قازاقستان قۇراماسى ارمرەستلينگتەن 134 مەدال جەڭىپ الدى

رۋمىنيانىڭ كونستانتسا قالاسىندا ارمرەستلينگتەن الەم چەمپيوناتى ءوز مارەسىنە جەتتى. بۇل تۋرالى سپورت جانە دەنە شىنىقتىرۋ ىستەرى كوميتەتى «سپورتتى دامىتۋ ديرەكتسياسى» رمقك ءباسپاسوز قىزمەتى حابارلادى.

قورىتىندى كەزەڭ ەرەسەكتەر، ارداگەرلەر، ەستۋ قابىلەتى زاقىمدانعان ادامدار مەن مۇمكىندىگى شەكتەۋلى سپورتشىلار اراسىندا ءوتتى.

جارىستىڭ العاشقى كۇنى جاستار مەن جاسوسپىرىمدەر اراسىندا ەل قۇراماسى 32 التىن، 22 كۇمىس، 19 قولا جۇلدە يەلەندى. بۇل سىندا جالپى كوماندالىق  ەسەپتە قازاقستان رەسەي مەن گرۋزيانى ارتقا تاستاپ ءبىرىنشى ورىنعا شىقتى.

ارداگەرلەر مەن مۇمكىندىگى شەكتەۋلى سپورتشىلار اراسىنداعى باسەكەدە دە وتانداستارىمىز قارسىلاستارىنا دەس بەرمەدى. مۇمكىندىگى شەكتەۋلى سپورتشىلار 8 التىن، 7 كۇمىس، 11 قولا جۇلدەنى جەڭىپ الدى. ال، ارداگەرلەر 3 التىن، 2 كۇمىس، 2 قولا مەدالدى يەلەندى.

جارىستىڭ شەشۋشى كەزەڭى ەرەسەكتەر اراسىندا ءوتتى. سپورتشىلارىمىز ەل قورجىنىنا 8 التىن، 9 كۇمىس، 11 قولا مەدال سالىپ، ەرلەر قۇراماسى ءبىرىنشى ورىننان كورىندى.

54 مەملەكەتتەن 1400  سپورتشى قاتىسقان باسەكەدە  ەل نامىسىن 146 سپورتشى قورعادى.

الەم چەمپيوناتىنىڭ جالپى قورىتىندىسى بويىنشا ەل قۇراماسى  51 التىن، 40 كۇمىس، 43 قولا جۇلدەمەن ەكىنشى ورىنعا تابان تىرەدى. ءبىرىنشى ورىندى رەسەي فەدەراتسياسى، ءۇشىنشى ورىندى گرۋزيا سپورتشىلارى يەلەندى.