سەمەيدە سپورتشىلار اۋعان سوعىسىنىڭ ارداگەرلەرىن ەسكە الدى

سەمەي سپورت اكادەمياسىندا وبلىستىق «سپورتتىق جانە جاۋىنگەرلىك سامبو» فەدەراتسياسى» قوعامدىق بىرلەستىگىنىڭ ۇيىمداستىرۋىمەن كەڭەس اسكەرىنىڭ اۋعان جەرىنەن شىعارىلۋىنىڭ 30 جىلدىعىنا جانە ينتەرناتسيوناليستىك بورىشىن وتەۋدە قازا تاپقان جەرلەستەردى ەسكە الۋ ماقساتىندا سامبو كۇرەسىنەن وبلىس چەمپيوناتى ءوتتى، دەپ حابارلادى سەمەي سپورت اكادەمياسىنىڭ ءباسپاسوز قىزمەتى.

1999 – 2000  جىلى تۋعان جاستار اراسىندا وتكەن جارىستا ۇلدار جانە قىزدار 10 سالماق بويىنشا بوز كىلەمنىڭ كورىگىن قىزدىردى. جارىستىڭ اشىلۋ سالتاناتىنا قاتىسقاندار اۋعان جەرىندە قازا تاپقان جەرلەستەرىمىزدى ءبىر مينۋت ۇنسىزدىكپەن ەسكە الدى. اۋعان سوعىسى ارداگەرلەرى كەڭەسىنىڭ سەمەي قالاسىنداعى توراعاسى بورانباي بەگاتوۆتىڭ ايتۋىنشا، بۇل سوعىستا بۇرىنعى سەمەي وبلىسىنان 1100 ادام قاتىسسا، ونىڭ 44-ءى سول جاقتا كوز جۇمىپ، 2 جاۋىنگەر حابار-وشارسىز كەتكەن. سونداي-اق اۋعان ارداگەرلەرىنە قاتىستى ءالى دە شەشىمىن كۇتكەن ماسەلەلەر دە بار. سونىڭ ءبىرى – اۋعان سوعىسى ارداگەرلەرىنىڭ مارتەبەسى. مارتە ايقىندايتىن قۇجات پارلامەنتتىڭ تومەنگى پالاتاسىنىڭ قاراۋىندا كورىنەدى.

ال جارىسقا كەلسەك، چەمپيوناتتىڭ باس تورەشىسى، سامبو كۇرەسىنەن شقو بويىنشا اعا جاتتىقتىرۋشى ءبىرجان يماحانوۆ ءبىرىنشى جانە ەكىنشى ورىن العان بالۋاندار 7 – 11 ناۋرىز ارالىعىندا الماتى قالاسىندا وتەتىن جاستار اراسىنداعى ەل چەمپيوناتىنا جولداما الاتىنىن ايتتى.