Jetisý qoldoby mektebi – qazaq sportynyń bolashaǵy

Qoldoby sporty deneniń barlyq múshesin shıratyp, qyzdyratyn, tartysty tamasha bir sporttyń tóre túri. Qazaqstanda aıtýly sport túri ásirese, qyzdar arasynda erekshe damyp keledi.

Jýyrda Ispanııada  qoldobynan ótken álem chempıonatyna Qazaqstan qyzdar qurama komandasynyń qatysqanyn jaqsy bilemiz. Búgingi kúni qoldoby sporty elimizdiń qaı óńirinde erekshe damyp keledi degen suraqqa jaýap izdep kórgende, Qyzylorda men Almaty oblysyn erekshe bólip aıta keter edim. Al, eger naqtyraq aıtsaq, óz basym Almaty oblysyndaǵy  damýdy nazarǵa ala otyryp, Qazaqstandaǵy qoldoby sportynyń bolashaǵyn kórgendeı bolamyn.

Jetisý óńirinde búgingi tańda gandbol mektepteri kóptep ashylyp, jastar qyzyǵýshylyq tanyta bastady. Oǵan dálel Almaty oblysy Deneshynyqtyrý jáne sport basqarmasynyń basshysy, Olımpıada oıyndarynyń kúmis júldegeri bilikti basshy, bilgir maman Nurbaqyt Teńizbaevtyń sportty, sonyń ishinde qoldobyn nasıhattaý aıasynda durys jolǵa qoıǵan jarqyn  baǵdarlamasynyń arqasynda bul sport aıyryqsha damý ústinde. Qaı jerde jaǵdaı men qoldaý sabaqtasyp kelgen kezde nátıje de kúttirmeıtini anyq. Sol sekildi Jetisý aımaǵynyń daryndy sportshylary sporttyń qaı túrin alyp qarasaq ta qamshy saldyrmaı alda keledi. Al, qoldobyna kelsek, oblystyń ár aýdanynda bólimsheler ashylyp, sol zaldarda jattyǵyp jatqan ul-qyzdar Almaty oblysynyń abyroıyn el chempıonattarynda tabysty qorǵaýda.

Endi Jetsý óńirinde qoldobynyń damýy Almaty mańyndaǵy  О́tegen batyr kentinde ornalasqan Gandbol men fýtzaldan balalar men jasóspirimder sport mektebine tikeleı baılanysty desek artyq aıtqandyǵym emes. Bul sport mektebi Almaty oblysy Deneshynyqtyrý jáne sport basqarmasy MM Gandboldan jáne fýtzaldan  MBJSM» KMM 2018 jyly irgesi qalanǵannan beri Jetisý óńiriniń qoldobynyń boıyna qan júgirgendeı boldy. О́ıtkeni, Almaty oblysynyń atynan  respýblıkalyq jáne halyqaralyq jarystarǵa  aıtýly sport mektebiniń túlekteri synǵa túsip, jarqyn jeńisterimen qýantyp keledi.

Sport mektebiniń dırektory Darhan Áshirov basshylyq tizginin ustaǵannan bastap, qoldobynan bilikti bapkerler men talantty oıynshylardy aınalasyna uıystyryp,úlken jetistikterge jete bastaıdy. Mektepte talantty jasóspirim sportshylar qoldoby, fýtzal jáne bandmınton sekildi sporttyń úsh túrimen aınalysady. Daryndy jastar Taldyqorǵan qalasy, Ile, Talǵar, Panfılov, Alakól, Jambyl, Eńbekshiqazaq, Qarasaı, Raıymbek, Eskeldi aýdandaryna baryp  oqý-jattyǵýlaryn ótkizip, dalanyń saf taza aýasyn jutyp, qyr tósinde shyńdalyp qaıtady eken. Bul da bir aıtýly sport mektebi basshylyǵynyń jattyǵý jumysyndaǵy utymdy oılastyrylyp jasaǵan tıimdi baǵdarlamasy sııaqty. Qoldoby sportynyń óńirdegi fılıaldary jalpy bilim beretin mektepterdiń bazasynda jumys istep keledi. Al, endi sheberlerdi daıyndap shyǵaryp jatqan beınebir ustahana ispettes at tóbelindeı ǵana sport mekteptiń jeńisti joldaryn alǵa tartsaq.

Gandbol men fýtzaldan balalar jáne jasóspirimder sport mektebiniń túlekteri 2018 jyly  О́tegen batyr kentinde 2003 jyly týǵan jasóspirimder arasynda ótken Qazaqstan chempıonatynda 1 oryndy jeńip alsa, 2019 jyly Qostanaıda 2002 týǵan jasóspirimder arasynda el chempıonatynyń kúmis júldesin, 2021 jyly aıtýly qalada 2002 jylǵylar arasynda  3 orynǵa ıe bolady. Sonymen birge Qostanaı qalasynda ótken joǵary lıga  arasyndaǵy chempıonatta  Almaty oblysynyń 2005 jyly týǵan jasóspirimder quramasy júldeli úshinshi orynǵa qol jetkizedi. Qoldobynan  uldar da qyzdardyń  jetken jetistikterinen  artta qalýdy namys kórip, Rıdder qalasynda ótken el birinshiliginde júldeli qola medaldardy  jeńip alady. Mine, bul tek ishki Qazaqstan birinshilikterindegi Gandbol men fýtzaldan balalar jáne jasóspirimder sport mektebiniń túlekteriniń bar joǵy 3 jyldyń tóńireginde jetken jetistikteri edi. Sonymen qatar aıtýly sport mektebiniń qyzdar komandasy  Qazaqstannan ózge, halyqaralyq jarystarda da tamasha óner kórsetip topjarǵanyn aıtpasa bolmas. Mysaly, О́zbekstannyń astanasy Tashkentte ótken halyqaralyq jarysqa alǵash ret qatysyp, kúmis júldemen oralady. Al, 2019 jyly О́zbekstannyń Namangan qalasynda qoldobynan Táýelsizdik kýbogy úshin ótken  dúbirli jarysta qarsylastaryn jeńip, bas júldeni  jeńip alsa, 2021 jyly Samarqand qalasynda ótken baıraqty jarysta chempıon atanady. Bul endi qyr asyp baryp el namysyn abyroımen qorǵap oljamen oralǵan  bir ǵana sport mektebiniń jetken jeńisteri.  2021 jyly  mektep basshylyǵy Almaty oblysy Deneshynyqtyrý jáne sport basqarmasynyń basshysy Nurbaqyt Teńizbaevtyń qoldaýymen kelisimge otyryp, Gandbol men fýtzaldan balalar jáne jasóspirimder sport mektebiniń túlekteriniń negizin alyp,  «Jetisý» klýbyn qurady. Daryndy qyzdar komandasy «Jetisý» komandasynyń Qazaqstanda topjaryp alǵa shyǵýyna zor úlesterin qosady.

Jýyrda Qazaqstannyń sýperlıga saıysynda  «Jetisý» komandasy 9 komandanyń arasynan sýyrylyp  shyǵyp, 29-shy el chempıony atandy. Árıne, sýperlıgany jeńip alý, Jetisý óńirinde qoldobynynyń qarqyndy damyp kele jatqanynyń aıǵaǵy deýge bolady. Al sol «Jetisý» komandasynyń negizi О́tegen batyr kentindegi Gandbol men fýtzaldan balalar jáne jasóspirimder sport mektebiniń túlekteri bolatyn. «Ustazsyz shákirt tul», demekshi, Almaty oblysynyń «Jetisý» qyzdar qurama komandasynyń aǵa jattyqtyrýshysy, bilikti bapker Janatty Oınarqyzy Baıarystanovanyń shákirtteri elimizdegi eń úzdik komanda ekendigin pash etti.

Jýyrda Ispanııada ótken  álem chempıonatynda ulttyq qurama sapynda óner kórsetken «Jetisý» qoldoby komandasynyń qos túlegi Irına Aleksandrovna men Kamıla Serikbaevalardyń asqan sheber oıyndaryn tamashalaǵan Qazaqstan jankúıerleri úlken áserde qalǵan edi. Aıtalyq, Irına Aleksandrova Ispanııada ótken álem chempıonatynda eń úzdik oıynshylar arasynan  43 gol salyp, ekinshi satyǵa kóterilgen eken. Al, talshybyqtaı talantty qyzymyz Kamıla da sol kezdesýde jaqsy oıyn kórsete bildi. Sol álem chempıonatynda  Qazaqstannyń namysyn abyroımen qorǵaǵan  qos arýdyń ekeýi de О́tegen batyr kentindegi Gandbol men fýtzaldan balalar jáne jasóspirimder sport mektebinen ósip shyqqan túlekter.

«Qaraǵaıǵa qarap tal óser, qataryna qarap jas óser», demekshi О́tegen kentindegi aıtýly mektepte búgingi kúni talantty qyzdardyń sany kóbeıip keledi. Árıne, jaǵdaı jasalyp, qamqorlyq bolǵan jerde bereke de kelip kiredi emes pe. Mektep dırektory Darhan  Áshirov komanda qyzdarynyń  bolashaǵynan úlken úmit kútedi. Alda áli talaı dúbirli jarystar kútip tur. Degenmende jattyǵýda aıamaı ter tókken, jarysta jeńiske jetetini  belgili aksıoma. Bir aıta keter jáı, osy sport túrine ózimizdiń qarakóz qyzdarymyzdyń kóptep kele bastaǵany qýantady. Kúnderdiń bir kúninde Qazaqstan quramasy álem chempıonatynda úzdik úshtiktiń qataryna qosylyp, sol komanda qyzdarynyń arasynan jetisýlik qyzdardy tanyp jatsaq tańǵalmaspyz degen oıdamyz. О́ıtkeni, olar Jetisý mektebinen ósip shyqqan qazaq qoldoby sportynyń bolashaqtary.

Aqyn ORDABAIULY

Qazaqstan Jýrnalıster Odaǵynyń múshesi

ALMATY