ۇلتتىق سپورتتىڭ جاتتىقتىرۋشىلارى ماراپاتتالدى

سپورت مەرەكەسى كۇنى ۇلتتىق سپورت سالاسىنا ەڭبەگى سىڭگەن ءۇش ازامات مادەنيەت جانە سپورت مينيسترلىگىنىڭ «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن» توسبەلگىسىمەن ماراپاتتالدى، دەپ حابارلادى قازاقستان ۇلتتىق سپورت قاۋىمداستىعى.

تامىز ايىنىڭ ءۇشىنشى جەكسەنبىسى – سپورت مەرەكەسى كۇنى. وسى مەرەكە قارساڭىندا، ناقتى ايتقاندا 15 شىلدە كۇنى ۇلتتىق سپورت قاۋىمداستىعى ارنايى كەڭەس وتكىزىپ، كوپ جىلدار بويى ۇلتتىق سپورتتىڭ دامۋى ءۇشىن تەر توككەن بىرنەشە ازاماتتاردىڭ  كانديداتۋراسىن «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن»  توسبەلگىسىنە ۇسىنعان بولاتىن. قاۋىمداستىق كەڭسەسىندە وتكەن كەڭەستىڭ №7 حاتتاماسىنا ەسىمدەرى تىركەلگەن ازاماتتار اراسىنان ءۇش جاتتىقتىرۋشىمىزدىڭ 16 تامىز كۇنى مادەنيەت جانە سپورت مينيسترلىگىنىڭ ماراپاتىنا يە بولعانىن قۋانا حابارلايمىز. اتاپ ايتقاندا، اقمولا وبلىسىنان مارات قويشينگە، اقتوبە وبلىسىنان اماندىق قاراباەۆقا جانە جامبىل وبلىسىنان نۇرداۋلەت مومىنوۆقا مادەنيەت جانە سپورت ۆيتسە-ءمينيسترى رامازانوۆ ەلدوس مۇرات ۇلى «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن»  توسبەلگىسىن تابىس ەتتى. ەسكە سالىپ وتەلىك، سپورت مەرەكەسى قارساڭىندا مادەنيەت جانە سپورت مينيسترلىگى وتاندىق سپورت سالاسىنىڭ دامۋىنا ۇلەس قوسىپ كەلگەن 30 ادامعا ەرەكشە قۇرمەت كورسەتتى.

سۋرەتتە: مادەنيەت جانە سپورت ۆيتسە-ءمينيسترى ەلدوس رامازانوۆ پەن «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن»  توسبەلگىسىنىڭ يەگەرى مارات قويشين.

مارات  قويشين  2003 جىلدان باستاپ اقمولا وبلىسى  دەنە شىنىقتىرۋ جانە سپورت باسقارماسىنا قاراستى «بالۋان شولاق اتىنداعى  ۇلتتىق سپورت تۇرلەرىنەن وبلىستىق بالالار-جاسوسپىرىمدەر سپورت مەكتەبىنىڭ»  ديرەكتورى،  ۇلتتىق سپورت تۇرلەرىنەن وبجسم-نە دەيىن  دەنە شىنىقتىرۋ  پانىنەن مۇعالىمى، ەركىن كۇرەستەن  جاتتىقتىرۋشى-وقىتۋشى.

اقمولا وڭىرىندە ۇلتتىق سپورت تۇرلەرىنىڭ دامۋىنا، جان-جاقتى ناسيحاتتالۋىنا ۇزاق جىلدار بويى زور ۇلەس قوسىپ كەلگەن مارات قويشين  «اقمولا وبلىستىق «ۇلتتىق سپورت تۇرلەرىنەن» قوعامدىق بىرلەستىگىنىڭ پرەزيدەنتى، اقمولا وبلىسىنىڭ قازاق كۇرەسىنەن اعا جاتتىقتىرۋشىسى،  قازاقستان رەسپۋبليكاسىنىڭ  ۇلتتىق جوعارعى دارەجەدەگى تورەشىسى.

سۋرەتتە: مادەنيەت جانە سپورت مينيسترلىگى سپورت جانە دەنەشىنىقتىرۋ  ىستەرى كوميتەتىنىڭ توراعاسى سەرىك ساپيەۆ پەن «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن»  توسبەلگىسىنىڭ يەگەرى اماندىق قاراباەۆ.

 اماندىق  قاراباەۆ   اقتوبە وبلىسىنىڭ دەنە شىنىقتىرۋ جانە سپورت باسقارماسىنا قاراستى   «وبلىستىق مامانداندىرىلعان ۇلتتىق سپورت تۇرلەرىنەن بالالار-جاسوسپىرىمدەر سپورت مەكتەبىنىڭ» ات سپورتىنان اعا جاتتىقتىرۋشىسى. اقتوبە وڭىرىندە ۇلتتىق ات سپورتىن دامىتۋعا ۇلكەن ۇلەسىن قوسىپ كەلگەن ازامات. قاراباەۆ اماندىقتىڭ قالالىق، وبلىستىق، رەسپۋبليكالىق جارىستاردا جۇلدەلى ورىندارعا يە بولعان شاكىرتتەرى مول. اتاپ ايتقاندا، ەمبەرگەنوۆ ءجاسادىل،  تۇرسىنباەۆ بەكارىس،  جاناربەك ازات،  ەلجانوۆ نۇرحان،  تۇرسىنباەۆ اباي،  ەسەنعارين اسلان،  جانگەلدى نۇرداۋلەت قاتارلى شاكىرتتەرى اۋدارىسپاق، كوكپار، تەڭگە ىلۋدەن وتكەن رەسپۋبليكالىق جارىستاردىڭ جۇلدەگەرى اتانعان.

سۋرەتتە: مادەنيەت جانە سپورت ۆيتسە-ءمينيسترى ەلدوس رامازانوۆ پەن «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن»  توسبەلگىسىنىڭ يەگەرى نۇرداۋلەت مومىنوۆ.

نۇرداۋلەت مومىنوۆ – 2004 جىلدان باستاپ جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى «ۇلتتىق سپورت تۇرلەرىنەن «اۋليە-اتا» كاسىپقوي كلۋبىنىڭ» باسشىسى. جامبىل وبلىسىنىڭ ۇلتتىق ات سپورتى تۇرلەرى فەدەراتسياسىنىڭ پرەزيدەنتى. كوكپاردان «قازاقستان رەسپۋبليكاسىنىڭ سپورت شەبەرى» جانە «قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى».

نۇرداۋلەت مومىنوۆ كوماندالىق كوكپار سپورتىندا ۇزاق جىل تەر توككەن ايتۋلى بالۋان. كوكپاردان قازاقستان چەمپيوناتتارىنىڭ 9 دۇركىن جەڭىمپازى (2001، 2002، 2005، 2007، 2009، 2010، 2013، 2015، 2016 جىلدار) اتاندى. «اق بيداي» اۋىل سپورتى ويىندارىنىڭ 2 دۇركىن جەڭىمپازى (2003، 2013 جىلدار). «ەۋروازيا» كۋبوگىنىڭ يەگەرى (تاراز، 2003 جىل). ۇلتتىق سپورت تۇرلەرىنەن رەسپۋبليكالىق فەستيۆالدىڭ 3 دۇركىن جەڭىمپازى (2004، 2011، 2015 جىلدار).

قازىرگى كەزدە نۇرداۋلەت مومىنوۆ كوماندالىق كوكپاردان رەسپۋبليكالىق باس تورەشى.

ۇلتتىق سپورت جاتتىقتىرۋشىلارىنىڭ مادەنيەت جانە سپورت مينيسترلىگىنىڭ ماراپاتىنا يە بولۋى ۇلتتىق سپورت سالاسىنداعى بارشا ازاماتتارعا ورتاق قۋانىش. سوندىقتان،  «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن»  توسبەلگىسىنە يە بولعان جاتتىقتىرۋشىلاردى ۇلتتىق سپورتتىڭ قالىڭ جانكۇيەرى اتىنان شىن جۇرەكتەن قۇتتىقتايمىز!