سەگىز جىلدان بەرى جالعاسىن تاپقان تۋرنير

ۆولەيبول سپورتىنىڭ ەلىمىزدە كاسىپقويلار اراسىنداعى دامۋ قارقىنى قاي دەڭگەيدە ەكەنى ۇلتتىق قۇرامانىڭ، كلۋبتاردىڭ  الەمدىك دودالارداعى جەتىستىگىمەن ولشەنەدى عوي.

اۋەسقويلار اراسىندا ۆولەيبول سپورتى كەڭىنەن قانات جايعان. وعان اۋىل ىشىلىك، اۋدانارالىق، وبلىستىق، رەسپۋبليكالىق تۋرنيرلەرگە قاتىسۋعا ىنتا تانىتقان كوماندالاردىڭ كوپتىگى دالەل. وسىنداي سايىس سەگىز جىلدان بەرى رايىمبەك، كەگەن اۋداندارىنىڭ اۋەسقوي ۆولەيبولشىلارى اراسىندا ۇزبەي وتكىزىلىپ، داستۇرگە اينالعان. اي سايىن ءبىر مارتە بولاتىن دوداعا ەكى اۋداننىڭ ءار اۋىلىنان ىرىكتەلگەن كوماندالار قاتىسىپ،  دودا كورىگىن قىزدىرادى.

جۋىردا  وسى تۋرنير جالعاسىن تاۋىپ، كەزەكتى رەت جالاۋىن جەلبىرەتتى.  ۆولەيبول سپورتىنىڭ جاناشىرى، اۋدان سپورتىنىڭ دامۋىنا ازاماتتىق ۇلەسىن قوسىپ،  العا سۇيرەپ جۇرگەن ينديرا داۋمەتوۆا، ولجاس رامازان، ەربول امانتاەۆ، جەڭىس قانات ۇلى، ولجاس بەكجان ۇلى، رينات قوجانوۆ، ايدوس قىزايبەك، ەسبول كۇرەباي، تالانت بەرىك، نارتاي شىمىرباەۆ، توقتار قۇسايىن ۇلى، ايدوس ۇزاقبەكوۆ سىندى ازاماتتار  كەزەكتى ءتۋرنيردىڭ ۇيىتقىسى بولدى.

«سەگىز جىلدان بەرى جۇلگەسىن ۇزبەي جالعاسىپ كەلە جاتقان ءتۋرنيردى وتكىزۋدەگى باستى ماقساتىمىز – سالاۋاتتى ءومىر سالتىن ناسيحاتتاۋ. دەننىڭ ساۋلىعى سپورتپەن ساباقتاس ەكەنىن پاش ەتۋدى مۇرات تۇتىپ، وسى ءتۋرنيردىڭ كەزەكتى دوداسى جالاۋىن جەلبىرەتتى. اي سايىن دوداعا قاتىسۋعا ىنتا تانىتۋشى كوماندالاردىڭ قاتارى كوبەيىپ كەلە جاتقانى قۋانتادى. تۇپكىردەگى اۋىلدا اشىلماعان ارالداي قانشاما تالانتتى بالالار بار، سولاردىڭ توماعاسىن سىپىرىپ، تۇساۋىن كەسەتىن الاڭ مىنە،  وسىنداي تۋرنيرلەر. سايىستى وتكىزۋگە قولداۋ كورسەتىپ، دەمەۋشىلىك تانىتقان سپورت جاناشىرلارىنا زور العىسىمىزدى بىلدىرەمىز»، دەدى  ينديرا بەلگىبايقىزى.

ءتۋرنيردىڭ چەمپيوندىق كۋبوگىن «كەگەن-1» كومانداسى ەنشىلەسە، كۇمىس جۇلدە  «جالاڭاش» كومانداسىنىڭ جىگىتتەرىنە بۇيىردى. قولا جۇلدەنى ىلە اۋدانىنىڭ ۆولەيبولشىلارى ولجالادى. تورتتىكتى «بەلگىباي» كومانداسى تۇيىندەدى.

قۋانىش رازاق،

الماتى