بەساسىقتان ونلاين تۋرنير ءبارىنىڭ ويىنان شىقتى

ۇلتتىق عىلىمي-پراكتيكالىق دەنە تاربيەسى ورتالىعى كارانتين جاريالانعالى بەرى ستۋدەنتتەر مەن وقۋشىلار اراسىندا  توعىزقۇمالاق، شاحمات، بەساسىق، اسىق اتۋ، سكاكالكادان ونلاين تۋرنيرلەر وتكىزىپ كەلەدى.    

 1 ماۋسىم بالالاردى قورعاۋ كۇنىنە وراي «بارلىعى بالالار ءۇشىن» رەسپۋبليكالىق اكتسياسى اياسىندا مەكتەپ وقۋشىلارى (قىزدار) اراسىندا ۇيىمداستىرىلعان بەس اسىقتان ونلاين تۋرنير جەڭىمپازدارى انىقتالدى. بۇل تۋرالى  بىلىم جانە عىلىم مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ ءباسپاسوز قىزمەتى حابارلادى.

ءبىرىنشى ورىندى امانتاي قىزعالداق (اقمولا) جەڭىپ الدى. ەكىنشى ورىندى سەرىك كاۋسار (نۇر-سۇلتان) يەلەنسە، ءۇشىنشى ورىنعا سانيا زەيكەنوۆا (سقو) مەن ديلناز مىقتىباەۆا (قوستاناي) يە بولدى.

سايىستىڭ باس تورەشىسى  اقجان سۇراعانوۆ: «2013 جىلدان باستاپ سولتۇستىك قازاقستان وبلىسى اسىق ويىنىنىڭ اعا باپكەرى بولىپ جۇمىس اتقارىپ كەلەمىن. 2017 جىلى وبلىسىمىزدا اسىق ويىنى فەدەراتسياسىنىن اشىپ، سونى باسقارامىن. ءبىلىم-يننوۆاتسيا ليتسەيىندە دەنە شىنىقتىرۋ ءپانى مۇعالىمىمىن. وبلىستىق بالالار جانە جاسقسپىرىمدەردىڭ سپورت مەكتەبىندە اسىق ويىنىنان اعا جاتتىقتىرۋشىمىن. جوعارى دەڭگەيلى باپكەرمىن. وقۋشىلارىم بىرنەشە رەسپۋبليكالىق، وبلىستىق جارىستاردىڭ چەمپيوندارى بولعان. قازىرگى جاعدايعا بايلانىستى وتكىزىلىپ وتىرعان ونلاين تۋرنيرلەر بالالارعا جاڭا مۇمكىندىكتەر بەرىپ جاتىر دەپ ويلايمىن. ەكراننىڭ ارعى جاعىندا ويىن جيناقتاپ، وزىنە سەنىمدى بولۋعا كومەكتەسەدى. بالالار ءۇشىن ءاربىر سايىس تاجىريبە جيناقتاۋ ءۇشىن ماڭىزدى»، – دەدى.

بەساسىقتان وتكەن ونلاين ءتۋرنيردىڭ ەرەكشەلىگى – تورەشىلەر ءار قاتىسۋشىعا ۋاتساپپەن جەكە حابارلاسىپ، ويىندى باقىلاپ، تورەلىك ەتۋى ءتيىس. ال، شاحمات، توعىزقۇمالاق تۋرنيرلەرى ارنايى پلاتفورمادا ءوتتى. بەساسىقتا تورەشىلەر (مۇعالىمدەر) ءار قاتىسۋشىعا جەكە جەكە حابارلاسىپ وتىردى. وسىنداي ەرىنبەي، جالىقپاي جاس ۇرپاقتىڭ يگىلىگى ءۇشىن جۇمىس ىستەيتىن مۇعالىمدەر، ءوز ءىسىنىڭ كاسىبي شەبەرلەرى بارلىق قۇرمەتكە لايىق.