Australian Open: Rybakına «Úlken dýlyǵa» týrnırin jeńispen bastady

Tennısshi Elena Rybakına Aýstralııa ashyq chempıonatyndaǵy birinshi oıynyn jeńip, ekinshi aınalymyna shyqty. Ol kezinde álemdik reıtıngide kósh bastaǵan tennısshi 31 jastaǵy tájirıbeli Karolına Plıshkovamen oınap, ony 7:6 (8:6), 6:4 esebimen jeńdi.

Machta cheh tennısshisi birinshi partııada breık jasap, 2:0 esebimen alǵa shyqqanymen, Rybakına tarazy basyn teńestire aldy.

Taı-breıkte de chehııalyq sportshy 6:3 esebimen alǵa shyǵyp, tórt birdeı setbolyn paıdalana almady. Rybakına qatarynan bes dopty tıimdi paıdalanyp, 7:6 (8:6) esebimen basym tústi.

Ekinshi sette esep 1:1 bolǵan kezde Rybakına breıkpen alǵa shyqty. Odan keıin Qazaqstan tennısshisi esh múmkindikti jibergen joq. Qorytyndy esep 6:4 boldy.

Endi Elena Rybakına ekinshi aınalymda álemniń 57-raketkasy, reseılik Anna Blınkovamen kezdesedi.

Rybakına alǵashqy aınalymda-aq óte myqty qarsylasyn jeńdi. Búgingi jeńis jankúıerlerge úlken senim syılady.

Halyqaralyq tennıs sarapshylary Rybakınany bıylǵy Australian Open jarysynyń favorıtteriniń biri sanaıdy.

Dastan KENJALIN,

ASTANA