«التىن تۇلپار – جايىق جاعاسىنداعى» الامان بايگە اياقتالدى

«التىن تۇلپار»  العاش رەت  اتىراۋدىڭ ءتوسىن ءبىر دۇبىرلەتتى. بەسىنشى مارتە ۇيىمداستىرىلعان 51 شاقىرىمدىق ات جارىسىن تاماشالاۋ اتىراۋلىقتارعا بۇيىردى.  قازاقستان رەسپۋبليكاسى ۇلتتىق سپورت قاۋىمداستىعى مەن اتىراۋ وبلىسى اكىمدىگى جانە ۇلتتىق سپورت قاۋىمداستىعىنىڭ اتىراۋ وبلىستىق فيليالىنىڭ ۇيىمداستىرۋىمەن وتكەن الاماندا ون ەكى ءوڭىردىڭ قىرىققا جۋىق جۇيرىگى باق سىنادى. «Nur Otan» پارتياسى مەن مادەنيەت جانە سپورت مينيسترلىگىنىڭ قولداۋىمەن وتكەن بايگەنىڭ باس جۇلدەسى 10 ملن تەڭگە. ال 9 اتقا جۇلدە بەرگەن سايىستىڭ جالپى جۇلدە قورى 22 ملن تەڭگە بولدى، دەپ حابارلادى ۇلتتىق سپورت قاۋىمداستىعى.

2017 جىلعى «التىن تۇلپاردا» تارازدىڭ تۇلپارى «سامالدان» ارقان بويى عانا ارتتا كەلىپ، ەكىنشى ورىندى يەلەنگەن جەتىسۋدىڭ جۇيرىگى «قويانقاسقانى» ارادا ەكى جىل وتكەندە يەلەرى قىزىلوردا وبلىسى اتىنان «التىن تۇلپارعا» تاعى دا باپتاپ قوستى.  «قويانقاسقا» سايگ ۇلىك بۇل جولى ناعىز بابىندا ەكەن. ات يەسى ماحانوۆ بەردىبەكتىڭ ايتۋىنشا بۇل جارىسقا جۇيرىكتى ءبىر اي بويى اتىراۋدا ارنايى باپتاعان ەكەن. ات باپكەرىنىڭ ەڭبەگى اقتالىپ «قويانقاسقا» جارىس جولىنا شىققان قىرىققا جۋىق سايگ ۇلىكتىڭ  الدى بولىپ، 10 ميلليون تەڭگەلىك باس بايگەنى ولجالاپ قايتتى.

جانكۇيەر جادىندا بولسا،  «التىن تۇلپار» رەسپۋبليكالىق ءتۋرنيرىنىڭ باس بايگەسىن 2014 جىلعى بايگەدە 75 جۇيرىك اراسىنان «باقتورى»، 2015 جىلعى بايگەدە 96 جۇيرىك اراسىنان «سامال»، 2016 جىلعى بايگەدە 78 جۇيرىك اراسىنان «جاننۇر»، 2017 جىلعى بايگەدە 37 جۇيرىك  اراسىنان ەكىنشى رەت «سامال» باس بايگەنى ۇتقان ەدى.

«التىن تۇلپار – جايىق جاعاسىنداعى» الامان بايگەدە جۇلدە العان جۇيرىكتەر:

1-ورىن: قىزىلوردا وبلىسىنان كەلگەن «قويانقاسقا» اتتى اعىلشىن تۇقىمدى جيرەن بيە. شاباندوزى – عالىمنۇر نوعايبەك، ات يەسى – بەردىبەك مىحانوۆ، باپكەرى – قۋات ءابسالياموۆ (10 ملن تەڭگە).

2-ورىن: جامبىل وبلىسىنان كەلگەن «شىمشىق» اتتى 7 جاستاعى بۋدان تورى بيە. شاباندوزى – الديار سانسىزباي، ات يەسى – جاسۇلان ابدىبەكوۆ، باپكەرى – ماقسات مۋراحانباەۆ (5 ملن تەڭگە).

3-ورىن: جامبىل وبلىسىنان كەلگەن «دوس» اتتى 5 جاستاعى ارابى تورى ايعىر. شاباندوزى – نۇر سايلاۋ، ات يەسى – ەلدوس سۇلتانبەكوۆ، باپكەرى – سەرىك الىمبەكوۆ  (2 500 000).

4-ورىن: ماڭعىستاۋ وبلىسىنان كەلگەن «ايتوبەل» اتتى 5 جاسار قوڭىر بۋدان ايعىر. شاباندوزى – ەربولات جاڭبىرباەۆ، ات يەسى ءارى باپكەرى – كەلدىباي يبراەۆ (1 500 000).

5-ورىن: اتىراۋ وبلىسى ماحامبەت اۋدانىنان كەلگەن «جەزكيىك» اتتى اعىلشىن تۇقىمدى 7 جاسار قۇلا بيە. شاباندوزى – يناپحان نۇراسىل، ات يەسى – مارات وتەپوۆ، باپكەرى – قانات ماحامەتاليەۆ (1 ملن تەڭگە).

6-ورىن: اتىراۋ وبلىسى جىلوي اۋدانىنان كەلگەن 2-ءشى ءنومىرلى «جەتىقازىنا» اتتى بۋدان ايعىر. شاباندوزى – جانداۋلەت شالابەكوۆ، ات يەسى – «باقاي» كورپاراتسياسى، باپكەرى – ازامات ءپىرجانوۆ (750 000).

7-ورىن: الماتى وبلىسى اققاينار اۋىلىنان كەلگەن 16-شى ءنومىرلى «جاۋجۇرەك» اتتى 4 جاستاعى قازاقى كۇرەڭ ايعىر. شاباندوزى – ەراسىل ادىلبەك، ات يەسى – بەكارىس ۇمبەتوۆ، بەپكەرى – زاڭعار بايقانباەۆ (550 000).

8-ورىن: الماتى وبلىسى تالعار اۋدانىنان كەلگەن 27-ءشى ءنومىرلى «وسكەمەن» اتتى 4 جاسار اعىلشىن تۇقىمدى تورى ايعىر. شاباندوزى – نۇربولات سۇنەتاي، ات يەسى – مەرحات بۇلعىنوۆ، باپكەرى – نۇرجىگىت تابىلديەۆ (400 000 تەڭگە).

9-ورىن: اتىراۋ وبلىسى، يندەر اۋدانىنان كەلگەن 21-ءشى ءنومىرلى «امينا» ەسىمدى 6 جاستاعى كوك بيە. شاباندوزى – باقداۋلەت ەسىمجان، ات يەسى ءارى باپكەرى – ولجاس شونىشەۆ (300 000 تەڭگە).

سونىمەن بيىلعى «التىن تۇلپار» الامان بايگەسىندە وسى اتتارى اتالعان توعىز تۇلپار جۇلدە الدى. الامان بايگەنىڭ جەڭىمپازدارىن «Nur Otan» پارتياسىنىڭ حاتشىسى عابيدوللا وسپانقۇلوۆ، اتىراۋ وبلىسى اكىمىنىڭ ءبىرىنشى ورىنباسارى سەرىك جامبىل ۇلى، ۇلتتىق سپورت قاۋىمداستىعىنىڭ باس حاتشىسى نۇرسۇلتان يبراگيموۆ قاتارلى ازاماتتار ماراپاتتادى.

(بيىلعى «التىن تۇلپاردا» «قويانقاسقا» سايگ ۇلىك باس بايگەنى الدى)