Жас палуанның жарқын жетістіктері

Жамбыл облысы, Тараз қаласының тумасы Нұрасыл Асылханұлы Аманалы – бүгінде грек-рим күресінен ел назарын өзіне аударып жүрген жас спортшылардың бірі.

Нұрасыл 2005 жылғы 9 қаңтарда туған. Бала кезінен спортқа бейім болып өскен ол грек-рим күресін өмірлік жолы ретінде таңдады. Қазіргі таңда М.Х. Дулати атындағы Тараз өңірлік университетінде «Дене шынықтыру және спорт» мамандығы бойынша білім алып, оқу мен спортты қатар алып жүріп келеді.

Жас палуанның спорттағы жетістіктері де аз емес. 2023 жылы Азия чемпионатында күміс жүлдеге ие болып, осы нәтижесінің негізінде оған халықаралық спорт шебері атағы берілді. Бұған қоса, Нұрасыл осы уақытқа дейін бірнеше халықаралық турнирлердің жеңімпазы және жүлдегері атанып, еліміздің абыройын асқақтатып келеді.

2025 жылдың 1–6 желтоқсан аралығында Алматы қаласында өткен ересектер арасындағы Қазақстан чемпионатында Нұрасыл Аманалы жоғары деңгейдегі белдесулер өткізді. 97 келі салмақ дәрежесінде 1/8 финалда Алматы облысының спортшысы Дамир Тұрсыновты 8:0 есебімен, 1/4 финалда Түркістан облысының балуаны Е. Насирдинді 8:0 есебімен, жартылай финалда астаналық Мақсат Сайлауды жеңіп, финалға жолдама алды.

Алайда финалда алған жарақатына байланысты күреске шыға алмай, нәтижесінде Қазақстан чемпионатының күміс жүлдесіне иеленді. Бұл — жас спортшы үшін үлкен жетістік әрі болашақ табыстың бастамасы.

Нұрасылдың бүгінгі жетістіктері — оның жеке еңбегімен қатар, білікті бапкері Сағи Исаевтың тынымсыз еңбегінің жемісі. Сағи Исаев — кезінде өзі де ел намысын қорғаған, бірнеше республикалық және халықаралық жарыстардың жүлдегері атанған тәжірибелі спортшы. Бүгінде ол шәкірт тәрбиелеуде мол тәжірибесін тиімді пайдаланып келеді.

Нұрасыл Аманалы — еңбекқорлығы мен табандылығының арқасында биік белестерді бағындырып келе жатқан жас спортшы. Алдағы уақытта да халықаралық ареналарда жеңіс тұғырынан көрінеді деген сенім мол.

Нұршахризада САЛИМОВА,

ТАРАЗ