Segiz jyldan beri jalǵasyn tapqan týrnır

Voleıbol sportynyń elimizde kásipqoılar arasyndaǵy damý qarqyny qaı deńgeıde ekeni ulttyq quramanyń, klýbtardyń  álemdik dodalardaǵy jetistigimen ólshenedi ǵoı.

Áýesqoılar arasynda voleıbol sporty keńinen qanat jaıǵan. Oǵan aýyl ishilik, aýdanaralyq, oblystyq, respýblıkalyq týrnırlerge qatysýǵa ynta tanytqan komandalardyń kóptigi dálel. Osyndaı saıys segiz jyldan beri Raıymbek, Kegen aýdandarynyń áýesqoı voleıbolshylary arasynda úzbeı ótkizilip, dástúrge aınalǵan. Aı saıyn bir márte bolatyn dodaǵa eki aýdannyń ár aýylynan iriktelgen komandalar qatysyp,  doda kórigin qyzdyrady.

Jýyrda  osy týrnır jalǵasyn taýyp, kezekti ret jalaýyn jelbiretti.  Voleıbol sportynyń janashyry, aýdan sportynyń damýyna azamattyq úlesin qosyp,  alǵa súırep júrgen Indıra Dáýmetova, Oljas Ramazan, Erbol Amantaev, Jeńis Qanatuly, Oljas Bekjanuly, Rınat Qojanov, Aıdos Qyzaıbek, Esbol Kúrebaı, Talant Berik, Nartaı Shymyrbaev, Toqtar Qusaıynuly, Aıdos Uzaqbekov syndy azamattar  kezekti týrnırdiń uıytqysy boldy.

«Segiz jyldan beri júlgesin úzbeı jalǵasyp kele jatqan týrnırdi ótkizýdegi basty maqsatymyz – salaýatty ómir saltyn nasıhattaý. Denniń saýlyǵy sportpen sabaqtas ekenin pash etýdi murat tutyp, osy týrnırdiń kezekti dodasy jalaýyn jelbiretti. Aı saıyn dodaǵa qatysýǵa ynta tanytýshy komandalardyń qatary kóbeıip kele jatqany qýantady. Túpkirdegi aýylda ashylmaǵan araldaı qanshama talantty balalar bar, solardyń tomaǵasyn sypyryp, tusaýyn kesetin alań mine,  osyndaı týrnırler. Saıysty ótkizýge qoldaý kórsetip, demeýshilik tanytqan sport janashyrlaryna zor alǵysymyzdy bildiremiz», dedi  Indıra Belgibaıqyzy.

Týrnırdiń chempıondyq kýbogyn «Kegen-1» komandasy enshilese, kúmis júlde  «Jalańash» komandasynyń jigitterine buıyrdy. Qola júldeni Ile aýdanynyń voleıbolshylary oljalady. Tórttikti «Belgibaı» komandasy túıindedi.

Qýanysh RAZAQ,

ALMATY