جاسىل الاڭعا جەر-ءجۇزىنىڭ قازاق جاستارى جينالدى

الماتىدا «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن شاعىن فۋتبولدان «ER JANIBEK CUP-2017» حالىقارالىق ءتۋرنيرى ءوتتى.  بيىلعى جارىس عالىم، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشەۆتىڭ 90 جىلدىق مەرەيتويىنا ارنالدى.

وعان فرانتسيا، گەرمانيا، تۇركيا، يران، رەسەي، موڭعوليا، قىتاي جانە وزبەكستاندا تۇراتىن قانداستارىمىز بەن ەلىمىزدىڭ ءار وبلىسىنان كوماندالار قاتىستى.

تۋرنيردە ءوز توپتارىنان كەلەسى اينالىمعا «قازاق  ستامبۇل» (تۇركيا)، ء«امىر» (رەسەي، ساراتوۆ قالاسى)، «بايولكە» (موڭعوليا)، «داستان» (يران)، «NFC Kazakhstan پاۆلودار» ( پاۆلودار)، «بىرلىك-كەرۋەن» (الماتى)،  «عافۋر» (الماتى)، «الاتاۋ» (الماتى) كوماندالارى (فك) شىعىپ، جارتىلاي فينالدا كۇش سىناستى.

جارتىلاي فينالدا «NFC Kazakhstan پاۆلودار» كلۋبى ء«امىر» كومانداسىمەن  ويناپ، 4:1 ەسەبىمەن  جەڭسە، «بىرلىك-كەرۋەننىڭ»  جىگىتتەرى «بايولكەنى» 6:1 ەسەبىمەن ۇتتى.

ءۇشىنشى ورىنعا تالاستا ء«امىر» كلۋبى «بايولكە»  ۇجىمىن جەڭىپ،  قولا مەدال يەسى اتاندى.  ال فينالعا شىققان «بىرلىك -كەرۋەن» مەن «NFC Kazakhstan پاۆلودار» اراسىنداعى ويىن 3:2 ەسەبىمەن اياقتالدى.

بۇدان بولەك،  «ەر جانىبەك» حالىقارالىق قوعامدىق قورىنىڭ تاعايىنداۋىمەن ۇزدىك ويىن كورسەتكەن «NFC Kazakhstan پاۆلودار» كومانداسىنىڭ ويىنشىسى اسقار اجيكوۆ «سۇرمەرگەن»، «قازاق  ستامبۇل»  كلۋبىنىڭ وكىلى جانەر احمەت  بوزقۇرت «ۇزدىك شابۋىلشى»، ء«امىر» كومانداسىنىڭ قاقپاشىسى رۋسلان ماشتاكوۆ «ۇزدىك قاقپاشى» جانە «نامىستىڭ» (رەسەي، ومبى) ويىنشىسى نۋراحمەت نيگمانوۆ «ۇزدىك قورعاۋشى» نوميناتسيالارىن جەڭىپ الدى.

سونداي-اق، تۇرسىنبەك كاكىشەۆ اتىنداعى ارنايى «ەلدىك رۋح» سىيلىعى فرانتسيانىڭ «Parij  Kazakh  sport»  فۋتبول كلۋبى مەن قىرعىزستاننان كەلگەن «الاش» ۇجىسىنا بەرىلدى.

ءتۋرنيردىڭ جابىلۋ سالتاناتىندا الىستان ات ارىتىپ كەلگەن قازاق كوماندالارى قوعامدىق قورعا جانە ۇيىمداستىرۋشىلارعا  العىس سەزىمىن  جەتكىزدى.

«بار ءومىرىن قازاق ادەبيەتىنە ارناعان تۇرسىنبەك كاكىشەۆتىڭ 90 جىلدىعىنا ارنالعان «ەر جانىبەك» حالىقارالىق قورىنىڭ فۋتبول ءتۋرنيرى قۇتتى بولسىن. ءبىزدى شەتەلدەگى قانداستارىمىز دەپ باۋىرىنا باسىپ جاتىر. سوندىقتان فرانتسيا قازاقتارى اتىنان وسى شارانى ۇيىمداستىرۋعا ات سالىسقان بارلىق ازاماتتارعا العىس ايتامىز»، — دەدى پاريجدەگى قازاق مادەني ورتالىعى مەن «Parij  Kazakh s port» فك جەتەكشىسى تابارىك دوولۋ.

جەڭىمپاز كومانداعا كۋبوك تاپسىرعان «ەر جانىبەك» حالىقارالىق قوعامدىق قورىنىڭ پرەزيدەنتى جەڭىس تۇركيا دا جارىسقا قاتىسقان بارلىق كومانداعا العىسىن ءبىلدىردى.

جارقىن جانالتاي،

الماتى