Esimi el esinde

Almatydaǵy Qazaqtyń Sport jáne týrızm akademııasynyń shańyraǵynda qazaq kúresine ólsheýsiz úles qosqan ulttyq kúresimizdiń janashyry, Qazaqstan Respýblıksyna eńbegi sińgen jattyqtyrýshy marqum Nurjan О́tenovty eske alýǵa arnalǵan tól kúresimizden eresekter arasynda respýblıkalyq jarys bolyp ótti.

Negizi bul qazaq kúresiniń qazanynda qaınasyp, ómiriniń sońǵy sátine deıin bar kúsh jigerin salǵan ardaqty jandy eske alýǵa arnalǵan saýapty shara edi. Qazaq kúresi birde quldılap, birde órlep, talaı qıyn kezeńdi basynan keshirgende Nurjan jany qalaǵan sportyn tastap ketken emes. Qashan kórseń kúres zalynda shúmektep terin tógip shákirt tárbıeledi. Eńbegi de eleýsiz qalmady. Baýyrjan Tálip, Erkin Saıdaqov, Jangeldi Hamıtov, Ǵanı Keldibaev syndy álem, Eýropa, Azııa chempıonattarynda qazaq eliniń namysyn abyroımen qorǵap, chempıon atanǵan jalańtós bahadúr balýandardy shyńdap shyǵardy.

«Jaqsynyń aty, ǵalymnyń haty ólmeıdi», demekshi, mine endi bar shákirtteri jumyla jıylyp, ulaǵatty ustazdarynyń atynda dúbirli doda uıymdastyrǵan eken. Bul jarysqa elimizdiń barlyq oblysymen qatar Almaty, Nur-Sultan qalalarynan 200-ge tarta balýan qatysyp, kúsh synasty.

Jarystyń ashylýyna Nurjan О́tenovtyń jary Dildásh pen uly Maǵjan, qyzy Janar jáne aǵaıyn-týystary kelip qatysty. Sonymen qatar, Erǵalı Muhıtdınov, Qapar Raýanov, Ǵalym Kulekeshev, Shyńǵys Tursynov, Belaı, Nurǵalym syndy elimizde qazaq kúresiniń damýyna úlken eńbek sińirgen ardager jattyqtyrýshylar qatysyp, Nurjan О́tenovtyń atyna ashylǵan alamanǵa aqjol aıtyp, balýandarǵa jeńis tiledi. Qurmetti qonaqtardyń arasynda kıkboksıngten álem kýbogynyń ıgeri Elmurat Qaıypjanov pen taekvando sportynyń ardageri, ulttyq sportymyzdyń janashyry Buljan Nurlybekte bar edi.

Dúbirli jekpe-jektiń Qazaqtyń Sport jáne týrızm akademııasynda ótýiniń óz orny bar. Osy bir kıeli shańyraqta Nurjan О́tenov Ulttyq sport kafedrasynda ómiriniń sońǵy kezine deıin jas urpaqqa dáris bergen edi. Sondyqtanda óz kezeginde sóz alǵan Qazaqtyń Sport jáne týrızm akdemııasy rektorynyń kómekshisi Muhtar myrza, Nurjan marqumnyń ustazdyq eńbegine joǵary baǵa berip, saǵynyshpen eske ala ketti. Iá, bir adam qudyq qazsa, myń adam sý ishedi-degen qanatty sóz bar. Qazaq kúresinen qanshama talantty shákirtterdi tárbıelgen ardaqty ustaz, qurmetti azamat Nurjan О́tenovtyń eńbegi eshqashan umytylmasy anyq. «Ornynda bar ońalar», deıdi. Erkin Saıdaqov pen Baýyrjan Tálip synda elge tanymal balýandar ustazdarynyń atynda osyndaı respýblıkalyq alaman jarysty joǵary deńgeıde ótkizýge bar kúshterin salǵany kórinip tur. Endeshe, «О́li razy bolmaı tiri baıymaıdy», demekshi ardaqty aǵaılaryn umytpaı ıgilikti ári saýapty is-sharaǵa uıytqy bolǵan Erkin men Baýyrjanǵa ustazynyń árýǵa razy dep oılaımyz. Osyndaı artynda izdeýshisi, qamqorshysy bar kezde Nurjannyń isi jalǵasyn úzbeıdi degen senimdemin. Men qazaq kúresiniń tarıhyn jazyp 20 jyldaı júrgen jyldary Nurjanmen etene jaqyn, dos bolǵan edim. Iá, Nurjannyń bapkerlik metodıkasy men adamgershiligi týraly bir kitap jazsa artyq bolmas. Ol kúnniń de keleri anyq. Al, búgingi jarysty erteń tarıh dep qabyldaıyq.

Aqyn ORDABAIULY,

ALMATY