SportPress.kz Qazaqstan sport jańalyqtary
Almaty oblysynyń Tekeli qalasynda sambo kúresinen KSRO sport sheberi Qaırat Meırenbaevty eske alýǵa arnalǵan 23 jasqa deıingi erler men áıelder arasynda el chempıonaty ótti, dep habarlady Semeı sport akademııasynyń baspasóz qyzmeti.
Elimizdiń barlyq óńirinen 350-ge jýyq bilektiler men burymdylardyń basyn qosqan bul jarysta Semeı sport akademııasynyń shákirtteri jaqsy nátıje kórsetti. Bizdiń balǵyn balýandar Tekeli tórine tóselgen boz kilemde eki altyn, eki kúmis jáne bir qola medal jeńip aldy. Beldesýler nátıjesinde 74 kıloda Shalqybek Rahmetollaev qola, 66 kg salmaqta Maratbek Rahmetollın men 82 kıloda kúresken Qýanysh Rataev kúmis medal enshiledi. Al Rýslan Jarqynbaev (82 kg) pen Qýandyq Stampolov (90 kg) qarsylas shaq keltirmeı chempıon atandy. Akademııa samboshylaryn bul jarysqa bapker Birjan Imahanov bastap barǵan bolatyn.
Sonymen qatar dzıýdo kúresinen Qostanaı oblysynyń Tobyl stanııasynda ótken respýblıkalyq týrnırde de akademııanyń shákirtteri júldegerler qatarynan kórindi. 300-den asa jasóspirimdi jınaǵan jarysta uldar arasynda 38 kıloda Aqan Botanbaı úshinshi, Eldos Orazynbaev (42 kg) ekinshi oryn aldy. Qyzdar arasynda Anna Ovcharenko (48 kg) ekinshi, 63 kg-den joǵary salmaqta Ajar Ashat birinshi oryn aldy. Aıta keteıik, Qostanaıdaǵy jarysqa Erjan Jantasov bapker bastap bardy.
