Almatyda jýrnalısterdiń alaman jarysy aıaqtaldy

Almatyda úsh aı boıy dúbirlete ótken dop dodasy máresine kelip jetti.

Ár jeksenbi saıyn Qazaqtyń Sport jáne Týrızm akademııasynyń sport kesheninde keskilesken kezdesýler, jan berisip jan alysqan oıyndarmen órbip otyrdy. Iá, osyndaı jýrnalısterdiń dop dodasy Almaty qalasynda kópten beri ótpegen edi.

Kezinde qazaq sport jýrnalıstıkasynyń atasy  Seıdahmet Berdiqulov pen  belgili sport qalamgeri Arystan Sarınniń atynda jýrnalıster arasynda  dúbirli jarystar ótip turatyn. Ol jarysty tipti, qala turǵyndary toptasyp kelip tamashalaıtyn. Sol dúrmekti dodalarda Altynbek Sársenbaev, Nurtóre Júsip, Dıas Omarov, Búrkit Aıaǵan sekildi elimizge belgili tanymal azamattar dop teýip, oıyn kórigin qyzdaratyn. Ásiresi, Altynbek aǵamyzdyń ortadan salǵan fıntterine jankúıerler úlken qoshametpen qol soqsa, jasyl alańnyń shetinde jaıǵasyp alyp, tartysty oıyndardy tamashalap otyratyn aqsamaıly aǵalardyń aıǵaıy qýat berip, oıynshylardyń rýhyn asqaqtatýshy edi. Sonda alań shetinen Dýalat Isabekov, Ǵazızbek Táshimbaı, Áshirbek Kóbish, Rabat Jánibek, Jumabek Kenjalın sekildi  elge belgili jazýshy, jýrnalısterdi kórip rıza bolsaq, Tımýr Segizbaev, Quralbek Ordabaev, Seıildá Baıshaqov syndy qazaq fýtbolynda attary altyn áripmen jazylyp qalǵan fýtbol ardagerleri jýrnalısterdiń arasynan topjarǵan jeńimpazdaryn óz qoldarymen marapattap jatatyn.

Endi sol jýrnalıster arasyndaǵy Arystan Sarın atyndaǵy týrnır kóp jyldan beri ótpeı jatsa, Seıdaǵańdy eske túsirýge arnalǵan týrnır Astanaǵa aýyp ketkeli beri qyzyǵyn birge ala ketkendeı áser qaldyrdy. Negizi Seıdaǵań bar shyǵarmashylyq ǵumyryn Almatyda ótkizgenin bilemiz. Onyń ústine bul qala ádebıet pen mádenıettiń ortalyǵy  bolǵandyqtan, jarystyń Almatyda ótýiniń mańyzy zor edi. О́kinishke oraı, almatylyqtar Seıdaǵańnyń týrnırin teledıdardan jylt etken jańalyq arqyly ǵana qyzyqtaýǵa májbúr bolyp otyr. Al jýrnalıster úshin shaǵyn fýtboldan uıymdastyrylatyn jarystardyń mán-maǵynasy  óte zor. О́ıtkeni, aqparat aıdynynda júrgen qalamgerlerdiń bir-birimen aralasyp, syrlasyp, sher tarqasyp qaıtýy úshin dúbirli dodanyń orny aıyryqsha. Mine, osyndaı jarystardy ańsap júrgen qalamgerler úshin Almatyda úsh aı boıy ótken  Jýrnalıster lıgasynyń bereri zor boldy. Qalamgerlerdiń basyn qosýǵa uıytqy bolǵan Jandos, Qanat, Mádııar, Dáýren sekildi jas ta bolsa bas bolyp júrgen jýrnalıster edi. Sonymen tartysqa toly ótken bul týrnırdiń de máresine jetip, jeńimpazdar men júldegerler qurmetpen marpattaldy. Bas júldeni «Birlik» komandasy ıelense, kúmis júlde bizdiń «Namys» komandasyna tabys etildi. Al, qola júlde «Aıbyn» komandasyna buıyrdy. Saltanatty jabylý sátinde jeńiske jetken komanda oıynshylarynyń moıyndaryna túgeldeı medaldar taǵyldy. Men de Alla buıyrtyp, jarystyń «Eń úzdik shabýylshysy» degen ataǵyna ıe boldym. Árıne komandalastaryma rızashylyǵym erekshe. Sol bir úıdiń balasyndaı, bir qoldyń salasyndaı, ujymdyq oıyn kórsete bilgen komandamyzdyń árqaısysy da úlken marapatqa laıyqty. Sondaı-aq, jekeleı nomınaııalar boıynsha Dýlat Káribaev – «Eń úzdik oıynshy», Janarbek Áshimjan – «Eń  úzdik qorǵaýshy», Shohan Maqanov – «Eń úzdik qaqpashy», Sraıyl Smaıyl – «Eń úzdik ardager oıynshy» ataǵymen marpatattaldy.

Jarysty uıymdastyrýshylar aldaǵy ýaqytta týrnırdiń deńgeıin kóterýdi josparlap otyr eken. Endeshe, BAQ ókilderiniń basyn qosyp salaýyttylyqqa jeteleıtin mundaı jarystyń joly oń bolsyn.

Aqyn ORDABAIULY,

ALMATY