Úzdikterdiń úzdigi

Jyl saıyn 19 jeltoqsan kúni «Sport juldyzdary» respýblıkalyq jýrnaly (bas redaktory, elge belgili jýrnalıst Musaǵalı Tasqalıv) men Qazaqtyń Sport jáne týrızm akademııasy birigip, elimizdegi sport salasynda úzdik shyqqan mektep,aýdan, oblystardy marapattap otyratyn jaqsy bir dástúrdi qalyptastyryp keledi.

Bıylǵy jyly da aıtýly shara álemdi mazasyzdandyryp turǵan indetke qaramaı, jalǵasyn tapty. Jyldyń úzdik sport mektebi bolyp bıyl jyl boıy tynymsyz, tabandy eńbek etip, el alǵysyna bólenip jatqan Q.Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledji laıyqty dep tanylyp, qurmetpen marapattaldy.

Birinshiden, rasymende bul mektepke bara qalsańyz tabyldyryqty attap basqannan bastap, tárbıeli, ımandy jasurpaqty kezdestiresiz. Qos qolyn keýdesine qoıyp, amandasqan jasósipirimderge qarap, janyń jylyp qoıa beredi. Ekinshiden, bilim men sportty qatar alyp júrgen daryndy jastardyń almaǵan belesi qalamaǵanyna kózińiz jetedi. Sporttyń ár túrinen elimizdiń ǵana emes, álem, Eýropa, Azııa jarystarynda júlde alyp, Qazaqstannyń atyn shyǵaryp júrgen týma talanttar bul oqý ordasynda jeterlik. Úshinshiden, jaǵdaı jasalǵan jerde tabys ta kóp kúttirmeıtini belgili. Aıtýly mekteptiń ashanasy, jatar jaıy men sport alańdary jańa zaman talabyna saı boı kóterip, erekshe kórinis alǵan. Osyndaı berekesi uıyǵan mektep-ınternat kolledjdiń «Jyldyń úzdik sport mektebi» ataǵyn alýyna tolyqtaı laıyqty edi. Sondyqtanda Qazaqtyń Sport jáne týrızm akademııasynyń shańyraǵynda ótken dýmandy shara barysynda K.Ahmetov mektebi «Jyldyń úzdik sport mektebi» degen ataqqa ıe boldy. Osyndaı qurmetti marapatty, mekteptiń barlyq jaǵynan damýyna orasan úlesin qosqan bilikti basshy, isker azamat Q.Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjideniń dırektory Seıilhan Baqtyǵalıuly Qaraqovqa, Eýropa birinshiliginiń jeńimpazy, áıgili jelaıaq Ámın Tuıaqov atamyz óz qolymen tabys etti. Sonymen qatar, «Er namysy» qoǵamdyq birlestiginiń tóraǵasy Erbolat Alııadın aǵamyz «Uly dala batyry» degen ordendi Seıilhan Baqtyǵalıulynyń tósine taqty. Osylaısha, qos qýanyshqa kenelgen K.Ahmetov atyndaǵy mektep-ınternat kolledjdiń eńbegi elenip otyr. Bul árıne, durys baǵytta kele jatqan ujymnyń qajyrly jumysynyń jemisi dep bilemiz.

Adamnyń jaqsylyq jolynda jasaǵan eńbegi eshqashan eleýsiz qalmaıtyny anyq. Ásirese, bala tárbıesi asqan yjdaqattyqpen, ystyq meıirimdi talap etedi. Olaı bolsa, Q.Ahmetov mektebiniń shańyraǵynda dáris alatyn jasbýynnyń bolashaǵy zor dep bilemiz. Aıtýly mektepke berilgen bul marapat aldaǵy ýaqytta odan da bıik belesterden kórinýge múmkindikter asha túsedi degen oıdy bildiredi.

Aqyn ORDABAIULY,

ALMATY