Beıjiń Olımpıadasynyń júldegeri ákimdik ýáde etken páterdi ala almaı júr (VIDEO)

Belgili boksshy, Beıjiń Olımpıadasynyń qola júldegeri Erkebulan Shynálıev 31 arnanyń «Informbıýro» baǵdarlamasynyń redakııasyna beıneúndeý joldap, 15 jyldan beri Shymkentten qala ákimdigi ýáde etken páterdi ala almaı júrgenin aıtty.

Ol sonymen birge ózine tıesili baspana berilmese, quzyrly organdarǵa shaǵymdanatynyn da eskertti. Al, qala ákimdigi bolsa sportshyǵa páter syılaýǵa ýáde bermegenin aıtyp otyr.

Boksshynyń aıtýynsha, Beıjiń Olımpıadasynan oralǵan kezde oǵan qola medal úshin qomaqty qarjylaı syılyqtaryn tabys etilip, tipti páter kiltin de bergen. Sol kezde bolashaq baspanasynyń qaıda ornalasqanyn da kórsetipti. Ol páter Shymkenttegi «Nur sát» shaǵyn aýdanynda ornalasatyn bolypty. Alaıda boksshynyń sózine qaraǵanda, keıin ákimdiktegiler óz sózderinen aınyp qalǵan.

Qurylystyń qujaty durys bolmaı jatyr dep aıtty.  Sóıtip, kútip júrdik. Keıin ákimdik 1, 5 mln teńge berip, osyǵan endi páter alasyń dep qutyldy ǵoı. Ol kezde Ońtústik Qazaqstan oblysyna qaraıtyn Shymkent qalasynyń ákimi Arman Jetpisbaev degen jigit edi, — dedi Olımpıadanyń qola júldegeri.

Qolda bar málimetke qaraǵanda, qazir sportshynyń basynda baspanasy joq eken ári alty jyldan beri jumyssyz otyr eken.

Qaıda jumys surap barsam da, kezinde aıqara ashylǵan esikterdiń bári aldymnan tars etip jabylǵan, — dedi ol.

Shymkent qalasynyń Dene shynyqtyrý jáne sport basqarmasy Erkebulan Shynálıevpen  únemi baılanysta ekenin, jumysqa ornalastyrý jaǵyn qarastyratynyn habarlady. Biraq ákimdiktiń sportshyǵa baspana alyp bere almaıtynyn eskertti.

Shymkent qalasy dene shynyqtyrý jáne sport basqarmasynyń basshysy Baýyrjan Tumanbaevtyń aıtýynsha, boksshyǵa baspana berildi degen áńgime bolǵan joq.

Eldiń kózinshe berildi degen esh jerde áńgime bolǵan joq. Men ol týraly Erkebulannyń ózimen de sóılestim. Ondaı áńgime bolmaǵan. Úı berdi degen. Úı beremiz dep aıtqan. Onyń kim aıtqanyn eshkim bilmeıdi. Ol demeýshiler tarapynan boldy ma ol jaǵyn men bilmedim, — dedi basqarma basshysy.

Al mádenıet jáne sport mınıstrligi ókilderiniń aıtýynsha, Olımpıada chempıondary men júldegerlerine páter berý týraly zań byltyr ǵana bekitilgen. Sondyqtan 15 jyl buryn bolǵan jaǵdaıdyń ótirik-shynyn ajyratý qıyn. Biraq jattyqtyrýshylyq jumyspen aınalysýǵa eshkim kedergi keltirmeıdi.

Dastan KENJALIN,

ASTANA