قازاق كۇرەسىنەن الەم چەمپيوناتى اياقتالدى

مينسك قالاسىندا قازاق كۇرەسىنەن جەتىنشى əلەم چەمپيوناتى اياقتالىپ، تاعى ءبىر ءدۇبىرلى دودا تاريح قويناۋىنا كەتتى.

قازاق كۇرەسىنەن əلەم چەمپيوناتىن ەكى ايدىڭ ىشىندە ۇيىمداستىرىپ وتكىزگەن بەلارۋس رەسپۋبليكاسىنىڭ سپورت مينيسترلىگى مەن بەلارۋس قازاق كۇرەسى فەدەراتسياسىنا العىستان باسقا ايتارىمىز جوق. مينسكدەگى ەڭ ۇلكەن «وليمپيسكي» سپورت كەشەنىن بەرىپ، əلەمنىڭ تۇكپىر-تۇكپىرىنەن كەلگەن پالۋاندارعا بارلىق جاعدايىن جاساپتى. جارىس وتەتىن جەر مەن قوناق ءۇي ءبىر جەرگە ورنالاسقان. پالۋانداردىڭ ءۇش مەزگىل تاماعى دايىن. ءبىر سوزبەن ايتقاندا ۇيىمداستىرۋ جاعى كەرەمەت. بۇل əرينە ەڭ ءبىرىنشى دۇنيەجۇزىلىك قازاق كۇرەسى فەدەراتسياسىن باسقارىپ وتىرعان يسلام Əبىشەۆ پەن سەرىك توكەەۆ اعالارىمىزدىڭ ەڭبەگى ەكەنى داۋسىز. Əلەم بىرىنشىلىگىندە جەڭىمپاز اتانعان پالۋاندار 2 000، ەكىنشى ورىنعا 1 000 جəنە ءۇشىنشى ورىنعا يە بولعاندار 500 دوللاردان سىياقىعا يە بولسا، تۇيە پالۋاندار بəسەكەسىنىڭ جەڭىمپازدارى تيىسىنشە 4،3 جəنە 2 000 دوللاردان الدى. بۇل əرينە پالۋاندار ءۇشىن كەرەمەت مۇمكىندىك ەكەنى ءسوزسىز.

دۇنيەجۇزىلىك قازاق كۇرەس فەدەراتسياسىنىڭ بۇل جەردەگى ماقساتى ۇلتتىق كۇرەسىمىزگە دەگەن وزگەلەردىڭ قىزىعۋشىلىعىن ارتتىرۋ دەپ بىلەمىز. جىلدان-جىلعا شەت ەلدىكتەردىڭ قازاق كۇرەسىنە دەگەن ىنتاسى ارتىپ، وسىنداي دودالاردا ءبىزدىڭ پالۋاندارعا مىقتى قارسىلىق كورسەتۋى سوزىمىزگە دəلەل بولا الادى.

بۇل چەمپيونات تاريحتا تۇڭعىش رەت əيەلدەر اراسىندا وتۋىمەن دە ەرەكشە بولدى. بۇيىرسا الداعى ۋاقىتتا əيەلدەر اراسىندا قازاق كۇرەسى مىقتاپ داميتىن بولادى.

چەمپيوناتتىڭ اشىلۋ سالتاناتىنا دۇنيەجۇزىلىك قازاق كۇرەسى فەدەراتسياسىنىڭ قۇرمەتتى پرەزيدەنتى، اتى اڭىزعا اينالعان پالۋان الەكساندر مەدۆەد پەن فەدەراتسيانىڭ تاعى ءبىر قۇرمەتتى پرەزيدەنتى، سپورت جاناشىرى قاجىمۇقان مəسىموۆتەردىڭ قاتىسۋى دودانىڭ بەدەلىن ارتتىرا ءتۇستى دەسەك ارتىق ايتقاندىق ەمەس شىعار. سونىمەن قاتار، بەلارۋس ەلىندەگى قازاقستان ەلشىسىنىڭ كەڭەسشىسى ومىرزاق بەيسپەكوۆ تە قاتىسىپ، ەلشىلىك اتىنان سىي-سياپات ۇسىنعانىڭ دا ايتا كەتكەن ءجون.

سونىمەن 7-ءشى əلەم چەمپيوناتىنىڭ جەڭىمپازدارى بولعان پالۋاندار : جاقسىلىق مۇسىرمانوۆ (60 كيلو، قازاقستان)، الي تۇرسىنوۆ (70 كيلو، رەسەي)، حامروز راجابوۆ (80 كگ، تəجىكستان)، ەرلان وماروۆ (90 كگ، قازاقستان)، تالعات Əمرەنوۆ(+90 كگ، قازاقستان) جəنە ءابسولتتى سالماقتا الەكساندر ۆاحابياك (بەلارۋس).
سونىمەن قاتار əيەلدەر اراسىندا تاريحتا تۇڭعىش əلەم چەمپيونى اتانعاندار: التىناي حابي (70 كگ، قازاقستان) جəنە وتگون مۋنحتسەتسەگ (+70 كگ، موڭعوليا). ءبىزدىڭ قالجان تايجان جاراقاتىنا بايلانىستى ەكىنشى ورىن الىپ قالدى.

وسىلايشا، əلەم چەمپيوناتى اياقتالىپ، مينسكمەن قوش ايتىستىق. ەندى قاراشا ايىندا برازيليادا قازاق كۇرەسىنەن پان امەريكا ويىندارى وتەدى.

مۇساعالي تاسقاليەۆ،

مينسك (بەلارۋس)