بۇقارالىق سپورتتى دامىتۋ ماسەلەسى قارالدى

مەملەكەت باسشىسىنىڭ 1 قىركۇيەكتەگى قازاقستان حالقىنا جولداۋىنداعى تاپسىرمالارى بويىنشا پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن 18 قىركۇيەكتە بەينەكونفەرەنتسيا رەجيمىندە بۇقارالىق سپورتتى دامىتۋ ماسەلەسى بويىنشا كەڭەس ءوتتى. بۇل تۋرالى ءبىلىم جانە عىلىم مينيسترلىگىنىڭ «ۇلتتىق عىلىمي-پراكتيكالىق دەنە تاربيەسى ورتالىعى» رمقك ءباسپاسوز قىزمەتى حابارلادى.

بالالار مەن جاستاردى سپورت ۇيىرمەلەرىنە تارتۋ، جالپى ءبىلىم بەرەتىن مەكتەپتەردەگى سپورت زالدارى مەن جابدىقتاردىڭ تاپشىلىعى ماسەلەسىنە ەرەكشە نازار اۋدارىلىپ، سپورتپەن اينالىساتىن ازاماتتاردىڭ ۇلەسىن ارتتىرۋ، بۇقارالىق سپورتتى قارجىلاندىرۋدى كاسىبي كلۋبتارعا جۇمسالاتىن شىعىنداردى قىسقارتۋ ەسەبىنەن ارتتىرۋ، سپورت زالدارى مەن مەكتەپتەردەگى جابدىقتار تاپشىلىعىن شەشۋ تۋرالى ناقتى تاپسىرمالار بەرىلگەن ەدى.

وسىعان بايلانىستى بۇگىن ءبىلىم جانە عىلىم ۆيتسە-ءمينيسترى شولپان كارينوۆانىڭ توراعالىعىمەن وبلىستىق ءبىلىم باسقارمالارى باسشىلارى مەن ورىنباسارلارى، ايماقتىق دەنە تاربيەسى ورتالىقتارى باسشىلارى جانە ادىسكەرلەرىنىڭ قاتىسۋىمەن بۇگىن  ونلاين جينالىس ءوتتى. ش.تاڭاتقىزى وڭىرلەردەگى مەكتەپ وقۋشىلارى اراسىندا بۇقارالىق سپورتتى دامىتۋ  قىزمەتتەرى جونىندە بىرقاتار كەمشىلىكتەردى ايتتى.

جيىندا بەلگىلى بولعانداي، ەلىمىز بويىنشا جالپى ءبىلىم بەرەتىن مەكتەپتەر مەن كوللەدجدەردىڭ مۇعالىمدەرىنە وقۋ-ادىستەمەلىك كومەك كورسەتەتىن، بۇقارالىق سپورتتى دامىتۋ، سپورت تۇرلەرى بويىنشا وبلىستىق ىرىكتەۋ جارىستارىن ۇيىمداستىرۋ مەن وتكىزۋ بويىنشا جۇمىس جۇرگىزەتىن وڭىرلىك دەنە شىنىقتىرۋ ورتالىقتارى 11 وبلىستا عانا جۇمىس ىستەيدى. وكىنىشكە وراي، شىمكەنت قالاسى مەن اقتوبە، شىعىس قازاقستان، باتىس قازاقستان، قاراعاندى، تۇركىستان وبلىستارىندا دەنە شىنىقتىرۋ بويىنشا وڭىرلىك ورتالىقتار جوق. بۇل دەنە شىنىقتىرۋ-ساۋىقتىرۋ جانە بۇقارالىق جۇمىستاردى ۇيىمداستىرۋ مەن جۇرگىزۋ دەڭگەيىنە كەرى اسەر ەتەدى. سونداي-اق، قازىرگى تاڭدا دەنە شىنىقتىرۋ-ساۋىقتىرۋ جۇمىستارىن ۇيىمداستىرۋ ءۇشىن بىلىكتى ماماندار مەن قاراپايىم جاعدايلار جەتىسپەيدى.

ء–بىلىم بەرۋ ۇيىمدارىندا دەنە شىنىقتىرۋ مەن سپورتتى دامىتۋ ماسەلەلەرىندە ءتيىستى ءىس-شارالاردىڭ جەتكىلىكسىزدىگى ايقىن بايقالادى. جەرگىلىكتى ءبىلىم باسقارمالارى ۇيىمداستىراتىن سپورتتىق ءىس-شارالارعا نەگىزىنەن بالالار مەن جاسوسپىرىمدەر سپورت مەكتەپتەرىنىڭ تاربيەلەنۋشىلەرى قاتىسادى. ارينە، بۇل وقۋشىلار اراسىندا سپورتتىق باسەكەلەستىك پەن جارىستىڭ بۇقارالىق سيپات الۋىنا كەرى اسەر ەتەدى. ناتيجەسىندە بالالاردىڭ باسىم بولىگىنىڭ سپورتقا دەگەن قىزىعۋشىلىعى تومەندەيدى، ال جارىسقا قاتىسۋشىلاردىڭ قۇرامى سىنىپتان تىس جۇمىستار اياسىندا ءبىلىم بەرۋ ۇيىمدارىندا سپورتتى دامىتۋدىڭ ءتيىمدى جۇيەسىنىڭ جوقتىعىن كورسەتەدى، – دەدى بعم «ۇلتتىق عىلىمي-پراكتيكالىق دەنە تاربيەسى ورتالىعىنىڭ باس ديرەكتورى تاستانبەك ەسەنتاەۆ.

اۋىل وقۋشىلارىنىڭ سپورت عيماراتتارىنداعى سۇرانىستارى تەك 30% قاناعاتتاندىرىلعان. دەمەك، مۇنداي جاعداي بالالاردىڭ ءومىر ءسۇرۋ دەڭگەيى مەن تولىق فيزيكالىق، پسيحيكالىق، مورالدىق جانە رۋحاني دامۋى ءۇشىن قاجەتتى جاعدايلارعا قۇقىعىن شەكتەيدى.

ەلىمىزدە 10 583 مەكتەپكە دەيىنگى تاربيە ۇيىمى بار. ونىڭ ىشىندە 6 633 بالاباقشا، 3 950  شاعىن ورتالىق، 67 ساناتوريالىق بالاباقشا، 41 ارنايى بالاباقشا. مۇندا 26،1% سپورت زالدارىمەن، 4،2% باسسەيندەرمەن، 77،9% ويىن الاڭدارىمەن جابدىقتالعان.

سپورتتىق بازالار از قامتىلعان وڭىرلەر مىنالار. قوستاناي وبلىسىندا بازالار 37،0 %، اقمولا وبلىسىندا  38،8% جانە اتىراۋ وبلىسىندا  47،7 % قامتىلعان. جالپى ءبىلىم بەرەتىن 6 982 مەملەكەتتىك مەكتەپتىڭ 6 086-سىندا (87،1%) سپورت زال بار، ولاردىڭ 5 260-ى ۇلگىلىك جانە 826-سى بەيىمدەلگەن سپورت زال.

مەكتەپتەردەگى قۇرال-جابدىقتارمەن قامتاماسىز ەتۋدىڭ ەڭ تومەن كورسەتكىشتەرى باتىس قازاقستان – 42،4%، اقمولا – 50،8%، 59،6% – جامبىل  وبلىستارىنان كورۋگە بولادى، ال رەسپۋبليكالىق كورسەتكىش – 73،2%.

بۇل ءبىلىم بەرۋ ۇيىمدارىنىڭ تولىق قارجىلاندىرىلماۋىمەن بايلانىستى، حالىقتىڭ جاعدايى ناشار توپتارىنان شىققان بالالاردىڭ سپورتتىق ورتاعا تارتىلۋ مۇمكىندىگىن تومەندەتەتىن اقىلى قىزمەتتەردىڭ وسۋىنە الىپ كەلەدى.

بالالاردى دەنە شىنىقتىرۋ-ساۋىقتىرۋ جانە سپورتتىق ءىس-شارالارعا تارتۋ، بەلسەندى دەمالىستارىن ۇيىمداستىرۋ، جامان ادەتتەردىڭ الدىن الۋ ماسەلەلەرى جان-جاقتى شەشىمدەرىن ازىرلەۋدى تالاپ ەتەدى.

–بالاباقشا تاربيەشىلەرى، جالپى ءبىلىم بەرەتىن مەكتەپتەر مەن كوللەدج مۇعالىمدەرىنىڭ بىلىكتىلىگىن ارتتىرۋ جۇيەسىن جاقسارتۋ، ادىستەمەلىك بازانى جاڭارتۋ، ماتەريالدىق-تەحنيكالىق قامتاماسىز ەتۋ پروبلەمالارىن شەشۋ قاجەت. ءبىزدىڭ ۇلكەن الەۋەتىمىزبەن تەز تۇرعىزىلاتىن زاماناۋي سپورت زالى مەن ستاديون ەلىمىزدىڭ ءاربىر وقۋ ورنىندا بولۋى ءتيىس، بۇل جاعدايدا ءبىز بالالاردىڭ سپورتقا دەگەن قىزىعۋشىلىعىن بىرنەشە ەسە ارتتىرامىز جانە بالالار قىلمىسى مەن اۋرۋشاڭدىعى پروبلەمالارىن تۇبەگەيلى شەشەمىز، – دەدى تاستانبەك قۇتجان ۇلى.

جينالىس قورىتىندىسىندا ءبىلىم جانە عىلىم ۆيتسە-ءمينيسترى شولپان كارينوۆا 26 مىڭعا جۋىق دەنە شىنىقتىرۋ مۇعالىمىنىڭ سپورتتىق باعىتى مەن ءار بالانىڭ سپورتقا  قاتىسۋ كورسەتكىشتەرى تۋرالى مالىمەتتەردى جيناقتاۋدى تاپسىردى. سونداي-اق، سپورتتىق سەكتسيالارعا قاتىساتىن وقۋشىلار تۋرالى ۇبدق-نىڭ اقپاراتتارىن رەتكە كەلتىرۋ، دەنە شىنىقتىرۋ ءپانىنىڭ  باعدارلاماسى، قر تۇڭعىش پرەزيدەنتى – ەلباسى تەستىلەرى ماسەلەلەرى، دەنە شىنىقتىرۋ ساباعىن ساپالى وتكىزۋ، «فۋتبول ساباعى» اپروباتسياسىنىڭ  قورىتىندىسى جايلى ءسوز قوزعالدى. بۇل ماسەلەلەر دەنە شىنىقتىرۋ جانە سپورت بويىنشا جول كارتاسىنا ەنگىزىلىپ، كاسىبي شەشىمدەر شىعارىلاتىن بولادى.