الماتىدا جۋرناليستەردىڭ الامان جارىسى اياقتالدى

الماتىدا ءۇش اي بويى دۇبىرلەتە وتكەن دوپ دوداسى مارەسىنە كەلىپ جەتتى.

ءار جەكسەنبى سايىن قازاقتىڭ سپورت جانە تۋريزم اكادەمياسىنىڭ سپورت كەشەنىندە كەسكىلەسكەن كەزدەسۋلەر، جان بەرىسىپ جان الىسقان ويىندارمەن ءوربىپ وتىردى. ءيا، وسىنداي جۋرناليستەردىڭ دوپ دوداسى الماتى قالاسىندا كوپتەن بەرى وتپەگەن ەدى.

كەزىندە قازاق سپورت جۋرناليستيكاسىنىڭ اتاسى  سەيداحمەت بەردىقۇلوۆ پەن  بەلگىلى سپورت قالامگەرى ارىستان ءساريننىڭ اتىندا جۋرناليستەر اراسىندا  ءدۇبىرلى جارىستار ءوتىپ تۇراتىن. ول جارىستى ءتىپتى، قالا تۇرعىندارى توپتاسىپ كەلىپ تاماشالايتىن. سول دۇرمەكتى دودالاردا التىنبەك سارسەنباەۆ، نۇرتورە ءجۇسىپ، دياس وماروۆ، بۇركىت اياعان سەكىلدى ەلىمىزگە بەلگىلى تانىمال ازاماتتار دوپ تەۋىپ، ويىن كورىگىن قىزداراتىن. اسىرەسى، التىنبەك اعامىزدىڭ ورتادان سالعان فينتتەرىنە جانكۇيەرلەر ۇلكەن قوشامەتپەن قول سوقسا، جاسىل الاڭنىڭ شەتىندە جايعاسىپ الىپ، تارتىستى ويىنداردى تاماشالاپ وتىراتىن اقسامايلى اعالاردىڭ ايعايى قۋات بەرىپ، ويىنشىلاردىڭ رۋحىن اسقاقتاتۋشى ەدى. سوندا الاڭ شەتىنەن دۋالات يسابەكوۆ، عازيزبەك ءتاشىمباي، اشىربەك كوبىش، رابات جانىبەك، جۇمابەك كەنجالين سەكىلدى  ەلگە بەلگىلى جازۋشى، جۋرناليستەردى كورىپ ريزا بولساق، تيمۋر سەگىزباەۆ، قۇرالبەك ورداباەۆ، سەيىلدا بايشاقوۆ سىندى قازاق فۋتبولىندا اتتارى التىن ارىپمەن جازىلىپ قالعان فۋتبول ارداگەرلەرى جۋرناليستەردىڭ اراسىنان توپجارعان جەڭىمپازدارىن ءوز قولدارىمەن ماراپاتتاپ جاتاتىن.

ەندى سول جۋرناليستەر اراسىنداعى ارىستان سارين اتىنداعى تۋرنير كوپ جىلدان بەرى وتپەي جاتسا، سەيداعاڭدى ەسكە تۇسىرۋگە ارنالعان تۋرنير استاناعا اۋىپ كەتكەلى بەرى قىزىعىن بىرگە الا كەتكەندەي اسەر قالدىردى. نەگىزى سەيداعاڭ بار شىعارماشىلىق عۇمىرىن الماتىدا وتكىزگەنىن بىلەمىز. ونىڭ ۇستىنە بۇل قالا ادەبيەت پەن مادەنيەتتىڭ ورتالىعى  بولعاندىقتان، جارىستىڭ الماتىدا ءوتۋىنىڭ ماڭىزى زور ەدى. وكىنىشكە وراي، الماتىلىقتار سەيداعاڭنىڭ ءتۋرنيرىن تەلەديداردان جىلت ەتكەن جاڭالىق ارقىلى عانا قىزىقتاۋعا ءماجبۇر بولىپ وتىر. ال جۋرناليستەر ءۇشىن شاعىن فۋتبولدان ۇيىمداستىرىلاتىن جارىستاردىڭ ءمان-ماعىناسى  وتە زور. ويتكەنى، اقپارات ايدىنىندا جۇرگەن قالامگەرلەردىڭ ءبىر-بىرىمەن ارالاسىپ، سىرلاسىپ، شەر تارقاسىپ قايتۋى ءۇشىن ءدۇبىرلى دودانىڭ ورنى ايىرىقشا. مىنە، وسىنداي جارىستاردى اڭساپ جۇرگەن قالامگەرلەر ءۇشىن الماتىدا ءۇش اي بويى وتكەن  جۋرناليستەر ليگاسىنىڭ بەرەرى زور بولدى. قالامگەرلەردىڭ باسىن قوسۋعا ۇيىتقى بولعان جاندوس، قانات، ءماديار، داۋرەن سەكىلدى جاس تا بولسا باس بولىپ جۇرگەن جۋرناليستەر ەدى. سونىمەن تارتىسقا تولى وتكەن بۇل ءتۋرنيردىڭ دە مارەسىنە جەتىپ، جەڭىمپازدار مەن جۇلدەگەرلەر قۇرمەتپەن مارپاتتالدى. باس جۇلدەنى «بىرلىك» كومانداسى يەلەنسە، كۇمىس جۇلدە ءبىزدىڭ «نامىس» كومانداسىنا تابىس ەتىلدى. ال، قولا جۇلدە «ايبىن» كومانداسىنا بۇيىردى. سالتاناتتى جابىلۋ ساتىندە جەڭىسكە جەتكەن كوماندا ويىنشىلارىنىڭ مويىندارىنا تۇگەلدەي مەدالدار تاعىلدى. مەن دە اللا بۇيىرتىپ، جارىستىڭ «ەڭ ۇزدىك شابۋىلشىسى» دەگەن اتاعىنا يە بولدىم. ارينە كوماندالاستارىما ريزاشىلىعىم ەرەكشە. سول ءبىر ءۇيدىڭ بالاسىنداي، ءبىر قولدىڭ سالاسىنداي، ۇجىمدىق ويىن كورسەتە بىلگەن كوماندامىزدىڭ ارقايسىسى دا ۇلكەن ماراپاتقا لايىقتى. سونداي-اق، جەكەلەي نوميناتسيالار بويىنشا دۋلات كارىباەۆ – «ەڭ ۇزدىك ويىنشى»، جاناربەك ءاشىمجان – «ەڭ  ۇزدىك قورعاۋشى»، شوحان ماقانوۆ – «ەڭ ۇزدىك قاقپاشى»، سرايىل سمايىل – «ەڭ ۇزدىك ارداگەر ويىنشى» اتاعىمەن مارپاتاتتالدى.

جارىستى ۇيىمداستىرۋشىلار الداعى ۋاقىتتا ءتۋرنيردىڭ دەڭگەيىن كوتەرۋدى جوسپارلاپ وتىر ەكەن. ەندەشە، باق وكىلدەرىنىڭ باسىن قوسىپ سالاۋىتتىلىققا جەتەلەيتىن مۇنداي جارىستىڭ جولى وڭ بولسىن.

اقىن ورداباي ۇلى،

الماتى