SportPress.kz Qazaqstan sport jańalyqtary
Kezinde batyr atamyz Baýyrjan Momyshuly: «Meniń boıymda qaırat kúshim tasyp turǵanda kárilerdiń tizimine qospańdar», degen eken. Oılap qarasaq, batyr atamyzdyń bul bir aıtqan qanatty sózine alyp qosar eshnárse tabyla qoımas. Desek te az-kem óz oıymdy qos ketsem dep otyrmyn.
Rasymen de adamnyń jasy 45-50 asqan soń biz ózimizdi qart sanap káriliktiń noqtasyn ýaqytynan buryn basymyzǵa salatynymyz osy nelikten?. О́mirdiń ózi arpalys, aıqastan turady desek, qoǵamda ózimizdi eńsemizdi túsirmeı beldi býyp, belsene ómir keshkenge ne jetsin. Aspan asty eline Qytaıǵa barǵan bir saparymda jastary 80-90 jetip qalǵan qarııalar kóshede turyp túrli jattyǵýlar jasap ne bolmasa júgirip bara jatqanyn kórip tańǵalǵan edim. Olardyń bul jattyǵýlaryna eshkim qarap ta jatqan joq. О́ıtkeni, qalypty jaǵdaı dep qaraıdy. Al, bizde kóshe boıynda emes arnaıy jattyǵý zaldaryna baryp, jattyǵyp jatqan egde adamdardy kezdestirý neken-saıaq dep aıtýǵa bolady. Múmkin bizdiń qazaq úshin ersi nárse shyǵar. Biraq densaýlyq qımyl –qozǵalystan turatynyn umytpasaq eken. Iá, densaýlyq – adam úshin taptyrmas zor baılyq. Basqanyń barlyǵy ótpeli-ketpeli dúnıe.
Búgin Almaty mańyndaǵy О́tegen kentinde ardagerler arasynda Ahmet Davyduly degen azamatty eske alýǵa arnalǵan jarys bolyp ótti. Iá, jarystyń qalaı ótkeni týraly alda aıtarmyn. Aldymen osy týrnırge kelip qatysqan ardager sportshylar týraly sóz etkim kelip otyr. О́ıtkeni, joǵaryda aıtqanymdaı, olar — fýtbol arqyly densaýlyqtaryn baıytyp, berekesin kórip júrgen jandar. Osy jarysqa kelgen ardager fýtbolshylardyń barlyǵy derlik aptasyna úsh ret fýtbol alańdarynda dop qýalap, densaýlyqtaryn shyńdap, salaýatty ómir saltyn ustanyp júrgen komandalardyń ókilderi. Qaısibirinen surasań da olar fýtboldy ómirleriniń basty tiregi dep qaraıtynyn, júgirý arqyly densaýlyqtaryn jaqsartyp, bir jaǵy bastary qosylyp sher tarqasyp qaıtatyndyqtaryn sheshile aıtyp beredi. Sondyqtan da osyndaı týrnırler ardagerler úshin úlken mereke ári densaýlyq dep biledi.
Jastary keıbiriniń 70-ten assa da alańda 20-daǵy jigitke aldyrmaıdy. Qımyldary ábjil, oıyn tehnıkalary, sheberlikterine qurmetpen qarap qol soǵarlyqtaı. Búgingi jarysqa Ile aýdannyń ár aımaǵynan 5 komanda kelip qatysty.
Jarysty uıymdastyrýǵa uıytqy bolyp júrgen qazaq sport jýrnalıstıkasynda óz orny bar, belgili jýrnalıst Álim Anapııanov aǵamyzdyń aıtýyna qaraǵanda , bul jarys aldaǵy jyly dástúrlik etip ótkizilmekshi.
Hosh, sonymen, kúni boıy alańda jeńis úshin shúmektep ter tógip, janyn salǵan ardager oıynshylardyń arasynan birinshi oryndy jýyrda ǵana belgili sport kommentatory Dıas Omarovtyń atyndaǵy dúbirli jarystyń jeńimpazy atanǵan «О́tegen kenti» komandasy jeńip alsa, ekinshi oryndy Saıfýddın, Darhan, Qanat, Baqytjan, Ázız syndy saıdyń tasyndaı saqa fýtbol ardagerleri bar «Qarǵaly» komandasy ıe boldy. Bir aıta keter jáı, osy attary atalǵandardyń arasynda Darhan, Qanat, Saıfýddın sekildi ardager sportshylar sonaý 1986 jylǵy qandy Jeltoqsan kóterilisindegi aıazdy, azapty túnde shovınıstik rejımge qarsy shyǵyp, táýelsizdigimizdi jeńip áperýge úles qosqan qaharmandar.
Sonymen, jarys sońynda jeńimpazdar men júldegerler uıymdastyrýshylardyń ázirlegen kýbok, dıplomdarymen marapattaldy. Sonymen qatar, «úzdik qorǵaýshy», «úzdik qaqpashy», «úzdik oıynshy», «úzdik shabýylshy» nomınaııalary boıynsha ardager oıynshylarǵa baǵaly syılyqtar tabys etildi. Mende úıge qur qol qaıtpaı Alla násip etip, «úzdik shabýylshy» marapatyn alyp qaıttym. Elimizde ótken saılaý kúni jáne búgin keshke Katarda jalaýy jelbireıtin fýtboldan álem chempıonatymen birge dóp kelgen ardagerler jarysy tamasha kóńil-kúıde bolyp ótti. Ardagerlerdiń aıtýly dop dodasynan alǵan áserleri keremet. Aldaǵy jyly bul týrnırdiń geografııalyq jaǵdaıy jaqsara túsetini týraly uıymdastyrýshylar tilge tıek ete ketti. Jarys sońynda qatysýshylarǵa dastarhan jaıylyp, týrnır ıesi Ahmet marqumdy eske alyp quran oqyldy.
Aqyn ORDABAIULY,
ALMATY
