SportPress.kz قازاقستان سپورت جاڭالىقتارى
جەلتوقساننىڭ 14-17 ارالىعىندا استانانىڭ «داۋلەت» سپورت كەشەنىندە ۇستەل تەننيسىنەن الەمدىك «World Tour Grand Finals» ءتۋرنيرى وتەدى. وسىعان بايلانىستى بۇگىن ورتالىق كوممۋنيكاتسيالىق قىزمەتىندە بۇقارالىق اقپارات قۇرالدارى وكىلدەرىنە ءباسپاسوز ءماسليحاتى وتتى.
باق وكىلدەرىنىڭ باسىن قوسقان شاراعا ۇستەل تەننيسى فەدەراتسياسىنىڭ باس حاتشىسى سەرىك قاسقاباسوۆ، مادەنيەت جانە سپورت مينيسترىلىگى سپورت جانە دەنەشىنىقتىرۋ ىستەرى كوميتەتى توراعاسىنىڭ ورىنباسارى سەرىك جاراسباەۆ پەن الەمدىك «World Tour Grand Finals» ءتۋرنيرىنىڭ ۇيىمداستىرۋ كوميتەتىنىڭ وكىلى باقىتبەك حاميت قاتىستى.
جيىندا ءبىرىنشى بولىپ ءسوز العان سەرىك قاسقاباسوۆ الداعى وتەتىن حالىقارالىق ءتۋرنيردىڭ ماڭىزىنا توقتالدى.
— ۇستەل تەننيسى بويىنشا الەمدەگى ەڭ ءىرى جارىستاردىڭ ءبىرى سانالاتىن «World Tour Grand Finals» ءتۋرنيرى دەڭگەيى جاعىنان وليمپيادا مەن الەم چەمپيوناتىنان كەيىنگى ورىندا تۇر. وعان الەمدىك رەيتينگ بويىنشا كوش باستاپ تۇرعان ۇزدىك 16 تەننيسشى عانا (ەرلەر مەن ايەلدەر) قاتىسادى. سونىمەن قاتار، جۇپتىق سايىستا الەمدىك تۋردىڭ ون ەكى كەزەڭىندە جوعارى ۇپاي جيناعان سپورتشىلارعا جولداما بەرىلەدى. استاناعا كەلەتىندەردىڭ اراسىندا 5 وليمپيادا چەمپيونى، 9 الەم چەمپيونى اتاعىنا يە بولعان سپورتشىلار بار، — دەدى سەرىك سەيىت ۇلى.
«World Tour Grand Finals» ءتۋرنيرى بيىلعى جىلى وتكەن 12 كەزەڭنىڭ قورىتىندى جارىسى بولماق. بۇعان دەيىنگى كەزەڭدەر بۋداپەشت (ۆەنگريا)، نيۋ-دەلي ء(ۇندىستان)، ينچحون (وڭتۇستىك كورەيا)، پاناگيۋريشتە (بولگاريا)، ولوموۋتس (چەحيا)، ستوكگولم (شۆەتسيا)، دوحا (كاتار)، توكيو (جاپونيا)، چەندۋ (قىتاي)، بريسبەن (اۆستراليا)، لينتس (اۆستريا) جانە ماگدەبۋرگ (گەرمانيا) قالالارىندا ءوتتى.
استاناداعى ءتۋرنيردى الەمنىڭ 122 ەلىنىڭ تەلەارنالارى كورسەتەدى. بارلىق تەلەارنالاردىڭ اۋديتورياسى — 800 ملن. ادام.
