن ايتتى.

ول سونىمەن بىرگە وزىنە تيەسىلى باسپانا بەرىلمەسە، قۇزىرلى ورگاندارعا شاعىمداناتىنىن دا ەسكەرتتى. ال، قالا اكىمدىگى بولسا سپورتشىعا پاتەر سىيلاۋعا ۋادە بەرمەگەنىن ايتىپ وتىر.

بوكسشىنىڭ ايتۋىنشا، بەيجىڭ وليمپياداسىنان ورالعان كەزدە وعان قولا مەدال ءۇشىن قوماقتى قارجىلاي سىيلىقتارىن تابىس ەتىلىپ، ءتىپتى پاتەر كىلتىن دە بەرگەن. سول كەزدە بولاشاق باسپاناسىنىڭ قايدا ورنالاسقانىن دا كورسەتىپتى. ول پاتەر شىمكەنتتەگى «نۇر ءسات» شاعىن اۋدانىندا ورنالاساتىن بولىپتى. الايدا بوكسشىنىڭ سوزىنە قاراعاندا، كەيىن اكىمدىكتەگىلەر ءوز سوزدەرىنەن اينىپ قالعان.

قۇرىلىستىڭ قۇجاتى دۇرىس بولماي جاتىر دەپ ايتتى.  سويتىپ، كۇتىپ جۇردىك. كەيىن اكىمدىك 1، 5 ملن تەڭگە بەرىپ، وسىعان ەندى پاتەر الاسىڭ دەپ قۇتىلدى عوي. ول كەزدە وڭتۇستىك قازاقستان وبلىسىنا قارايتىن شىمكەنت قالاسىنىڭ اكىمى ارمان جەتپىسباەۆ دەگەن جىگىت ەدى، — دەدى وليمپيادانىڭ قولا جۇلدەگەرى.

قولدا بار مالىمەتكە قاراعاندا، قازىر سپورتشىنىڭ باسىندا باسپاناسى جوق ەكەن ءارى التى جىلدان بەرى جۇمىسسىز وتىر ەكەن.

قايدا جۇمىس سۇراپ بارسام دا، كەزىندە ايقارا اشىلعان ەسىكتەردىڭ ءبارى الدىمنان تارس ەتىپ جابىلعان، — دەدى ول.

شىمكەنت قالاسىنىڭ دەنە شىنىقتىرۋ جانە سپورت باسقارماسى ەركەبۇلان شىناليەۆپەن  ۇنەمى بايلانىستا ەكەنىن، جۇمىسقا ورنالاستىرۋ جاعىن قاراستىراتىنىن حابارلادى. بىراق اكىمدىكتىڭ سپورتشىعا باسپانا الىپ بەرە المايتىنىن ەسكەرتتى.

شىمكەنت قالاسى دەنە شىنىقتىرۋ جانە سپورت باسقارماسىنىڭ باسشىسى باۋىرجان تۇمانباەۆتىڭ ايتۋىنشا، بوكسشىعا باسپانا بەرىلدى دەگەن اڭگىمە بولعان جوق.

ەلدىڭ كوزىنشە بەرىلدى دەگەن ەش جەردە اڭگىمە بولعان جوق. مەن ول تۋرالى ەركەبۇلاننىڭ وزىمەن دە سويلەستىم. ونداي اڭگىمە بولماعان. ءۇي بەردى دەگەن. ءۇي بەرەمىز دەپ ايتقان. ونىڭ كىم ايتقانىن ەشكىم بىلمەيدى. ول دەمەۋشىلەر تاراپىنان بولدى ما ول جاعىن مەن بىلمەدىم، — دەدى باسقارما باسشىسى.

ال مادەنيەت جانە سپورت مينيسترلىگى وكىلدەرىنىڭ ايتۋىنشا، وليمپيادا چەمپيوندارى مەن جۇلدەگەرلەرىنە پاتەر بەرۋ تۋرالى زاڭ بىلتىر عانا بەكىتىلگەن. سوندىقتان 15 جىل بۇرىن بولعان جاعدايدىڭ وتىرىك-شىنىن اجىراتۋ قيىن. بىراق جاتتىقتىرۋشىلىق جۇمىسپەن اينالىسۋعا ەشكىم كەدەرگى كەلتىرمەيدى.

داستان كەنجالين،

استانا