جەتىسۋ قولدوبى مەكتەبى – قازاق سپورتىنىڭ بولاشاعى

قولدوبى سپورتى دەنەنىڭ بارلىق مۇشەسىن شيراتىپ، قىزدىراتىن، تارتىستى تاماشا ءبىر سپورتتىڭ تورە ءتۇرى. قازاقستاندا ايتۋلى سپورت ءتۇرى اسىرەسە، قىزدار اراسىندا ەرەكشە دامىپ كەلەدى.

جۋىردا يسپانيادا  قولدوبىنان وتكەن الەم چەمپيوناتىنا قازاقستان قىزدار قۇراما كومانداسىنىڭ قاتىسقانىن جاقسى بىلەمىز. بۇگىنگى كۇنى قولدوبى سپورتى ەلىمىزدىڭ قاي وڭىرىندە ەرەكشە دامىپ كەلەدى دەگەن سۇراققا جاۋاپ ىزدەپ كورگەندە، قىزىلوردا مەن الماتى وبلىسىن ەرەكشە ءبولىپ ايتا كەتەر ەدىم. ال، ەگەر ناقتىراق ايتساق، ءوز باسىم الماتى وبلىسىنداعى  دامۋدى نازارعا الا وتىرىپ، قازاقستانداعى قولدوبى سپورتىنىڭ بولاشاعىن كورگەندەي بولامىن.

جەتىسۋ وڭىرىندە بۇگىنگى تاڭدا گاندبول مەكتەپتەرى كوپتەپ اشىلىپ، جاستار قىزىعۋشىلىق تانىتا باستادى. وعان دالەل الماتى وبلىسى دەنەشىنىقتىرۋ جانە سپورت باسقارماسىنىڭ باسشىسى، وليمپيادا ويىندارىنىڭ كۇمىس جۇلدەگەرى بىلىكتى باسشى، بىلگىر مامان نۇرباقىت تەڭىزباەۆتىڭ سپورتتى، سونىڭ ىشىندە قولدوبىن ناسيحاتتاۋ اياسىندا دۇرىس جولعا قويعان جارقىن  باعدارلاماسىنىڭ ارقاسىندا بۇل سپورت ايىرىقشا دامۋ ۇستىندە. قاي جەردە جاعداي مەن قولداۋ ساباقتاسىپ كەلگەن كەزدە ناتيجە دە كۇتتىرمەيتىنى انىق. سول سەكىلدى جەتىسۋ ايماعىنىڭ دارىندى سپورتشىلارى سپورتتىڭ قاي ءتۇرىن الىپ قاراساق تا قامشى سالدىرماي الدا كەلەدى. ال، قولدوبىنا كەلسەك، وبلىستىڭ ءار اۋدانىندا بولىمشەلەر اشىلىپ، سول زالداردا جاتتىعىپ جاتقان ۇل-قىزدار الماتى وبلىسىنىڭ ابىرويىن ەل چەمپيوناتتارىندا تابىستى قورعاۋدا.

ەندى جەتسۋ وڭىرىندە قولدوبىنىڭ دامۋى الماتى ماڭىنداعى  وتەگەن باتىر كەنتىندە ورنالاسقان گاندبول مەن فۋتزالدان بالالار مەن جاسوسپىرىمدەر سپورت مەكتەبىنە تىكەلەي بايلانىستى دەسەك ارتىق ايتقاندىعىم ەمەس. بۇل سپورت مەكتەبى الماتى وبلىسى دەنەشىنىقتىرۋ جانە سپورت باسقارماسى مم گاندبولدان جانە فۋتزالدان  مبجسم» كمم 2018 جىلى ىرگەسى قالانعاننان بەرى جەتىسۋ ءوڭىرىنىڭ قولدوبىنىڭ بويىنا قان جۇگىرگەندەي بولدى. ويتكەنى، الماتى وبلىسىنىڭ اتىنان  رەسپۋبليكالىق جانە حالىقارالىق جارىستارعا  ايتۋلى سپورت مەكتەبىنىڭ تۇلەكتەرى سىنعا ءتۇسىپ، جارقىن جەڭىستەرىمەن قۋانتىپ كەلەدى.

سپورت مەكتەبىنىڭ ديرەكتورى دارحان ءاشىروۆ باسشىلىق تىزگىنىن ۇستاعاننان باستاپ، قولدوبىنان بىلىكتى باپكەرلەر مەن تالانتتى ويىنشىلاردى اينالاسىنا ۇيىستىرىپ،ۇلكەن جەتىستىكتەرگە جەتە باستايدى. مەكتەپتە تالانتتى ءجاسوسپىرىم سپورتشىلار قولدوبى، فۋتزال جانە باندمينتون سەكىلدى سپورتتىڭ ءۇش تۇرىمەن اينالىسادى. دارىندى جاستار تالدىقورعان قالاسى، ىلە، تالعار، پانفيلوۆ، الاكول، جامبىل، ەڭبەكشىقازاق، قاراساي، رايىمبەك، ەسكەلدى اۋداندارىنا بارىپ  وقۋ-جاتتىعۋلارىن وتكىزىپ، دالانىڭ ساف تازا اۋاسىن جۇتىپ، قىر توسىندە شىڭدالىپ قايتادى ەكەن. بۇل دا ءبىر ايتۋلى سپورت مەكتەبى باسشىلىعىنىڭ جاتتىعۋ جۇمىسىنداعى ۇتىمدى ويلاستىرىلىپ جاساعان ءتيىمدى باعدارلاماسى سياقتى. قولدوبى سپورتىنىڭ وڭىردەگى فيليالدارى جالپى ءبىلىم بەرەتىن مەكتەپتەردىڭ بازاسىندا جۇمىس ىستەپ كەلەدى. ال، ەندى شەبەرلەردى دايىنداپ شىعارىپ جاتقان بەينەبىر ۇستاحانا ىسپەتتەس ات توبەلىندەي عانا سپورت مەكتەپتىڭ جەڭىستى جولدارىن العا تارتساق.

گاندبول مەن فۋتزالدان بالالار جانە جاسوسپىرىمدەر سپورت مەكتەبىنىڭ تۇلەكتەرى 2018 جىلى  وتەگەن باتىر كەنتىندە 2003 جىلى تۋعان جاسوسپىرىمدەر اراسىندا وتكەن قازاقستان چەمپيوناتىندا 1 ورىندى جەڭىپ السا، 2019 جىلى قوستانايدا 2002 تۋعان جاسوسپىرىمدەر اراسىندا ەل چەمپيوناتىنىڭ كۇمىس جۇلدەسىن، 2021 جىلى ايتۋلى قالادا 2002 جىلعىلار اراسىندا  3 ورىنعا يە بولادى. سونىمەن بىرگە قوستاناي قالاسىندا وتكەن جوعارى ليگا  اراسىنداعى چەمپيوناتتا  الماتى وبلىسىنىڭ 2005 جىلى تۋعان جاسوسپىرىمدەر قۇراماسى جۇلدەلى ءۇشىنشى ورىنعا قول جەتكىزەدى. قولدوبىنان  ۇلدار دا قىزداردىڭ  جەتكەن جەتىستىكتەرىنەن  ارتتا قالۋدى نامىس كورىپ، ريددەر قالاسىندا وتكەن ەل بىرىنشىلىگىندە جۇلدەلى قولا مەدالداردى  جەڭىپ الادى. مىنە، بۇل تەك ىشكى قازاقستان بىرىنشىلىكتەرىندەگى گاندبول مەن فۋتزالدان بالالار جانە جاسوسپىرىمدەر سپورت مەكتەبىنىڭ تۇلەكتەرىنىڭ بار جوعى 3 جىلدىڭ توڭىرەگىندە جەتكەن جەتىستىكتەرى ەدى. سونىمەن قاتار ايتۋلى سپورت مەكتەبىنىڭ قىزدار كومانداسى  قازاقستاننان وزگە، حالىقارالىق جارىستاردا دا تاماشا ونەر كورسەتىپ توپجارعانىن ايتپاسا بولماس. مىسالى، وزبەكستاننىڭ استاناسى تاشكەنتتە وتكەن حالىقارالىق جارىسقا العاش رەت قاتىسىپ، كۇمىس جۇلدەمەن ورالادى. ال، 2019 جىلى وزبەكستاننىڭ نامانگان قالاسىندا قولدوبىنان تاۋەلسىزدىك كۋبوگى ءۇشىن وتكەن  ءدۇبىرلى جارىستا قارسىلاستارىن جەڭىپ، باس جۇلدەنى  جەڭىپ السا، 2021 جىلى سامارقاند قالاسىندا وتكەن بايراقتى جارىستا چەمپيون اتانادى. بۇل ەندى قىر اسىپ بارىپ ەل نامىسىن ابىرويمەن قورعاپ ولجامەن ورالعان  بىر عانا سپورت مەكتەبىنىڭ جەتكەن جەڭىستەرى.  2021 جىلى  مەكتەپ باسشىلىعى الماتى وبلىسى دەنەشىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆتىڭ قولداۋىمەن كەلىسىمگە وتىرىپ، گاندبول مەن فۋتزالدان بالالار جانە جاسوسپىرىمدەر سپورت مەكتەبىنىڭ تۇلەكتەرىنىڭ نەگىزىن الىپ،  «جەتىسۋ» كلۋبىن قۇرادى. دارىندى قىزدار كومانداسى «جەتىسۋ» كومانداسىنىڭ قازاقستاندا توپجارىپ العا شىعۋىنا زور ۇلەستەرىن قوسادى.

جۋىردا قازاقستاننىڭ سۋپەرليگا سايىسىندا  «جەتىسۋ» كومانداسى 9 كوماندانىڭ اراسىنان سۋىرىلىپ  شىعىپ، 29-شى ەل چەمپيونى اتاندى. ارينە، سۋپەرليگانى جەڭىپ الۋ، جەتىسۋ وڭىرىندە قولدوبىنىنىڭ قارقىندى دامىپ كەلە جاتقانىنىڭ ايعاعى دەۋگە بولادى. ال سول «جەتىسۋ» كومانداسىنىڭ نەگىزى وتەگەن باتىر كەنتىندەگى گاندبول مەن فۋتزالدان بالالار جانە جاسوسپىرىمدەر سپورت مەكتەبىنىڭ تۇلەكتەرى بولاتىن. «ۇستازسىز شاكىرت تۇل»، دەمەكشى، الماتى وبلىسىنىڭ «جەتىسۋ» قىزدار قۇراما كومانداسىنىڭ اعا جاتتىقتىرۋشىسى، بىلىكتى باپكەر جاناتتى وينارقىزى بايارىستانوۆانىڭ شاكىرتتەرى ەلىمىزدەگى ەڭ ۇزدىك كوماندا ەكەندىگىن پاش ەتتى.

جۋىردا يسپانيادا وتكەن  الەم چەمپيوناتىندا ۇلتتىق قۇراما ساپىندا ونەر كورسەتكەن «جەتىسۋ» قولدوبى كومانداسىنىڭ قوس تۇلەگى يرينا الەكساندروۆنا مەن كاميلا سەرىكباەۆالاردىڭ اسقان شەبەر ويىندارىن تاماشالاعان قازاقستان جانكۇيەرلەرى ۇلكەن اسەردە قالعان ەدى. ايتالىق، يرينا الەكساندروۆا يسپانيادا وتكەن الەم چەمپيوناتىندا ەڭ ۇزدىك ويىنشىلار اراسىنان  43 گول سالىپ، ەكىنشى ساتىعا كوتەرىلگەن ەكەن. ال، تالشىبىقتاي تالانتتى قىزىمىز كاميلا دا سول كەزدەسۋدە جاقسى ويىن كورسەتە ءبىلدى. سول الەم چەمپيوناتىندا  قازاقستاننىڭ نامىسىن ابىرويمەن قورعاعان  قوس ارۋدىڭ ەكەۋى دە وتەگەن باتىر كەنتىندەگى گاندبول مەن فۋتزالدان بالالار جانە جاسوسپىرىمدەر سپورت مەكتەبىنەن ءوسىپ شىققان تۇلەكتەر.

«قاراعايعا قاراپ تال وسەر، قاتارىنا قاراپ جاس وسەر»، دەمەكشى وتەگەن كەنتىندەگى ايتۋلى مەكتەپتە بۇگىنگى كۇنى تالانتتى قىزداردىڭ سانى كوبەيىپ كەلەدى. ارينە، جاعداي جاسالىپ، قامقورلىق بولعان جەردە بەرەكە دە كەلىپ كىرەدى ەمەس پە. مەكتەپ ديرەكتورى دارحان  اشىروۆ كوماندا قىزدارىنىڭ  بولاشاعىنان ۇلكەن ءۇمىت كۇتەدى. الدا ءالى تالاي ءدۇبىرلى جارىستار كۇتىپ تۇر. دەگەنمەندە جاتتىعۋدا اياماي تەر توككەن، جارىستا جەڭىسكە جەتەتىنى  بەلگىلى اكسيوما. ءبىر ايتا كەتەر ءجاي، وسى سپورت تۇرىنە ءوزىمىزدىڭ قاراكوز قىزدارىمىزدىڭ كوپتەپ كەلە باستاعانى قۋانتادى. كۇندەردىڭ ءبىر كۇنىندە قازاقستان قۇراماسى الەم چەمپيوناتىندا ۇزدىك ۇشتىكتىڭ قاتارىنا قوسىلىپ، سول كوماندا قىزدارىنىڭ اراسىنان جەتىسۋلىك قىزداردى تانىپ جاتساق تاڭعالماسپىز دەگەن ويدامىز. ويتكەنى، ولار جەتىسۋ مەكتەبىنەن ءوسىپ شىققان قازاق قولدوبى سپورتىنىڭ بولاشاقتارى.

اقىن ورداباي ۇلى

قازاقستان جۋرناليستەر وداعىنىڭ مۇشەسى

الماتى