رۇستەم مۇقاتوۆ: «مەن جاستارعا قولداۋ كورسەتۋگە دايىنمىن!»

سوڭعى كەزدەرى قازاق سپورتىنىڭ دامۋى ءۇشىن قولدان كەلگەن كومەكتەرىن ايامايتىن سپورت جاناشىرلارىنىڭ قاتارى كوبەيىپ كەلەدى. ءبىزدىڭ بۇگىنگى كەيىپكەرىمىز دە سونداي ۇلكەن جۇرەكتى ازاماتتاردىڭ ءبىرى، ەسىمى التى الاشقا تانىمال كاسىپكەر، سپورت پەن ونەر جانە ۇلت جاناشىرى – رۇستەم مۇقاتوۆ. ءبىر ەمەس، بىرنەشە كومپانيانىڭ يەسى جانە قۇرىلتايشىسى رۇستەم ابدىكارىم ۇلىنىڭ جۇمىس كەستەسى وتە تىعىز ەكەن. ۇنەمى شەتەل مەن ەلىمىزدىڭ ءار وڭىرىندە ءىسساپارادا جۇرەتىن ازاماتپەن كەزدەسۋىمىز دە وڭاي بولعان جوق. دەگەنمەن، جاقىندا ءساتى ءتۇسىپ كەزدەسىپ، از-كەم سۇحباتتاسىپ ۇلگىردىك. سول اشىق-جارقىن اڭگىمەنى نازارلارىڭىزعا ۇسىنىپ وتىرمىز. 

–رۇستەم ابدىكارىم ۇلى، الدىمەن ءوزىڭىزدى وقىرمان قاۋىمعا قىسقاشا تانىستىرساڭىز.

–مەنىڭ تۋىپ-وسكەن جەرىم الماتى قالاسى. وسى جەردە ءوسىپ-ءونىپ، ەل ءۇشىن قىزمەت اتقارىپ جۇرگەن جايىم بار. جۇمىس بابىمەن ەلىمىزدىڭ بارلىق وڭىرىندە جانە شەتەلدەردە بولىپ تۇرامىن.  قايدا جۇرسەم دە مەن ەشقاشان، ەلگە، جەرگە، رۋعا ءبولىنىپ كورگەن ەمەسپىن. ءوزىمدى قازاقپىن، قازاق ەلىنىڭ ازاماتىمىن دەپ ەسەپتەيمىن.

ءبىزدىڭ كومپانيا كوپسالالى. بىزدە 600-دەن استام ادام جۇمىس ىستەيدى. ءبىز قۇرىلىسپەن دە، نوۋ-حاۋ، HI-TECH جانە ID تەحنولگيالارمەن، جالپى ءبىراز نارسەلەرمەن اينالىسامىز. مۇمكىندىگى شەكتەۋلى ادامداردى قولداۋعا ارنالعان قورعا ۇنەمى كومەكتەسىپ تۇرامىز.

–دەمەۋشىلىكپەن  اينالىسۋىڭىزعا نە سەبەپ؟

–سپورت سالاسىنا كوڭىل ءبولىپ، قولداۋ كورسەتۋدەگى باستى ماقساتىم – جاستارعا كومەكتەسۋ. ويتكەنى، ولار ەلدىڭ بولاشاعى. بىزدەر سەكىلدى بيزنەس سالاسىنىڭ وكىلدەرى ۇكىمەتىمىزگە كومەكتەسىپ، جاس ۇرپاق تاربيەسىمەن اينالىسۋعا، ولاردىڭ سپورتپەن جانە باسقا دا قالاعان ىستەرىمەن شۇعىلدانۋىنا قولداۋ كورسەتۋىمىز قاجەت. اللاعا شۇكىر، سوڭعى كەزدەرى جاستار اراسىندا سپورتپەن اينالىسىپ، سالاماتتى ءومىر سالتىن ۇستانۋشىلار سانى ارتىپ كەلەدى. بىرەۋلەر سپورتپەن، بىرەۋلەرى بيمەن، ەندى بىرەۋلەرى شىعارماشىلىقپەن اينالىسادى. ولارعا قاراپ وتىرىپ، ءبىر جاعىنان قىزىعاسىن دا. ويتكەنى، بۇگىنگى كۇن ولاردىڭ وزدەرىنىڭ سۇيىكتى ىستەرىمەن اينالىسۋىنا بارلىق جاعداي مەن مۇمكىندىك بار. ال ءبىزدىڭ كەزىمىزدە ولاي بولعان جوق. قازىرگى جاستار كەزىندە ءبىز جەتپەگەن بيىكتەرگە جەتسە، ەلىن-جەرىن سۇيەتىن ازامات بولىپ شىقسا دەگەن وي مەنى وسى سالاعا قولداۋ كورسەتۋگە الىپ كەلدى.

–سىزدەر بىرنەشە سپورت كەشەندەرىن سالعان ەكەنسىزدەر. سول جونىندە ايتىپ بەرسەڭىز؟

–ەندى ءبىز انا جەردە سالدىق، مىنا جەردە سالدىق دەسەك ماقتانعاندىق بولىپ كەتەتىن شىعار دەپ ويلايمىن. قولىمىزدان كەلگەنشە ەل يگىلىگى ءۇشىن سپورت نىساندارىن سالىپ جاتىرمىز. بۇگىنگى تاڭدا باتىس وڭىردە سپورت الاڭدارىن، گرەك-ريم كۇرەسى زالدارىن سالىپ وتىرمىز. اللا قالاسا، الداعى ۋاقىتتا ەلوردامىزدا، الماتىدا سالعالى جاتىرمىز. ول سپورت كەشەندەرىن سالىپ، سوسىن تالانتتى باپكەرلەردى، ونىڭ ىشىندە جاستاردى تاربيەلەپ، وقىتۋ جوسپاردا بار. ولار ءوز كەزەگىندە جاستاردى سپورتقا باۋلىپ، جاس ۇرپاقتى سالاماتتى ءومىر سالتىن ۇستانۋعا جاقسى ناسيحات بولادى.

–ءسىز نەگىزى سپورتتىڭ قاي تۇرىنە كوبىرەك قولداۋ كورسەتەسىز؟ قۇپيا بولماسا سول جاعىن بىلۋگە بولا ما؟

–مەن نەگىزىندە گرەك-ريم كۇرەسىنە كوبىرەك قولداۋ كورسەتەمىن. ونىڭ ءبىر سەبەبى، اكەم كەزىندە بالۋان بولىپتى. بىراق، ول كىسى ەركىن كۇرەسپەن اينالىسقان كورىنەدى. وسىدان كەيىن شاعىن فۋتبولعا دا قولداۋ كورسەتەمىن. اراسىندا ءوزىمىزدىڭ دە دوپ تەۋىپ، ۇستەل تەننيسىن ويناپ قوياتىنىمىز بار. سپورتپەن كوبىرەك شۇعىلدانۋعا ۋاقىتىمىز بولا بەرمەيدى. سوندا دا ءسال مۇمكىندىك تۋا قالعان جاعدايدا سپورت زالدان تابىلىپ تۇرۋعا تىرىسامىن.

–ۇنەمى سپورتقا قولداۋ كورسەتىپ وتىرعاندىقتان، سپورتشىلار اراسىندا دوستارىڭىز دا كوپ شىعار؟ ولاردىڭ ىشىنەن كىمدەردى ەرەكشە اتاپ وتەر ەدىڭىز؟

–اللاعا شۇكىر، كوپتەگەن سپورتشى جىگىتتەرمەن ارالاسامىن. بىراق، ولاردىڭ اراسىنان مىناۋمەن ارالاسامىن دەپ ەشقايسىسىن ءبولىپ-جارعىم كەلمەيدى. «بولىنگەندى ءبورى جەيدى» دەيدى عوي ءبىزدىڭ قازاقتا، سول سەبەپتى ەشكىمنىڭ اتىن اتاپ، ءتۇسىن تۇستەمەي-اق قويايىن. شۇكىر دوستارىم بارشىلىق.

–سپورتشى بولامىن دەگەن جاستارعا قانداي تىلەگىڭىز بار؟

– سپورت جولىن تاڭداعان جاستارعا ايتارىم، ەشقاشان ەرىنبەڭىزدەر! ءاربىر جەڭىس پەن تابىس ماڭداي تەرمەن كەلەدى. تاڭداعان جولدارىڭىزدان قايتپاڭىزدار! الدىنا ناقتى ماقسات قويعان ادام – سول ماقساتىنا مىندەتتى تۇردە جەتەدى. جەڭىستى كۇندەرىمىز كوپ بولسىن! الدىمىزدا كەلە جاتقان توكيو وليمپياداسىندا كوك تۋىمىز كوككە كوتەرىلىپ، ءانۇرانىمىز شىرقالادى دەگەن ويدامىز. سول قۋانىشتى، جەڭىستى كۇندە كەزدەسەيىك! العا  قازاقستان!

–اڭگىمەڭىزگە راحمەت! سىزگە دە ەل ءۇشىن اتقارىپ جۇرگەن ءاربىر ىسىڭىزگە تابىس تىلەيمىز!

اڭگىمەلەسكەن،

مۇساعالي تاسقاليەۆ

 الماتى – اقتوبە