پرەزيدەنت كۋبوگى: قازاقستاننىڭ ءۇش تەننيسشىسى ەكىنشى اينالىمعا شىقتى

قازاقستاننىڭ ءۇش تەننيسشى استانادا ءوتىپ جاتقان پرەزيدەنت كۋبوگى ءۇشىن چەللەندجەر ءتۋرنيرىنىڭ ەكىنشى اينالىمىنا شىقتى.

دميتري پوپكو پرەزيدەنت كۋبوگىنداعى العاشقى كەزدەسۋىن وتكىزدى. ول تۇركيالىق كوراي كيرچيدى 6:4، 4:6، 6:1 ەسەبىمەن جەڭدى. ەندى ول شيرەك فينالعا شىعۋ ءۇشىن وزبەكستاندىق حۋمايۋن سۇلتانوۆپەن وينايدى.

پرەزيدەنت كۋبوگىنىڭ بىلتىرعى ءفيناليسى دەنيس ەۆسەەۆ جاڭازەلانديالىق ادجيت رايدى 6:4، 6:1 ەسەبىمەن ۇتتى. ونىڭ كەلەسى قارسىلاسى — يزرايل وكىلى ورەل كيمحي.

تاعى ءبىر قازاقستاندىق، 19 جاستاعى يسلام ورىنباسار الەمنىڭ 616-راكەتكاسى، ۇندىستاندىق پردجۆال دەۆتەن 6:4، 1:6، 6:3 ەسەبىمەن ايلاسىن اسىردى.

تەننيسشىلەر كورتتا ەكى ساعاتتان استام ۋاقىت وينادى. يسلام ورىنباسار جارىستىڭ ەكىنشى راكەتكاسى، جاڭازەلانديالىق بەندجامين لوكپەن كەزدەسەدى.

داستان كەنجالين،

استانا