SportPress.kz قازاقستان سپورت جاڭالىقتارى
قازاق كۇرەسىنەن سەربيانىڭ زرەنيانين قالاسىندا ءوتىپ جاتقان ەۋروپا چەمپيوناتىنىڭ ەرلەر اراسىنداعى العاشقى كۇنگى بەلدەسۋلەرى تارتىسقا تولى بولىپ، توپجارعان پالۋانداردىڭ جاڭا ەسىمدەرى انىقتالدى.
كارى قۇرلىقتىڭ 17 ەلىنەن كەلىپ جەتكەن پالۋاندار نامىستى قولدان بەرمەي جەڭىس ءۇشىن جان ايامادى. اسىرەسە، جەرگىلىكتى سەربيا كومانداسىنىڭ پالۋاندارىنىڭ ءتول كۇرەسىمىزدى ەرەكشە مەڭگەرىپ العاندىعى تاڭعالدىردى.
سونىمەن قاتار، رەسەي مەن سلوۆاكيا مەملەكەتتەرىنىڭ پالۋاندارىنىڭ دا ونەرىنە قول سوعۋعا تۇرارلىقتاي بولدى. قازاق كۇرەسىنىڭ وسىنداي قارقىن الا باستاعانى تۋرالى دۇنيەجۇزىلىك قازاق كۇرەسى فەدەراتسياسىنىڭ بىرىنشى ۆيتسە-پرەزيدەنتى سەرىك ادام ۇلى تۇكەەۆ مىرزا «وسىنداي ەۋروپا ەلدەرىنىڭ قازاق كۇرەسىنە دەگەن قىزىعۋشىلىعىنىڭ ارتا ءتۇسۋى، ول ءتول كۇرەسىمىزدىڭ مارتەبەسىن جوعارلاتا وتىرىپ، شەت مەملەكەتتەردە ۇلتتىق كۇرەسىمىزدەن فەدەراتسيالاردى قۇرىپ، اشىپ قانا قويا سالماي، ولاردىڭ تاباندى جۇمىس جاساۋىن قاداعالاپ، قولداۋ كورسەتىپ وتىرۋىمىز كەرەك» دەگەن پرەزيدەنتىمىز يسلام الماقان ۇلى ابىشەۆتىڭ جۇيەلى جۇمىسىنىڭ جەمىسى» – دەپ پىكىرىن ايتقان بولاتىن.
راسىمەن دە وسىدان 20-30 جىل بۇرىن قازاق كۇرەسىنىڭ ەۋروپا ارەنالارىندا اتوي سالارىن ءبىلىپ، بولجاۋ تەك ءسوز جۇزىندە بولسا، ەندى الاشتىڭ ارمانى ورىندالىپ كەلە جاتقاندىعىنا قۋانباسقا بولماس. ەندى، بەس سالماق جانە ابسوليۋتتىك اۋىر سالماق دارەجەلەرى بويىنشا جەڭىس تۇعىرىنا كوتەرىلگەن چەمپيون پالۋانداردىڭ ەسىمدەرىن ايتساق. 70 كگ سالماقتا سەربيالىق نيكولا گاليچ، 80 كگ سالماقتا يزرايلدىق ديما كاپينچيۋك، 90 جانە 100 كگ سالماقتاردا رەسەيدىڭ قاراشاي-چەركەسيا رەسپۋبليكاسىنىڭ سپورتشىسى رامازان توتا مەن اندرەي گۋسارەۆ، +100 كگ جانە تۇيە پالۋاندار اراسىنداعى فينالدىق جەكپە-جەكتە سلوۆاكيالىق مارتين اناتا چەمپيون اتانىپ، قوشەمەتكە يە بولدى.
وسىلايشا قازاق كۇرەسىنەن ءتورتىنشى ەۋروپا الامانىنىڭ العاشقى كۇنگى جەكپە-جەكتەرى اياقتالدى. ەندى بوزكىلەم تورىنە ايەلدەر التى سالماق دارەجەسى بويىنشا كۇش سىناساتىن بولادى. بۇرىمدىلار اراسىنداعى باسەكەلەردىڭ ناتيجەلەرىن الداعى ۋاقىتتا نازارالارىڭىزعا ۇسىناتىن بولامىز.
اقىن ورداباي ۇلى،
زرەنيانين قالاسى (سەربيا)
