الماتىدا چەمپيوندار ۇستاحاناسى وقۋشىلارعا ەسىگىن اشتى

ەلىمىزدە 1-قىركۇيەك كۇنى العاشقى قوڭىراۋ سوعىلىپ، بالالار جاڭا وقۋ جىلىنا قادام باساتىنى داستۇرگە اينالعان.  وسىلايشا بۇگىن الماتىداعى كəركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ شاڭىراعى دا  بىلىم نارىنەن سۋسىندايتىن ءجاسوسپىرىم وقۋشىلارىنا ەسىگىن ايقارا اشتى.

وقۋ جىلىنىڭ باستالۋىنا ارنالعان جيىنعا ساپ تۇزەگەن وقۋشىلار، سىنىپاتاستارىمەن  قاۋىشىپ، جاز بويى جيعان اڭگىمەلەرىن ايتىپ تاۋىسا الماۋدا.  سپورتتى دا ءبىر ۇلى ونەر  دەپ قاراساق، وقۋ مەن سپورتتى بىرگە الىپ جۇرەتىن جاس قىراندار ءۇشىن جىل ون ەكى اي ءبىر ساتتە بوساڭسىماۋ كەرەك. ويتكەنى، قازاقستاننىڭ نامىسىن حالىقارالىق جارىستاردا ابىرويمەن قورعايتىن تالانتتى سپورتشىلارىمىزدىڭ كوپشىلىگى وسى كيەلى شاڭىراقتان قاناتتارىن قامداپ ۇشىپ شىعىپ جاتىر دەسەك ارتىق بولماس. سوندىقتان دا بۇل مەكتەپتە وقيتىن دارىندى جاستارعا ارتىلار جاۋاپكەرشىلىك وتە جوعارى.

العاشقى قوڭىرۋدا ءسوز العان ايتۋلى مەكتەپ-ينتەرنات كوللەدجى ديرەكتورىنىڭ  ورىنباسارلارى دانارا بايدوسوۆا مەن جاننا بايدۋللاەۆا كەلەر جىل ءتورت جىلدا ءبىر كەلەتىن ءدۇبىرلى وليمپيادا ويىندارى وتەتىن ەرەكشە جىل ەكەنىن تىلگە تيەك ەتىپ، جاسوسپىرىمدەرگە وقۋدا ۇزدىك، سپورتتا الدا بولۋلارىن تىلەدى. ايتۋلى مەكتەپ-ينتەرناتتىڭ ديرەكتورى سەيىلحان باقتىعالي ۇلى قاراقوۆ قازىر جاپونيادا ءوتىپ جاتقان الەم چەمپيوناتىندا ەل نامىسىن قورعاپ جاتقان بالۋاندارىمىزعا قولداۋ-قوشەمەت كورسەتىپ ءجۇر ەكەن. سول شەتەلدە جۇرگەن بىلىكتى باسشى ءوزىنىڭ وقۋشىلارىنا حابارلاسىپ، سالەمىن جەتىكىزىپتى. ول سالەمدەمەدە «جاڭا وقۋ جىلىندا ءبىلىم نارىمەن سۋسىنداپ، وتانسۇيگىشتىك رۋحتا اقىلدى ازامات بولىپ، قازاقستاننىڭ نامىسىن ابىرويمەن قورعايتىن سپورت ساڭلاقتارى بولىپ شىعۋىنا تىلەكشى ەكەنىن جولداپ جىبەرگەن ەكەن.

جيىن بارىسىندا جىل بويى جاقسى كورسەتكىشتەرمەن كوزگە ىلىنگەن ۇزدىك وقۋشىلار قۇرمەتپەن ماراپاتتالدى. كىم ءبىلسىن، وسى مەكتەپكە بيىل عانا وقۋعا ءتۇسىپ، العاشقى وقۋ جىلىنا اياق باسقالى وتىرعان تالانتتى ۇل-قىزداردىڭ اراسىندا الەم، وليمپيادا بيىگىن باعىندىرار دارابوز سپورتشىلار جۇرگەن بولار. دەگەنمەن دە الدىڭعى تولقىندى اعالارىنىڭ سالىپ كەتكەن سارا جولدارى وسى ىنتالى بالالارىمىزعا جۇعىستى بولسا ەكەن دەپ تىلەيمىز. مىسالى، جاقىندا عانا  جاپونيادا دزيۋدودان ءوتىپ جاتقان الەم چەمپيوناتىندا قولا جۇلدەنى جەڭىپ اپەرگەن اتى ەلىمىزگە ءمالىم تالانتتى بالۋان ەلدوس سمەتوۆ وسى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ تۇلەگى. سوندىقتان دا وسىنداي رەسپۋبليكامىزداعى شوقتىعى جوعارى تۇرعان وسىنداي بەلدى وقۋ ورىندارىنىڭ تابىلدىرىعىن اتتاعان بولاشاق ءجاسوسپىرىم تالانتتار ءۇشىن زور مارتەبە ەكەنى بەلگىلى.

«ۇستازى مىقتىنىڭ ۇستامى مىقتى»، دەمەكشى،  بۇل مەكتەپ-ينتەرنات كوللەدجدە ءدارىس بەرەتىن ۇستاز-جاتتىقتىرۋشىلاردىڭ دا تالاپقا ساي دەڭگەيلەرى وتە جوعارى. تارىداي بولىپ كىرىپ، تاۋداي بولىپ شىعاتىن وقۋشىلاردىڭ الار اسقار بيىگى ءالى الدا. ەندەشە، جاسوسپىرىمدەرگە اقجول دەسەك وڭ بولار.

اقىن ورداباي ۇلى،

الماتى