جاس پالۋاننىڭ جارقىن جەتىستىكتەرى

جامبىل وبلىسى، تاراز قالاسىنىڭ تۋماسى نۇراسىل اسىلحان ۇلى امانالى – بۇگىندە گرەك-ريم كۇرەسىنەن ەل نازارىن وزىنە اۋدارىپ جۇرگەن جاس سپورتشىلاردىڭ ءبىرى.

نۇراسىل 2005 جىلعى 9 قاڭتاردا تۋعان. بالا كەزىنەن سپورتقا بەيىم بولىپ وسكەن ول گرەك-ريم كۇرەسىن ومىرلىك جولى رەتىندە تاڭدادى. قازىرگى تاڭدا م.ح. دۋلاتي اتىنداعى تاراز وڭىرلىك ۋنيۆەرسيتەتىندە «دەنە شىنىقتىرۋ جانە سپورت» ماماندىعى بويىنشا ءبىلىم الىپ، وقۋ مەن سپورتتى قاتار الىپ ءجۇرىپ كەلەدى.

جاس پالۋاننىڭ سپورتتاعى جەتىستىكتەرى دە از ەمەس. 2023 جىلى ازيا چەمپيوناتىندا كۇمىس جۇلدەگە يە بولىپ، وسى ناتيجەسىنىڭ نەگىزىندە وعان حالىقارالىق سپورت شەبەرى اتاعى بەرىلدى. بۇعان قوسا، نۇراسىل وسى ۋاقىتقا دەيىن بىرنەشە حالىقارالىق تۋرنيرلەردىڭ جەڭىمپازى جانە جۇلدەگەرى اتانىپ، ەلىمىزدىڭ ابىرويىن اسقاقتاتىپ كەلەدى.

2025 جىلدىڭ 1–6 جەلتوقسان ارالىعىندا الماتى قالاسىندا وتكەن ەرەسەكتەر اراسىنداعى قازاقستان چەمپيوناتىندا نۇراسىل امانالى جوعارى دەڭگەيدەگى بەلدەسۋلەر وتكىزدى. 97 كەلى سالماق دارەجەسىندە 1/8 فينالدا الماتى وبلىسىنىڭ سپورتشىسى دامير تۇرسىنوۆتى 8:0 ەسەبىمەن، 1/4 فينالدا تۇركىستان وبلىسىنىڭ بالۋانى ە. ءناسيرديندى 8:0 ەسەبىمەن، جارتىلاي فينالدا استانالىق ماقسات سايلاۋدى جەڭىپ، فينالعا جولداما الدى.

الايدا فينالدا العان جاراقاتىنا بايلانىستى كۇرەسكە شىعا الماي، ناتيجەسىندە قازاقستان چەمپيوناتىنىڭ كۇمىس جۇلدەسىنە يەلەندى. بۇل — جاس سپورتشى ءۇشىن ۇلكەن جەتىستىك ءارى بولاشاق تابىستىڭ باستاماسى.

نۇراسىلدىڭ بۇگىنگى جەتىستىكتەرى — ونىڭ جەكە ەڭبەگىمەن قاتار، بىلىكتى باپكەرى ساعي يساەۆتىڭ تىنىمسىز ەڭبەگىنىڭ جەمىسى. ساعي يساەۆ — كەزىندە ءوزى دە ەل نامىسىن قورعاعان، بىرنەشە رەسپۋبليكالىق جانە حالىقارالىق جارىستاردىڭ جۇلدەگەرى اتانعان تاجىريبەلى سپورتشى. بۇگىندە ول شاكىرت تاربيەلەۋدە مول تاجىريبەسىن ءتيىمدى پايدالانىپ كەلەدى.

نۇراسىل امانالى — ەڭبەكقورلىعى مەن تاباندىلىعىنىڭ ارقاسىندا بيىك بەلەستەردى باعىندىرىپ كەلە جاتقان جاس سپورتشى. الداعى ۋاقىتتا دا حالىقارالىق ارەنالاردا جەڭىس تۇعىرىنان كورىنەدى دەگەن سەنىم مول.

نۇرشاحريزادا ساليموۆا،

تاراز